ⵜⵉⵙⵖⴰⵏ ⵜⵉⴷⵙⵍⴰⵏⵉⵏ ⵏ ⵓⵙⵇⵇⵉⵎ

1- ⴰⵣⵣⵔⴰⴼ

ⴰⵔ ⵉⵜⵜⴳⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴱⴰⴹ ⵓⵣⵔⵉⴼ ⵙ ⵓⵙⵜⴰⵢ ⵏⵏⵙ ⵏ ⴽⵔⴰ ⵏ ⵉⵙⵖⵏⵓⵜⵏ ⴷ ⵜⵙⵓⵎⴰⵔ ⵏ ⵉⵙⵍⴳⵏⵏ ⵉⵎⵎⵔⵙⵏ ⵖⵓⵔⵙ, ⴷ ⵏⵏⴰ ⵉⵣⴷⵉⵏ ⴷ ⵉⴳⵔⴰⵏ ⵉⵜⵜⵡⴰⴱⴷⵔⵏ ⴳ ⵉⵎⴰⴳⵔⴰⴷⵏ ⵏ ⵓⴷⵓⵙⵜⵓⵔ.

ⵉⵟⵟⴰⴼ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵥⴹⴰⵕ ⵏ ⵓⵙⵜⴰⵢ ⵏ ⴽⵔⴰ ⵏ ⵉⵙⵍⴳⵏⵏ ⵍⵍⵉ ⵙⵔⵓⵙⵏⵉⵏ ⵢⴰⵏ ⵓⵙⴰⵜⵉ ⵉ ⵉⵡⵜⵜⴰⵙⵏ ⵉⴷⵙⵍⴰⵏⵏ ⵏ ⵓⵎⵓⵙⵙⵓ ⵏ ⵓⵡⴰⵏⴽ ⴳ ⵉⴳⵔⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵡⵏⴹⴰⵏⵏ ⴷ ⵉⴷⵍⵙⴰⵏⵏ.

ⴰⵔ ⵉⵜⵜⴳⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴱⴰⴹ ⴰⴷ ⵙ ⵜⵖⴰⵔⴰⵙⵜ ⵏⵉⵏⴳⵎⴰⵎⵏ ⵏⵏⵙ, ⴷ ⵜⵉⴹⴰⴼ ⵏ ⵉⵍⵓⴳⵏⵏ ⵉⵜⵜⴰⵡⴱⴷⴰⵔⵏ ⴳ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ.

ⴳ ⵎⵏⵉⴷ ⴰⴷ, ⴰⵔ ⵜⵜⵎⵎⵔⴰⵙⵏ ⵙ ⵉⵣⵡⴰⵔ ⵖⵔ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉⵙⵖⵏⵓⵜⵏ ⵏ ⵉⵙⵍⴳⵏⵏ ⵉⵥⵍⵉⵏ ⵙ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⵜⴳⵎⵉ ⵜⴰⵏⵎⵏⴰⴹⵜ, ⴷ ⵉⵙⴽⴽⵉⵏⵏ ⵉⵏⴰⵎⵓⵏⵏ.

2- ⴰⵎⴰⵜⵔ ⵏ ⵜⵡⵓⵔⵉ ⵜⵓⵏⴱⵉⴹⵜ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ

ⵍⵍⴰⵏ ⵖⵔ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵟⵟⴰⵚ ⵏ ⵡⴰⵎⵎⴰⴽⵏ ⵉ ⵓⵎⴰⵜⵔ ⵏ ⵜⵏⴱⴰⴹⵜ, ⵣⴷⵉⵏ ⵙⵍⴰⵡⴰⵏ ⴰⴽⴽⵯ ⴷ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴷ ⵉⵙⵇⵙⵉⵜⵏ ⵉⵎⵉⵔⴰⵢⵏ ⴷ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵔⵙⵓⵍⴰⵏⵉⵏ ⴷ ⵜⵙⵇⵇⵉⵎⵉⵏ ⵏ ⵓⴹⴼⴼⵓⵕ ⵏ ⵜⵉⴷⵜ ⴷ ⵜⵙⵎⵉⴳⴰⵍ ⵏ ⵓⵙⴰⴳⴳⵯ ⴷ ⵜⴳⵔⵓⵎⵎⴰⵡⵉⵏ ⵏ ⵜⵡⵓⵔⵉ ⵜⴰⵙⴳⵓⵎⴰⵏⵜ, ⴷⴰⵢ ⵉⵙⴷⵓⵙ ⵓⴷⵓⵙⵜⵓⵔ ⵏ 2011 ⴰⵎⵎⴰⴽⵏ ⴰⴷ ⵙ ⵓⵙⴹⵕⵚ ⵏⵏⵙ ⵏ ⵢⴰⵜ ⵜⴳⵉⵡⵔⵜ ⵜⴰⵢⵢⵓⵔⴰⵏⵜ ⵉⵥⵍⵉⵏ ⵙ ⵓⵙⵇⵙⵉ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵅⴼ ⵜⵙⵔⵜⵉⵜ ⵜⴰⵎⴰⵜⴰⵢⵜ, ⴷ ⵜⴰⵢⵢⴰⴹ ⵉⴳⴰⵏ ⵜⴰⵙⴳⵯⵙⴰⵏⵜ ⵉⵥⵍⵉⵏ ⵙ ⵓⵎⵙⴳⴷⴰⵍ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ. 

ⵉⵙⵇⵙⵉⵜⵏ

ⵢⵉⵡⵉ ⴷ ⵓⴷⵓⵙⵜⵓⵔ ⴳ ⵓⵎⴰⴳⵔⴰⴷ 100, ⵎⴰⵙ ⵜⴻⵜⵜⴰⵡⵥⵍⴰⵢ ⵢⴰⵜ ⵜⴳⵉⵡⵔⵜ ⵙ ⵓⵙⵉⵣⵡⴰⵔ ⴽⵓ ⵉⵎⴰⵍⴰⵙⵙ ⵉ ⵉⵙⵇⵙⵉⵜⵏ ⵏ ⵉⴳⵎⴰⵎⵏ ⵏ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⴷ ⵜⵎⵔⴰⵔⵓⵜⵉⵏ ⵏ ⵜⵏⴱⴰⴹⵜ. 

ⴰⵔ ⴱⴹⴹⵓⵏ ⵉⵙⵇⵙⵉⵜⵏ ⵉⵜⵜⵓⵙⵎⵏⵉⴷⵏ ⵅⴼ ⵉⵙⵇⵙⵉⵜⵏ ⵉⵎⵉⵔⴰⵢⵏ , ⴷ ⵉⵙⵇⵙⵉⵜⵏ ⵉⵎⴰⵡⴰⵏⵏ.

ⵜⵉⵍⴰⵍⵜ ⵏ ⵓⵎⴰⵜⵔ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ

ⵜⵣⴷⵉ ⵜⵉⵍⴰⵍⵜ ⵏ ⵓⵎⴰⵜⵔ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵜⵥⵥⵉⴹⵕⴰ ⵏ ⵜⴹⴼⵕⵉ ⴷ ⵓⵙⵓⵜⴳ ⴷ ⵜⵉⴽⴽⵉ ⵏ ⵜⵙⵓⵎⴰⵔ, ⵙ ⵜⵖⴰⵔⴰⵙⵜ ⵍⵍⵉ ⵔⴰⴷ ⵉⴼⵔⵓ ⵜⵉⵕⵡⵉ ⵏ ⵉⴳⵉ ⵏ ⵓⵙⵡⵓⴷⴷⵓ ⵏ ⵜⵓⴳⴳⵜ ⵏ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⵏ ⵉⴳⵔⴰⵏ, ⵙ ⵜⵖⴰⵔⴰⵙⵜ ⵏ ⵜⴳⵉⵡⵔⵉⵏ ⵏ ⵓⵙⴼⵍⴷ ⵉ ⵉⵎⴰⵡⵙⴰⵙⵏ, ⴷ ⵓⵣⵣⴳⵉⵔ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ.

ⵜⵉⵙⵇⵇⵉⵎⵉⵏ ⵜⵉⵏⵎⵓⵔⴰⵢⵉⵏ ⵏ ⵓⴹⴼⴼⵓⵕ ⵏ ⵜⵉⴷⵜ

ⵙ ⵓⵎⵙⴰⵙⴰ ⴷ ⵓⵎⴰⴳⵔⴰⴷ 67 ⵏ ⵓⴷⵓⵙⵜⵓⵔ ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 085.13 ⵉⵥⵍⵉⵏ ⵙ ⵜⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵏ ⵜⵙⵇⵇⵉⵎⵉⵏ ⵜⵉⵏⵎⴰⵔⵉⵢⵉⵏ ⵏ ⵓⵔⵣⵣⵓ ⵏ ⵜⵉⴷⵜ, ⴷ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵉⵥⴹⴰⵕ ⵙ ⵜⵙⵏⵜⴰⵢⵜ ⵏ ⵓⴳⵍⵍⵉⴷ ⵏⵉⵖ ⵙ ⵓⵙⵓⵜⵔ ⵏ ⵢⴰⵏ ⴳ ⴽⵕⴰⴹ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⴷ ⵜⵜⴰⵡⵙⵔⴰⵙⵏⵜ ⴽⵔⴰ ⵏ ⵜⵙⵇⵇⵉⵎⵉⵏ ⵏ ⵓⵙⴰⴳⴳⵯ, ⵃⵎⴰ ⴰⴷ ⵙⵎⵓⵜⵜⵔⵏⵜ ⵉⴼⵔⴷⵉⵙⵏ ⵏ ⵉⵏⵖⵎⵉⵙⵏ ⵅⴼ ⵉⴳⴳⵉⵜⵏ ⵉⴼⵔⴳⵏ, ⵏⵉⵖ ⵅⴼ ⵓⵙⵢⵓⴷⴷⵓ ⵏ ⵜⵏⴰⴼⵓⵜⵉⵏ ⵏⵉⵖ ⵜⵉⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ, ⵣⵔⵉⵏⵜ ⵜⵏⵓⵟⵟⴰⴼ ⵏ ⵜⵡⵓⵔⵉⵡⵉⵏ ⵏⵏⵙⵏⵜ ⵎⵏⵉⴷ ⵏ ⵓⵙⵇⵇⵉⵎ.

ⵙⵉ ⴰⵢⵢⵓⵔⴰⵏ

ⵙ ⵓⵎⵙⴰⵙⴰ ⴷ ⵓⴳⵟⵟⵓⵎ ⵡⵉⵙ ⵙⵉⵏ ⵏ ⵓⵎⴰⴳⵔⴰⴷ 100 ⵏ ⵓⴷⵓⵙⵜⵓⵔ, ⴰⵔ ⵜⵜⴰⵡⴼⴽⴰⵏⵜ ⵜⵎⵔⴰⵔⵓⵜⵉⵏ ⵅⴼ ⵉⵙⵇⵙⵉⵜⵏ ⵥⵍⵉⵏⵉⵏ ⵙ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵙⴳ ⴷⴰⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⴷ ⴰⵔ ⵜⴻⵜⵜⴰⵡⵥⵍⴰⵢ ⵉ ⵉⵙⵇⵙⵉⵜⵏ ⴰⴷ ⵢⴰⵜ ⵜⴳⵉⵡⵔⵜ ⴽⵔⴰⵢⴳⴰⵜⵜ ⵡⴰⵢⵢⵓⵔ, ⴰⵔ ⵜⵜⴰⵡⴼⴽⴰⵏⵜ ⵜⵎⵔⴰⵔⵓⵜⵉⵏ ⵏⵏⵙⵏ ⵎⵏⵉⴷ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵡⴰⴳⵏⴰⵔ ⴷ ⵎⵔⴰⵡ ⵏ ⵓⵙⵙⴰⵏ ⵍⵍⵉ ⴷ ⴹⴼⵓⵕⵏⵉⵏ ⵜⵉⵣⵉ ⵍⵍⵉ ⴳ ⴷ ⵍⴽⵎⵏ ⵉⵙⵇⵙⵉⵜⵏ ⴰⵏⵙⵙⵉⵅⴼ ⵏ ⵜⵏⴱⴰⴹⵜ.

ⵜⴰⵏⴰⵟⵟⵓⴼⵜ ⵜⴰⴼⵔⴽⴰⵏⵜ ⵏ ⵜⵡⵓⵔⵉ ⵏ ⵜⵏⴱⴰⴹⵜ

ⵙ ⵓⵎⵙⴰⵙⴰ ⴷ ⵜⵓⵎⴰⵢⵉⵏ ⵏ ⵓⴳⵟⵟⵓⵎ ⵡⴰⵎⵣⵡⴰⵔⵓ ⵏ ⵓⵎⴰⴳⵔⴰⴷ 100 ⵏ ⵓⴷⵓⵙⵜⵓⵔ,ⴰⵔ ⵉⵙⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⵏⵉⴷ ⵏ ⵓⴱⵕⵍⴰⵎⴰⵏ, ⵜⴰⵏⴰⵟⵟⵓⴼⵜ ⵜⴰⴼⵔⴽⴰⵏⵜ ⵏ ⵜⵡⵓⵔⵉ ⵏ ⵜⵏⴱⴰⴹⵜ, ⵙ ⵜⵙⵏⵜⴰⵢⵜ ⵏⵏⵙ, ⵏⵉⵖ ⵙ ⵜⵓⵜⵜⵔⴰ ⵏ ⵢⴰⵏ ⴳ ⴽⵕⴰⴹ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵏⵉⵖ ⵜⵓⴳⵜⵜ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ .

ⵜⵉⴳⵉⵡⵔⵜ ⵜⴰⵙⴳⵯⵙⴰⵏⵜ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ

ⵙ ⵓⵙⵎⵙⴰⵙⴰ ⴷ ⵓⵎⴰⴳⵔⴰⴷ 101 ⵏ ⵓⴷⵓⵙⵜⵓⵔ, ⴰⵔ ⵉⵥⵍⴰⵢ ⵓⴱⵕⵍⴰⵎⴰⵏ ⵢⴰⵜ ⵜⴳⵉⵡⵔⵜ ⵜⴰⵙⴳⵯⵙⴰⵏⵜ ⵉ ⵓⵎⴹⴰⴽⴰⵕ ⵅⴼ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ. ⵜⵡⴰⵜⵜⵙ ⵜⵡⵓⵔⵉ ⴰⴷ ⵜⴰⴱⵕⵍⴰⵎⴰⵏⵉⵜ ⵜⴰⵎⴰⵢⵏⵓⵜ ⴰⴷ ⵜⵣⵣⵔⵉ ⵜⵉⵕⵡⵉ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵜⵖⴰⵔⴰⵙⵜ ⵏ ⵢⴰⵏ ⵓⵎⵣⴰⵣⴰⵍ ⵏⴳⵔ ⵉⵡⵜⵜⴰⵙⵏ ⵉⵜⵜⴰⵡⵙⵔⴰⵙⵏ ⴷ ⵉⵎⴰⵙⵙⵏ ⵉⵜⵜⴰⵡⵙⵎⵔⴰⵙⵏ ⴷ ⵜⵏⵓⵟⵟⴰⴼ ⵉⵜⵜⴰⵡⵣⵣⴳⴰⵔⵏ. 

ⴰⵍⴰⵖⴰⴷ ⵏ ⵓⵙⵇⵙⵉ

ⵉⵥⴹⴰⵕ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵙ ⵓⵎⵙⴰⵙⴰ ⴷ ⵓⵎⴰⴳⵔⴰⴷ 106 ⵏ ⵓⴷⵓⵙⵜⵓⵔ ⴰⴷ ⵉⵙⵇⵙⴰ ⵜⴰⵏⴱⴰⴹⵜ ⵙ ⵜⵖⴰⵔⴰⵙⵜ ⵏ ⵓⵍⴰⵖⴰⴷ ⵍⵍⵉ ⵉⵙⴳⵎⴰⴹ, ⴳ ⵎⴰⴷ ⴰⴽⴽⵯ ⵉⴷⵔⵓⵙⵏ, ⵢⴰⵏ ⴳ ⵙⵎⵎⵓⵙ ⵏ ⵉⴳⵎⴰⵎⵏ ⵏⵏⵙ, ⴷ ⵓⵔ ⴰ ⴼⵍⵍⴰⵙ ⵉⵜⵜⴰⵡⵙⴽⴰⵔ ⵓⵙⵜⴰⵢ, ⴰⴽⵓⴷ ⵏⵏⴰ ⵣⵔⵉⵏ ⴽⵕⴰⴹ ⵓⵙⵙⴰⵏ ⵙⵎⴷⵏⵉⵏ ⵅⴼ ⵓⵙⵔⵙ ⵏⵏⵙ, ⵖⴰⵙ ⵙ ⵜⵓⴳⵜⵜ ⵉⴼⴰⵡⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ.

ⴰⵔ ⵉⵜⵜⴰⵣⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷⵖⵢⴰ, ⴰⴹⵕⵉⵚ ⵏ ⵓⵍⴰⵖⴰⴷ ⵏ ⵓⵙⵇⵙⵉ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵍⵍⵉ ⴷⴰⵔ ⵉⵙⵙⵎⵏⵉⴷ ⴳ ⵓⵣⵎⵣ ⵏ ⵚⴹⵉⵚ ⵓⵙⵙⴰⵏ ⵜⴰⵎⵔⴰⵔⵓⵜ ⵏ ⵜⵏⴱⴰⴹⵜ ⵎⵏⵉⴷ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⴹⴼⵓⵕ ⴷ ⵜⴰⵎⵔⴰⵔⵓⵜ ⴰⴷ ⵢⴰⵏ ⵓⵎⴹⴰⴽⴰⵕ ⵍⵍⵉ ⴷ ⵓⵔ ⵉⴹⴼⵓⵕ ⵓⵙⵜⴰⵢ.

3- ⵜⴰⴷⵉⴱⵍⵓⵎⴰⵙⵉⵜ ⵜⴰⴱⴰⵕⵍⴰⵎⴰⵏⵉⵜ

ⵜⴳⴰ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵍⵍⵉ ⵉⴳⴰⵏ ⵙⴳ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵢⴰⵏ ⵓⴼⵔⴷⵉⵙ ⴰⵏⴼⵔⴰⵔ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ.

ⵉⵙⴷⵓⵙ ⵓⴷⵓⵙⵜⵓⵔ ⵏ 2011 ⵙ ⵜⵖⴰⵔⴰⵙⵜ ⵜⴰⵎⴰⴷⴷⵓⴷⵜ ⵜⵉⵍⴰⵍⵜ ⵜⴰⵏⴼⵔⴰⵔⵜ ⵍⵍⵉ ⵉⵍⵍⴰⵏ ⴷⴰⵔ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴳ ⵓⴱⴰⵔⴰⵣ ⵏ ⵓⵎⵣⴰⵖ ⵅⴼ ⵜⵏⵓⴼⴰ ⵢⴰⵜⵜⵓⵢⵏ ⵏ ⵜⵎⴰⵣⵉⵔⵜ, ⵙ ⵜⵖⴰⵔⴰⵙⵜ ⵏ ⵡⴰⴷⴷⵓⵔ ⵍⵍⵉ ⴰⵙ ⵉⵜⵜⴰⵡⴼⴽⴰⵏ ⵃⵎⴰ ⴰⴷ ⵉⵙⴽⵔ ⵜⵉⵍⴰⵍⵜ ⵏⵏⵙ ⵉⵙⵎⴷⵏ ⴳ ⵉⵎⵢⴰⵙⵙⴰⵜⵏ ⵏⵏⵙ ⴷ ⵜⵓⴳⵜⵜ ⵏ ⵉⴱⵕⵍⴰⵎⴰⵏⵏ ⵏ ⵜⵎⵉⵣⴰⵔ ⵏ ⵓⵎⴰⴹⴰⵍ ⴷ ⵉⵎⴷⵔⴰⵡⵏ ⵉⵙⵜⵔⴰⵜⵉⵊⵉⵢⵏ ⴷ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ.

ⴰⵔ ⵜⴻⵜⵜⵉⵍⵉ ⵜⵡⵓⵔⵉ ⵜⴰⴷⵉⴱⵍⵓⵎⴰⵙⵉⵜ ⴳ ⵜⵓⴳⵜⵜ ⵏ ⵉⵎⵓⵙⵙⵓⵜⵏ ⴷ ⵜⵙⵏⵜⴰⵢⵉⵏ ⵏⵏⴰ ⵉⵜⵜⴳⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵓⵙⵡⵉⵔ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ ⵙ ⵜⵖⴰⵔⴰⵙⵜ ⵏ:

• ⴰⵙⵏⵎⴰⵍⴰ ⴷ ⵓⵙⵏⵓⴱⴳ ⵏ ⵉⵏⵎⵓⵇⵇⴰⵔⵏ ⵉⵙⴳⴰⵡⴰⵏⵏ ⴷ ⵉⵏⵎⵏⴰⴹⵏ ⴷ ⵉⴳⵔⴰⵖⵍⴰⵏⵏ ⴷ ⵜⵙⵓⵜⵍⵉⵏ ⵏ ⵜⵎⵓⵏⵉⵡⵉⵏ ⴷ ⵜⵎⵙⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵉⵏⴰⵡⵉⵏ ⴷ ⵜⵙⴰⵡⵔⵉⵏ ⵜⵉⵙⴳⵓⵎⴰⵏⵉⵏ;
• ⴰⵍⵜⴰⵖ ⴳ ⵜⵎⵓⵏⵉⵡⵉⵏ ⴷ ⵜⵎⵙⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⴷ ⵓⵍⵜⴰⵖ ⵉⵎⵙⴰⵙⴰⵏ ⴳ ⵜⵡⵓⵔⵉⵡⵉⵏ ⵏⵏⵙⵏ ⴷ ⵉⵎⵓⵙⵙⵓⵜⵏ ⵏⵏⵙⵏ ⴷ ⵓⵣⴷⴷⵓⵢ ⴳ ⵉⵎⵓⵙⵙⵓⵜⵏ ⴷ ⵉⵏⵎⵓⵇⵇⴰⵔⵏ ⵉⴳⵔⴰⵖⵍⴰⵏⵏ;
• ⴰⵍⵜⴰⵖ ⴳ ⵉⵥⴹⵡⴰⵏ ⴷ ⵜⴳⵔⵓⵎⵎⴰⵡⵉⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵜⴰⵏⵎⵏⴰⴹⵜ ⴷ ⵜⵙⴳⴰⵡⴰⵏⵜ ⴷ ⵜⴳⵔⴰⵖⵍⴰⵏⵜ;
• ⴰⵙⴽⴰⵔ ⵏ ⵉⵔⵣⴰⴼⵏ ⵏ ⵜⵡⵓⵔⵉ ⵉ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴷ ⵜⵎⵓⵏⵉⵡⵉⵏ ⴷ ⵜⵎⵙⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ;
• ⴰⵙⵏⵓⴱⴳ ⵏ ⵉⴽⴰⴱⴰⵕⵏ ⵉⴱⵕⵕⴰⵏⵉⵢⵏ ⴷ ⵓⵣⴷⴷⵓⵢ ⴷ ⵓⵏⵢⴰⵍⴽⴰⵎ ⴷ ⵓⵙⴽⴰⵔ ⵏ ⵉⵎⴹⴰⴽⴰⵕⵏ ⴰⴽⴷ ⵉⵎⵙⵜⴳⴳⴰⵔⵏ ⵓⵏⴱⵉⴹⵏ ⴷ ⵉⴱⵕⵍⴰⵎⴰⵏⵉⵢⵏ ⵙⴳ ⵜⵓⴳⴳⵜ ⵏ ⵜⵎⵉⵣⴰⵔ ⵏ ⵓⵎⴰⴹⴰⵍ;
• ⴰⵙⵎⵀⵍ ⵏ ⵜⴳⵔⵓⵎⵎⴰⵡⵉⵏ ⵏ ⵜⵉⴷⴷⵓⴽⴽⵍⴰ ⴷ ⵓⵎⵢⴰⵡⴰⵙ ⴷ ⵜⵎⵉⵣⴰⵔ ⵜⴰⵢⵜⵎⴰⵜⵉⵏ ⴷ ⵜⵎⴷⴷⵓⴽⴽⴰⵍ;
• ⴰⵙⵎⵀⵍ ⵏ ⵉⴳⵔⴰⵡⵏ ⵉⴱⵕⵍⴰⵎⴰⵏⵉⵢⵏ;
• ⵜⵓⵚⴽⴰ ⵏ ⵜⵎⴷⵔⴰⵡⵉⵏ ⴷ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵙ ⵜⵖⴰⵔⴰⵙⵜ ⵏ ⵉⵎⵢⴰⵙⵙⴰⵜⵏ ⵏⴳⵔ ⵉⴱⵕⵍⴰⵎⴰⵏⵏ ⴷ ⵜⵎⵢⴰⵇⵇⴰⵏⵉⵏ ⵏ ⵓⵎⵢⴰⵡⴰⵙ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ.