ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵡⴰⴽⵕⴰⵙ 24 ⵉⵏⵏⴰⵢⵔ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵎⴰⵙⵙ ⵢⴰⴽⵓⴱⴰ ⴽⴰⵜⵉⵍⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⴷⵍⵙⴰⵏ ⴷ ⵓⵡⵏⴹⴰⵏ ⵏ ⵜⴳⴷⵓⴷⴰⵏⵜ ⵏ ⵎⴰⵍⵉ, ⵏⵏⴰ ⵉⵙⴽⴰⵔⵏ ⵢⴰⵏ ⵓⵔⵣⴰⴼ ⵉ ⵜⴳⵍⴷⵉⵜ ⵏⵏⵉⴳ ⵏ ⵢⴰⵏ ⵓⴽⴰⴱⴰⵕ ⴰⵏⴼⵔⴰⵔ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵏ ⵓⵣⵎⵣⵣⵓ ⵍⵍⵉⴳ ⵙⴼⵓⵍⴽⵉⵏ ⵉⵎⴷⵔⴰⵡⵏ ⵙ ⵙⵉⵏ ⵉⵎⵢⴰⵙⵙⴰⵜⵏ ⵉⵍⵍⴰⵏ ⵏⴳⵔ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ ⵙ ⵙⵏⴰⵜ, ⵉⴱⴷⴷⵏ ⵅⴼ ⵢⴰⵏ ⵡⴰⵢⴷⴰ ⴰⵎⵣⵔⴰⵢ ⴷ ⵓⵖⵔⵎⴰⵏ ⵉⵛⵛⴰⵔⵏ, ⴷ ⵜⵉⵔⴰⵜ ⵉⴷⵓⵙⵏ ⵏ ⵓⵙⴱⵓⵖⵍⵓ ⵏⵏⵙⵏ ⴳ ⵇⴰⵃ ⵉⴳⵔⴰⵏ, ⵙ ⵎⴰⴳ ⵉⵍⵍⴰ ⵚⴰⵃⴰ ⵉ ⵜⵏⵓⴼⴰ ⵏ ⵉⵎⴰⴷⴰⵏⵏ ⵙ ⵙⵉⵏ.
ⵖⵉⴽⵍⵍⵉ ⵉⵙⵙⵉⵙⴼⵉⵡ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵜⵓⴳⴳⴰⵙ ⵍⵍⵉ ⵏⵏ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷⴷⵓ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵢⴰⵡⵙ ⴰⵙ, ⴳ ⵢⵉⴳⵔ ⵏ ⵓⴼⵔⴰ ⴷ ⵜⴳⵎⵉ ⵏ ⵓⵎⵏⵥⴰⵡ ⵏ ⵡⴰⴼⵔⵉⵇⵢⴰ, ⵢⴰⵡⵉ ⴷ ⴳ ⵎⵏⵉⴷ ⴰⴷ, ⵎⴰⵙ ⵜⴳⴰ ⵎⴰⵍⵉ ⵢⴰⵏ ⵓⵎⴳⴳⴰⵢ ⴰⴷⵙⵍⴰⵏ ⴳ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵏ ⵓⵙⵀⵡⵏ ⵏ ⵡⴰⴷⴰⴼ ⵏ ⵜⵎⵉⵣⴰⵔ ⵏ ⵜⴰⵖⴰⵔⵜ ⵙ ⵓⴳⴰⵔⵓ ⴰⵟⵍⴰⵏⵜⵉ.
ⴹⴰⵕⴰⵜ ⵏ ⵎⴰ ⵉⵙⵎⵏⵉⴷ ⵎⴰⵙⵙ ⴰⵏⵙⵙⵉⵅⴼ ⵉⴼⵔⵉⵙⵏ ⵏ ⵜⵉⵔⵎⵉⵜ ⵜⴰⴱⵕⵍⴰⵎⴰⵏⵉⵜ ⵏ ⵍⵎⵖⵔⵉⴱ, ⵉⵙⴷⴷⵉⴷ ⵅⴼ ⵡⴰⴷⴷⵓⵔ ⴰⵏⴼⵔⴰⵔ ⵉⵍⵍⴰⵏ ⴷⴰⵔ ⵉⵙⵇⵇⵉⵎⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴳ ⵓⵙⵡⵉⵔ ⴰⵎⵔⵙⴰⵍ, ⵢⴰⵡⵉ ⴷ ⵓⴷⵎⴰⵡⵏ ⵏ ⵓⵎⵢⴰⵡⴰⵙ ⵢⴰⵥⵏ ⵏⴳⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵖⵉⴽⵍⵍⵉ ⵢⵓⵍⵖ ⵎⴰⵙⵙ ⵢⴰⴽⵓⴱⴰ ⴽⴰⵜⵉⵍⵉ ⵜⵉⵡⵉⵙⵉ ⵜⴰⵙⵓⵍⴰⵏⵜ ⵏ ⵜⴳⵍⴷⵉⵜ ⵉ ⵜⵎⴰⵣⵉⵔⵜ ⵏⵏⵙ, ⴷ ⵜⵓⴳⴳⴰⵙ ⵍⵍⵉ ⵏⵏ ⵜⴻⵜⵜⴳⴳⴰ ⵅⴼ ⵓⵎⵣⴰⵖ ⵏ ⵜⴰⵢⴰⵏⵜ ⵜⴰⵏⴰⴽⴰⵍⵜ ⴷ ⵓⵔⴳⴳⵉⴳ ⴷ ⵜⵏⴼⵔⵓⵜ ⴳ ⵎⴰⵍⵉ.
ⵎⴽⴷⴰ ⵉⵏⵏⴰ ⵎⴰⵙⵙ ⵢⴰⴽⵓⴱⴰ ⴽⴰⵜⵉⵍⵉ ⵎⴰⵙ ⵔⴰⵏ ⵉⵎⴰⵍⵉⵢⵏ ⴰⴷ ⵙⴱⵖⵔⵏ ⴳ ⵉⵔⵉⵎ ⴰⵎⵖⵔⴰⴱⵉ, ⵥⵕⵏ ⵙ ⵜⵖⴰⵔⴰⵙⵜ ⵜⴰⵏⴰⴽⵎⴰⵔⵜ, ⴰⴱⵓⵖⵍⵓ ⵍⵍⵉ ⵜⵍⴽⵎ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵉⵙⴳⴳⴷⵏ ⵉⵙⵔⵜⴰⵏⵏ ⴷ ⵉⵎⵔⵙⴰⵍⵏ, ⵍⵍⵉ ⵉⵙⴽⵔⵏ ⴳ ⵍⵎⵖⵔⵉⴱ ⵢⴰⵏ ⵓⵣⵓⵔⵜ ⵉ ⵡⵉⵢⵢⴰⴹ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵏⵎⵏⴰⴹ.
ⵉⵙⴰⵡⵍ ⵎⴰⵙⵙ ⵢⴰⴽⵓⴱⴰ ⴽⴰⵜⵉⵍⵉ ⵅⴼ ⵉⵎⵓⵙⵙⵓⵜⵏ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⴷⵍⵙⴰⵏ ⴷ ⵓⵡⵏⴹⴰⵏ ⵏ ⵜⴳⴷⵓⴷⴰⵏⵜ ⵏ ⵎⴰⵍⵉ, ⵢⴰⵡⵉ ⴷ ⵎⴰⵙ ⴷ ⴰⵔⵣⴰⴼ ⴰⴷ ⵏⵏⵙ ⵉ ⵜⴳⵍⴷⵉⵜ ⵉⵡⴰⵜⵜⵙ ⴰⵙⴷⵓⵙ ⵏ ⵉⵎⵢⴰⵙⵙⴰⵜⵏ ⵏ ⵓⵎⵢⴰⵡⴰⵙ ⴷ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⴳ ⵍⵎⵖⵔⵉⴱ, ⴷ ⵓⴱⵟⵟⵓ ⵏ ⵜⵎⵓⵣⴰⵢⵉⵏ ⴳ ⵜⵓⴳⵜⵜ ⵏ ⵉⴳⵔⴰⵏ.