ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⵙⵉⵏⴰⵙ14 ⵏⵓⵡⴰⵏⴱⵉⵔ 2023 ⵎⴰⵙⵙ ⵟⵓⵎⴰⵙ ⴰⵏⵟⵓⵏⵢⵓ ⴳⵡⴰⵔⴷⵢⴰ ⵡⵉⵍⵢⴰⵎⵙⵓⵏ ⴰⵎⵙⵇⴰⴷ ⵏ ⵜⴳⴷⵓⴷⵏⵜ ⵏ ⴱⴰⵏⴰⵎⴰ ⵉⴳⴰⵏ ⵓⵖⵣⵉⵏ ⴳ ⵕⵕⴱⴰⵟ
ⴳ ⵜⵉⵣⵡⵉⵔⵉ, ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵢⵓⵎⵎⵔ ⵙ ⵓⵏⵎⵓⵇⵇⴰⵔ ⴰⴷ ⵏⵏⴰ ⵉⵎⵎⴰⵍⴰⵏ ⵉⵎⵢⴰⵙⵙⴰⵜⵏ ⵉⵙⵔⵜⴰⵏⵏ ⴷⵓⵙⵏⵉⵏ ⵏⴳⵔ ⵜⵎⵉⵣⴰⵔ ⵜⵉⵎⴷⴷⵓⴽⴰⵍ ⵙ ⵙⵏⴰⵜ, ⵖⵉⴽⵍⵍⵉ ⵉⵙⴷⴷⵉⴷ ⵜⵉⵔⴰⵜ ⵏ ⵜⴳⵍⴷⵉⵜ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴰⴽⴷ ⴱⴰⵏⴰⵎⴰ ⴷ ⵜⵓⴽⴽⵙⴰ ⵏ ⴰⴽⴽⵯ ⴰⵣⵔⵔⴼ ⵏⵏⴰ ⵉⴷⴷⴰⵏ ⴰⴷ ⵜ ⵉⵏⵏⴰⵍ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⴰ ⵉⵥⵕⵕⴰ ⵍⵎⵖⵔⵉⴱ ⵉⵎⵢⴰⵙⵙⴰⵜⵏ ⵏⵏⵙ ⴰⴽⴷ ⴱⴰⵏⴰⵎⴰ ⴳ ⵓⵙⴰⵜⵉ ⵏ ⵜⵎⵙⵔⵓⵙⵜ ⵉⵖⵥⴰⵏⵏ ⵉⴱⴷⴷⵏ ⵅⴼ ⵓⵎⵢⴰⵡⴰⵙ ⵏ ⵢⵉⴼⴼⵓⵙ - ⵉⴼⴼⵓⵙ ⵉⵡⴰⵜⵜⵙⵏ ⴰⵙⴷⵓⵙ ⵏ ⵉⵎⵢⴰⵙⵙⴰⵜⵏ ⵏⴳⵔ ⵉⵎⴰⴷⴰⵏⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵜⵓⴳⵜⵜ ⵏ ⵉⴳⵔⴰⵏ. ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⴳ ⵎⵏⵉⴷ ⴰⴷ ⵙ ⵉⵏⴰⵡ ⴰⴳⵍⴷⴰⵏ ⴰⵎⴳⴳⴰⵔⵓ ⵙ ⵓⵣⵎⵣⵣⵓ ⵏ ⵓⴽⵜⵜⵓⵢ ⵡⵉⵙ 48 ⵏ ⵜⵡⴰⴷⴰ ⵜⴰⵣⴳⵣⴰⵡⵜ, ⵏⵏⴰ ⵉⵥⵕⵕⴰⵏ ⵎⴰⵙ ⴷ " ⵜⵓⴷⵎⵜ ⵜⴰⵟⵍⴰⵏⵜⵉⵜ ⵏⵜⵜⴰⵜ ⴰⴷ ⵉⴳⴰⵏ ⵜⴰⵡⵡⵓⵔⵜ ⵏ ⵍⵎⵖⵔⵉⴱ ⵖⵔ ⴰⴼⵔⵉⵇⵢⴰ, ⴷ ⵓⵙⵕⵥⵎ ⵉ ⵓⵏⵏⵓⵕⵥⵎ ⵏⵏⵙ ⵅⴼ ⵓⵙⴰⵢⵔⴰⵔ ⴰⵎⵉⵔⵉⴽⴰⵏⵉ ".
ⵎⴽⴷⴰ ⵉⵣⵎⵎⵉⵎ ⵎⴰⵙⵙ ⴰⵏⵙⵙⵉⵅⴼ ⵜⵉⵍⵉⵜ ⵜⴰⵏⴼⵔⴰⵔⵜ ⵏ ⵓⴱⵕⵍⴰⵎⴰⵏ ⴰⵎⵖⵔⴰⴱⵉ, ⵎⴰⵙ ⵉⴳⴰ ⵢⴰⵏ ⵓⵎⵛⵛⵔⴽ ⵓⵖⵥⵉⵏ ⵙ ⵜⵉⴷⴷⵜ, ⴳ ⵜⵓⴳⵜⵜ ⵏ ⵉⴼⵔⴷⴰⵙ ⵉⴱⵕⵍⴰⵎⴰⵏⵏ ⴳ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵍⴽⴰⵕⴰⵢⵉⴱ, ⵉⵙⵙⵉⵙⴼⵉⵡ ⴷ ⵎⴰⵙ ⵉⵔⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴷ ⵉⵙⴽⵔ ⵢⴰⵜ ⵏ ⵜⵉⵍⴰⵍⵜ ⵜⴰⵏⴼⵔⴰⵔⵜ ⴳ ⵓⵙⵉⴷⵙ ⵏⴳⵔ ⵉⵙⴰⵢⵔⴰⵔⵏ ⴰⴷ ⵉⵊⵉⵢⵓⴳⵔⴰⴼⵉⵏ ⵉⵎⵙⴰⵙⴰⵏ ⵙ ⵙⵉⵏ.
ⵖⵉⴽⵍⵍⵉ ⵉⵏⵏⴰ ⵎⴰⵙⵙ ⴰⵎⵙⵇⴰⴷ ⵎⴰⵙ ⴱⴰⵀⵔⴰ ⴷⴰⵔⵙ ⵉⵍⴰ ⵓⵏⵎⵓⵇⵇⴰⵔ ⴰⴷ ⴰⴷⴷⵓⵔ ⵉⴱⵔⵣⵏ, ⴰⵔ ⵉⵜⵜⴰⵍⵖ ⵙ ⵓⵏⵀⵍⵍⴰ ⵏⵏⴰ ⵉⵙⴽⴰⵔ ⵍⵎⵖⵔⵉⴱ ⵉ ⵓⵙⴱⵓⵖⵍⵓ ⵏ ⵉⵎⵢⴰⵙⵙⴰⵜⵏ ⵏⵏⵙ ⴰⴽⴷ ⵜⴳⴷⵓⴷⴰⵏⵜ ⵏ ⴱⴰⵏⴰⵎⴰ. ⵎⴽⴷⴰ ⵉⵏⵏⴰ ⵎⴰⵙⵙ ⴰⵎⵙⵇⴰⴷ ⵎⴰⵙ ⵉⵙⵙⵓⵙⵎ ⵓⵙⵡⵉⵔ ⴰⵏⴳⵎⵓ ⴳ ⵜⴳⵍⴷⵉⵜ ⴷ ⵜⵙⴰⵡⵔⵉⵏ ⵏⵏⴰ ⵉⵜⵜⴰⵡⵙⴽⴰⵔⵏ ⴳ ⵡⴰⴳⵏⴰⵔ ⵏ ⵉⵙⴳⴳⵯⴰⵙⵏ ⵉⵣⵔⵉⵏ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴹⵓ ⵕⴱⴱⵉ.
ⵉⵙⵙⵉⵙⴼⵉⵡ ⴷ ⵎⴰⵙⵙ ⵟⵓⵎⴰⵚ ⴰⵏⵟⵓⵏⵢⵓ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵙⵉⴷⵙ ⵏ ⵜⴰⵏⵏⴰⵢⵉⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵙⵍⴰⵡⴰⵏ ⴰⴽⴽⵯ ⴹⴰⵕⵜ ⵏ ⵙⵉⵏ ⵉⵔⵣⴰⴼⵏ ⵉⵎⴳⴳⵓⵔⴰ ⵏⵏⴰ ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉ ⴱⴰⵏⴰⵎⴰ ⴳ ⴱⵕⴰⵢⵕ 2022 ⴷ ⵎⴰⵢⵢⵓ 2023, ⴷ ⵓⵢⵉⵏⵏ ⴷⵉⴳⵙⵏ ⵉⵣⵔⵉⵏ ⵏ ⵉⵏⵎⵓⵇⵇⴰⵔⵏ ⴷ ⵉⵎⴷⵉⵡⴰⵍ ⵉⵍⴰⵏ ⵜⴰⵢⴰⴼⵓⵜ ⴰⴽⴷ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⴷ ⵉⴱⵕⵍⴰⵎⴰⵏⵉⵢⵏ ⵏ ⴱⴰⵏⴰⵎⴰ.
ⵉⵙⵙⵓⵜⵔ ⵎⴰⵙⵙ ⴰⵎⵙⵇⴰⴷ ⴳ ⵎⵏⵉⴷ ⴰⴷ, ⴰⴷ ⵜⴻⵜⵜⴰⵡⵙⵎⵔⴰⵙ ⵜⴷⵉⵏⴰⵎⵉⵜ ⴰⴷ ⴰⴼⴰⴷ ⴰⴷ ⵡⵀⵏⵏⵜ ⵜⴰⵙⵙⴰⵙⵉⵏ ⴷ ⴰⴽⴽⵯ ⴰⵢⵍⵍⵉ ⵉⴷⴷⴰⵏ ⴰⴷ ⵉⴽⴽ ⵎⵏⵉⴷ ⵏ ⵜⴳⵎⵉ ⵏ ⵉⵎⵢⵙⵙⴰⵜⵏ ⴳⵔ ⵜⵎⵉⵣⴰⵔ ⵜⵉⵎⴷⴷⵓⴽⴰⵍ ⵙ ⵙⵏⴰⵜ.