ⵉⵎⵛⵛⵉⵡⴰⵕ, ⵎⴰⵙⵙⴰ Ana Brnabic, ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⵏⵏⴰ ⵉⵙⴽⵔⵏ ⵢⴰⵏ ⵓⵔⵣⴰⴼ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵡⴰⵙⵙ ⵏ ⵓⴽⵕⴰⵙ 20 ⵏⵓⵡⴰⵏⴱⵉⵔ 2024.
ⴳ ⵜⵉⵣⵡⵉⵔⵉ ⵏ ⵓⵎⴰⴳⵔ ⴰⴷ, ⵢⵓⵍⵖ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ ⴰⵔⵣⴰⴼ ⴰⴷ ⴰⴱⵕⵍⴰⵎⴰⵏⵉ, ⵉⵙⴷⴷⵉⴷ ⵉⵙ ⴰ ⵉⵙⵏⵄⴰⵜ ⴰⴳⴳⴰⴹ ⵏ ⵜⵙⵇⵇⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⴷ ⴰⵔ ⵉⵙⵙⵕⵚⴰ ⴰⵎⵏⵉⴷ ⴰⴱⵕⵍⴰⵎⴰⵏⵉ ⵏ ⵓⴷⵔⴰⵡ ⵏⴳⵔ ⵙⵏⴰⵜ ⵏ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ.
ⵉⴱⴷⵔ ⴳ ⵓⵎⵏⴰⴹ ⴰⴷ, ⵜⵉⵖⴱⵉ ⵏ ⵓⵎⵣⵔⵓⵢ ⵏⴳⵔ ⵙⵏⴰⵜ ⵜⵎⵉⵣⴰⵔ ⵙⴳ ⵎⴰⴷ ⵍⵍⴰⵏⵜ ⵜⵙⵇⵇⴰⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⴳⵔⴰⵙⵏⵜ ⵙⴳ ⵓⵙⴳⴳⵯⴰⵙ ⵏ 1957, ⴷ ⵓⵙⵖⵓⵏ ⵉⴷⵓⵙⵏ ⵉⴱⴷⴷⵏ ⵅⴼ ⵜⵡⵓⵔⵉ ⵉⵙⵙⵓⵔⵏ ⴷ ⵜⵕⵡⵉ ⴷ ⵓⵣⵔⴰⴽ ⴰⵎⵢⴰⵖ, ⴰⵀⴰ ⵉⵙⴷⴷⵉⴷ ⵉⵙ ⵣⵎⵎⴻⵎⵏⵜ ⵜⵙⵇⵇⴰⵏ ⴰⴷ ⵢⴰⵏ ⵓⴱⵓⵖⵍⵓ ⵉⵅⴰⵜⵔⵏ ⴷⴷⵓ ⵏ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵙ ⵜⵖⴰⵔⴰⵙⵜ ⵏ ⵜⴰⵏⵏⴰⵢⵜ ⵜⴰⵙⵜⵔⴰⵜⵉⵊⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵓⵙⴷⵓⵙ ⵏ ⵉⵙⵖⵡⴰⵏ ⵏ ⵜⵉⴷⴷⵓⴽⴽⵍⴰ ⴷ ⵓⵎⵢⴰⵡⴰⵙ ⴰⴽⴷ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⴳ ⵓⵙⴰⵜⵉ ⵏ ⵓⵙⵎⵢⴰⵏⴰⵡ ⵏ ⵉⴷⵔⴰⵡⵏ.
ⴰⵀⴰ ⵉⵏⵏⴰ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ ⴳ ⵓⵙⴰⵜⵉ ⴰⴷ ⵉⵙ ⵜⵉⵢⴰⴼⵓⵜⵉⵏ ⵏ ⵜⴰⵏⵏⴰⵢⵜ ⴰⴷ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ ⴼⴰⵡⵏⵜ ⴳ ⵜⴷⵉⵏⴰⵎⵉⵜ ⵉⵖⵓⴷⴰⵏ ⵉⵍⵍⴰⵏ ⵖⵔ ⵜⵙⵇⵇⴰⵏ ⵏⴳⵔ ⵙⵏⴰⵜ ⵜⵎⵉⵣⴰⵔ ⴳ ⵎⵏⵏⴰⵡ ⵉⵙⵡⵉⵔⵏ.
ⴳ ⵓⵙⴰⵜⵉ ⴰⴷ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵏⵏⴰⵍ ⵏ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ ⵉ ⵜⵙⵏⵜⴰⵢⵜ ⵜⴰⵎⵖⵔⴰⴱⵉⵜ ⵏ ⵓⵏⴱⴰⴹ ⴰⵏⵉⵎⴰⵏ ⴷⴷⵓ ⵏ ⵓⴱⴰⴹ ⴰⵎⵖⵔⴰⴱⵉ, ⵍⵍⵉⴳ ⵜⴳⴰ ⴰⴼⵙⵙⴰⵢ ⴰⴷⵖⵔⵉ ⵉⵕⵡⴰⵏ ⵏ ⵓⵙⵎⵙⴰⵙⴰ ⵏ ⵓⵎⵏⵣⴰⵖ ⴰⴷ ⴰⵙⴳⴰⵡⴰⵏ ⵅⴼ ⵜⵏⵣⵔⵓⴼⵜ ⵜⴰⵎⵖⵔⴰⴱⵉⵜ, ⴰⵀⴰ ⵉⵙⴷⴷⵉⴷ ⵉⵙ ⵢⵓⴷⴼ ⵡⴰⴷⴷⴰⴷ ⴰⴷ ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵏ ⵡⴰⵏⵏⴰⵍ ⵉⵔⵏⵏⵓⵏ ⵉⴱⵓⵖⵍⴰⵏ ⵏ ⵜⵙⵏⵜⴰⵢⵜ ⵜⴰⵎⵖⵔⴰⴱⵉⵜ ⵏ ⵓⵏⴱⴰⴹ ⴰⵏⵉⵎⴰⵏ, ⵏⵏⴰ ⵉⵎⵎⴰⵍⵏ ⴰⵡⵡⴰⵙ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⵉ ⵜⴰⵏⵏⴰⵢⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵉ ⵉⵎⴰⵍ ⵏ ⵜⵏⵣⵔⵓⴼⵜ ⵜⴰⵎⵖⵔⴰⴱⵉⵜ.
ⵙ ⵜⵎⵍⴷⴰ ⴰⴷ, ⵉⵙⵙⵓⵜⵔ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ ⵉ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ ⴰⴷ ⵜⵔⵣⴼ ⵙ ⵜⵙⴳⵉⵡⵉⵏ ⵏ ⵢⵉⴼⴼⵓⵙ, ⵜⴰⴼⴰ ⴰⴷ ⵜⵉⵥⵉⵕ ⴰⵙⵡⵉⵔ ⵏ ⵜⵏⴽⵔⴰ ⵜⴰⴷⵎⵙⴰⵏⵜ ⴷ ⵜⵏⴳⵎⵓⵜ ⵉⵍⵍⴰⵏ ⵙ ⵜⵖⴰⵔⴰⵙⵜ ⵏ ⵉⵙⴰⵡⵔⵏ ⵉⵏⵏⵓⵕⵥⵎⵏ ⴷ ⵉⵙⵏⵜⴰⵢ ⵉⵣⵡⴰⵔⵏ ⵏⵏⴰ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⴳ ⵎⵏⵏⴰⵡ ⵉⵙⵡⵉⵔⵏ, ⴰⵀⴰ ⴰⴷ ⵜⵉⵙⵉⵏ ⴰⴽⵙⴰⵢ ⵏ ⵓⴱⵓⵖⵍⵓ ⴷ ⵜⵣⵣⵉⴳⵣⵜ ⵏⵏⴰ ⵉⵎⵎⵔⵙⵏ ⴳ ⵜⵓⴳⵜⵜ ⵏ ⵉⴳⵔⴰⵏ ⵏ ⵜⴳⵎⵉ.
ⴳ ⵓⵙⵡⵉⵔ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ, ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵅⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⴷⵓⵙ ⵏ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ ⵏⴳⵔ ⵍⵎⵖⵔⵉⴱ ⴷ ⵚⵉⵕⴱⵢⴰ, ⴰⵡⴷ ⴳ ⵓⵙⵎⵖⵔ ⵏ ⵓⵎⵙⴰⵙⴰ ⴷ ⵓⵎⵙⴰⵡⴰⵍ ⵏⴳⵔ ⵉⴳⵏⵙⴰⵙⵏ ⵏ ⵉⵎⴰⴷⴰⵏⵏ ⵏ ⵙⵏⴰⵜ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ, ⴰⵡⴷ ⴳ ⵡⴰⴷⴰⵙ ⴷ ⵓⵙⵎⵓⵏ ⵏ ⵉⵎⵓⵖⵍⵉⵜⵏ ⴷ ⵜⴰⵏⵏⴰⵢⵉⵏ ⵅⴼ ⵜⵎⵙⴰⵔⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ.
ⵙⴳ ⵜⵏⵉⵍⴰ ⵏⵏⵙ ⵜⵙⴷⴷⵉⴷ ⵎⴰⵙⵙⴰ Ana Brnabic, ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵜⴳⴷⵓⴷⴰⵏⵜ ⵏ ⵚⵉⵕⴱⵢⴰ, ⵜⵉⵔⴰⵜ ⵜⴰⴷⵖⵔⵉⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵏⴳⵔ ⵙⵏⴰⵜ ⵜⵎⵔⵙⴰⵍ ⵜⵓⵣⵔⵉⴼⵉⵏ, ⴷ ⵓⵙⴳⵓⴷⵉ ⵏ ⵓⵣⴷⴷⵓⵢ ⴷ ⵓⵎⵛⴰⵡⴰⵕ, ⵙ ⵓⵙⵙⵔⵇⴱ ⵏ ⵓⵎⵎⵙⴽⴰⵍ ⵏ ⵉⵔⵣⴰⴼⵏ ⴷ ⵜⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⴳ ⵎⵏⵏⴰⵡ ⵉⴳⵔⴰⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⴷ ⵇⴰⵃ ⵜⵉⵙⵏⵜⴰⵢⵉⵏ ⵉⵙⵙⵓⵔⵏ ⵉⵡⴰⵜⵜⵙⵏ ⴰⵙⴷⵓⵙ ⵏ ⵜⵙⵇⵇⴰⵏ ⵜⵉⵎⵔⵙⴰⵍⵉⵏ, ⴷ ⵓⵙⵉⵍⵉ ⵏⵏⵙⵏⵜ ⵖⵔ ⵓⵙⵡⵉⵔ ⵏ ⵓⴷⵔⴰⵡ ⵉⵍⴰⵏ ⴰⴼⴰⵔⵙ.
ⴷⴰⵢ ⵜⵙⵙⵓⵜⴳ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵚⵉⵕⴱⵢⴰ ⵙ ⵜⵎⵍⴷⴰ ⴰⴷ, ⵜⵓⴳⴳⴰⵙ ⵉⵙⵙⵓⵔⵏ ⵉⵜⵜⴰⵡⵙⴽⴰⵔⵏ ⵉ ⵓⵙⴱⵓⵖⵍⵓ ⵏ ⵜⵙⵇⵇⴰⵏ ⵜⵉⴷⵎⵙⴰⵏⵉⵏ ⵏⴳⵔ ⵙⵏⴰⵜ ⵜⵎⵉⵣⴰⵔ, ⵙ ⵎⴰ ⵉⵙⵙⴰⵍⴰⵢⵏ ⴰⵙⵡⵉⵔ ⵏ ⵜⵙⵇⵇⴰⵏ ⵜⵉⵙⵔⵜⴰⵏⵉⵏ ⵉⵥⵉⵍⵏ, ⴰⵀⴰ ⵜⵙⴷⴷⵉⴷ ⵉⵙ ⴰⴷ ⵅⴰⵜⵔⵏ ⵉⵣⵎⵣⵣⴰ ⴷ ⵜⵣⵎⵎⴰⵔ ⵉⵍⵍⴰⵏ ⵏⴳⵔ ⵙⵏⴰⵜ ⵜⵎⵉⵣⴰⵔ.
ⴷⴰⵢ ⵜⵓⵍⵖ ⵎⴰⵙⵙⴰ Ana Brnabic ⴳ ⵓⵎⴰⴳⵔ ⴰⴷ, ⵜⵉⴼⵔⵉⵙⵉⵏ ⵏ ⵜⴳⵎⵉ ⴷ ⵓⴱⵓⵖⵍⵓ ⵉⵍⵍⴰⵏ ⴳ ⵍⵎⵖⵔⵉⴱ ⴳ ⵇⴰⵃ ⵉⵙⵡⵉⵔⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴼⴳⴰⵏⵏ, ⴰⵀⴰ ⵜⵙⵏⵄⵜ ⴳ ⵓⵙⴰⵜⵉ ⴰⴷ ⴰⴳⴰⵔⴰⵣ ⵏⵏⵙ ⵙ ⵜⴰⵏⵏⴰⵢⵜ ⵜⴰⵏⴳⵎⵓⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⵖⵓⴽⵍⵍⵉ ⵜⵙⴷⴷⵉⴷ ⵜⵉⵔⴰⵜ ⵏ ⵜⵎⵓⵔⵜ ⵏⵏⵙ ⴳ ⵓⵎⵎⵙⴽⴰⵍ ⵏ ⵜⵎⵓⵣⴰⵢⵉⵏ ⴷ ⵜⵔⵎⵉⵜⵉⵏ ⴰⴽⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵉⴳⵔⴰⵏ ⵉⵎⵉⴷⵉⵔⵏ ⵉⵍⴰⵏ ⴰⴽⴰⵎⴷ ⴰⵎⴰⵣⴰⵔ.