ⵀⴰ ⵏⵏ ⴰⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⴳⵏⵙⴰⵙⵜ ⵏ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ.
ⴷ ⵓⴱⵕⵍⴰⵎⴰⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ "ⴱⴰⵕⵍⴰⵜⵉⵏⵓ" ⵙ ⵜⴳⵏⵙⴰⵙⵜ ⵏ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⵕⵓⵍⴰⵏⴷⵓ ⴱⴰⵜⵔⵉⵙⵢⵓ ⴳⵓⵏⵣⴰⵍⵉⵙ.
ⴷ ⵓⴱⵕⵍⴰⵎⴰⵏ ⵏ ⵎⵉⵔⵉⴽⴰⵏ ⵜⴰⵏⴰⵎⵎⴰⵙⵜ "ⴱⴰⵕⵍⴰⵙⵉⵏ" ⵙ ⵜⴳⵏⵙⴰⵙⵜ ⵏ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⴽⴰⵕⵍⵓⵙ ⵀⵉⵕⵏⴰⵏⴷⵉⵣ ⴽⴰⵙⵜⵉⵢⵢⵓ
ⴷ ⵓⴱⵕⵍⴰⵎⴰⵏ ⵏ ⵎⴰⵕⴽⵓⵙⵓⵔ "ⴱⴰⵕⵍⴰⵙⵓⵔ" ⵙ ⵜⴳⵏⵙⴰⵙⵜ ⵏ ⵜⵏⵙⵙⵉⵅⴼⵜ ⵏⵏⵙ ⵎⴰⵙⵙⴰ ⴼⴰⴱⵢⴰⵏⴰ ⵎⴰⵔⵜⵏ.
ⴷ ⵓⴱⵕⵍⴰⵎⴰⵏ ⴰⵏⴷⵉⵏⵉ "ⴱⴰⵕⵍⴰⵏⴷⵉⵏⵓ", ⵙ ⵜⴳⵏⵙⴰⵙⵜ ⵏ ⵓⵏⵙⵙⵉⵅⴼ ⵏⵏⵙ ⵎⴰⵙⵙ ⴳⵓⵙⵜⴰⴼⵓ ⴱⴰⵜⵛⵉⴽⵓ.
ⵙ ⵓⴱⴷⴷⵉ ⵅⴼ:
ⵜⵉⵙⵇⵇⴰⵏ ⵏ ⵓⵏⵔⴰⵎⴰⵙ ⴷ ⵜⵉⴷⴷⵓⴽⴽⵯⵍⴰ ⴷ ⵓⵎⵢⴰⵡⴰⵙ ⵉⵍⵍⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⵉⴱⴷⴷⵏ ⵅⴼ ⵓⵎⵛⴰⵡⴰⵕ ⴷ ⵓⵣⵔⴰⴽ ⴰⵎⵢⴰⵖ.
ⴰⵏⵙⴰ ⴰⵊⵢⵓⵙⵜⵔⴰⵜⵉⵊⵉ ⴷ ⵓⴷⵖⴰⵔ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵏⵎⵉⵍⴰ ⵏⵏⵙ ⴰⵏⵎⵏⴰⴹ ⴷ ⵓⵙⴳⴰⵡⴰⵏ, ⵍⵍⵉⴳ ⵜⴳⴰ ⵢⴰⵏ ⵓⵎⵛⵛⵔⴽ ⴰⴷⵙⵍⴰⵏ ⴳ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ ⴷ ⵜⵡⵡⵓⵔⵜ ⵉⵜⵜⵓⴼⵍⵙⵏ ⵉⴷⵓⵙⵏ ⵖⵔ ⵉⵡⴰⵏⴽⵏ ⵏ ⵡⴰⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⵕⴰⴱ, ⵉ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ.
ⴰⵜⵉⴳ ⵏ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ ⵍⵍⵉⴳ ⴳⴰⵏ ⵢⴰⵏ ⵉⴳⵣⴷⵓ ⴰⴷⵎⵙⴰⵏ ⵉⵅⴰⵜⵔⵏ ⴳ ⵉⵡⴰⵏⴽⵏ ⵏ ⵢⵉⴼⴼⵓⵙ, ⴷ ⵜⵡⵡⵓⵔⵜ ⵜⴰⵙⵜⵔⴰⵜⵉⵊⵉⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵍⵓⵊⵙⵜⵉⵢⵉⵏ ⵉⵅⴰⵜⵔⵏ.
ⴰⵡⵜⵜⴰⵙ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵏⵎⵏⴰⴹⵉⵏ ⴷ ⵜⵙⴳⴰⵡⴰⵏⵉⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⴰⵡⴷ ⵎⵏⵏⴰⵡⵜ ⵜⵙⵏⵜⴰⵢⵉⵏ ⵉⵙⵙⵓⵔⵏ ⴰⴽⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵍⵍⵉⴳ ⵉⴳⴰ ⵢⴰⵏ ⵓⵎⵛⵛⵔⴽ ⵉⴱⵓⵖⵍⴰⵏ ⵖⵔ ⵜⵎⵓⵏⵉⵏ ⴰⴷ, ⴰⵀⴰ ⵉⴳⴰ ⵜⵉⵎⵔⵙⵍⵜ ⵉⵙⵎⵓⵏⴰⵏ ⵜⵉⵎⵉⵔⵉⵜ ⵏ ⵓⵙⴳⵔⴰⵡ ⴰⴱⵕⵍⴰⵎⴰⵏⵉ ⵏ ⵉⵡⴰⵏⴽⵏ ⵏ ⵡⴰⴼⵔⵉⵇⵢⴰ ⴷ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ "ⴰⴼⵕⵓⵍⴰⴽ", ⵜⴰⴼⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵙⵎⴰⴷ ⴰⵙⴳⴰⵡⴰⵏ ⴷ ⵜⴳⵎⵉ ⵜⴰⴷⵎⵙⴰⵏⵜ ⴷ ⵓⵏⵔⴰⵎⴰⵙ ⴰⴷⵍⵙⴰⵏ ⵏⴳⵔ ⵉⵡⴰⵏⴽⵏ ⵏ ⵢⵉⴼⴼⵓⵙ.
ⴰⴱⴷⴰⵔ ⵏ ⵜⵙⵏⵜⴰⵢⵜ ⵜⴰⵟⵍⴰⵏⵜⵉⵜ ⵜⴰⵎⵖⵔⴰⴱⵉⵜ ⵉⵡⴰⵜⵜⵙⵏ ⴰⵙⴷⵓⵙ ⵏ ⵡⴰⴷⴰⴼ ⵏ ⵜⵎⵉⵣⴰⵔ ⵏ ⵙⴰⵃⵉⵍ ⵖⵔ ⵓⴳⴰⵔⵓ ⴰⵟⵍⴰⵏⵜⵉ, ⵏⵏⴰ ⵉⵥⴹⴰⵕⵏ ⴰⴷ ⵜⵔⴰⵔ ⵜⴰⵎⵏⵉⴷⵜ ⵜⴰⵟⵍⴰⵏⵜⵉⵜ ⵏ ⵍⵎⵖⵔⵉⴱ ⴷ ⵜⵓⴷⴷⵎⴰ ⵏ ⵓⵙⴷⵓⵙ ⵏ ⵓⵣⴷⴰⵢ ⴰⵍⵓⵊⵉⵙⵜⵉ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ.
ⴰⵔ ⵙⵙⵓⵖⵓⵏⵏⵜ ⵜⴼⵓⵍⵉⵏ ⵙ ⵜⵡⵓⵔⵉ ⵇⴰⵃ ⵜⴰⴼⴰ ⴰⴷ ⵢⵉⵍⵉ:
1. ⴰⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵔⴰⵔⴰ ⵏ ⵜⵎⵓⵣⴰⵢⵉⵏ ⴳ ⵢⵉⴳⵔ ⵏ ⵜⵏⵏⵓⴱⴹⴰ ⴷ ⵜⴷⵉⵎⵓⵇⵕⴰⵟⵉⵜ ⴷ ⵜⴳⵎⵉ ⵜⴰⴷⵎⵙⴰⵏⵜ.
2. ⴰⵏⵏⴰⵍ ⵏ ⵓⵣⵣⴳⵉⵔ ⵏ ⵜⵙⵔⵜⴰⵢ ⵉⵡⴰⵜⵜⵙⵏ ⴰⵙⴷⵓⵙ ⵏ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵙⵓⵍⴰⵏⵜ ⴷ ⵓⵙⴷⵓⵙ ⵏ ⵓⵣⴷⴷⵓⵢ ⴷ ⵓⵎⵢⴰⵡⴰⵙ ⴷ ⵜⵡⵉⵙⵉ ⵏⴳⵔ ⵢⵉⴼⴼⵓⵙ ⴷ ⵢⵉⴼⴼⵓⵙ ⵏⴳⵔ ⵉⵡⴰⵏⴽⵏ ⵏ ⵡⴰⴼⵔⵉⵇⵢⴰ ⴷ ⵓⵎⴰⴹⴰⵍ ⴰⵄⵕⴰⴱ ⴷ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ ⴳ ⵉⵙⵡⵉⵔⵏ ⵉⵙⵉⵏⵉⵔⴰⵏⵏ ⴷ ⵓⵙⴷⵓⵙ ⵏ ⵡⴰⵎⵎⴰⴽⵏ ⵏ ⵓⵎⵢⴰⴷⴰⴼ ⴰⵙⴳⴰⵡⴰⵏ ⴷ ⵉⴱⵔⴷⴰⵏ ⵏ ⵓⵎⵢⴰⵡⴰⵙ ⴰⵏⴳⵔⴰⵏ ⵍⵓⵎⵎⵏ ⴳ ⵉⴳⵔⴰⵏ ⵉⵣⴷⵉⵏ ⴷ ⵓⴹⴰⴽⴰⵍ ⵏ ⵓⴱⴰⴹ ⴷ ⵜⴼⵍⵙⵜ ⵜⴰⵎⵙⴰⴷⵓⵔⵜ ⴷ ⵜⵓⵥⴹⵉⵕⵜ ⴷ ⵜⴷⵓⵙⴰⵏⵜ ⴷ ⵓⵎⵎⵙⴽⴰⵍ ⴰⴷⵎⵙⴰⵏ ⴷ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵣⴷⴷⵓⵢ ⴷ ⵓⵎⵛⴰⵡⴰⵕ ⴰⵙⵓⵍⴰⵏ ⴳ ⵉⵙⵓⵔⴰ ⵉⵎⵔⵙⴰⵍⵏ ⵉⵎⵖⵍⴰⵍⵏ.
3. ⴰⵖⵓⵔⵉ ⵅⴼ ⵓⵙⵔⵓⵙ ⵏ ⵜⴷⴰⴱⵓⵜⵉⵏ ⵏ ⵓⵎⵎⵙⴽⴰⵍ ⴰⵙⵖⵏⵣⵉ ⴷ ⵓⴷⵍⵙⴰⵏ, ⴷ ⵓⵙⴷⵓⵙ ⵏ ⵜⵥⵉⴹⴰⵕ ⵏ ⵉⴳⵔⴰⵏ ⵏ ⵓⴼⴰⵔⵙ ⴳ ⵙⵏⴰⵜ ⵜⵎⵏⴰⴹⵉⵏ.
4. ⵜⴰⵡⵓⵔⵉ ⵉⵙⵙⵓⵔⵏ ⵅⴼ ⵓⵎⵢⴰⵡⴰⵙ ⴰⵏⴳⵔⴰⵙⴳⴰⵡⴰⵏ ⴰⴷⵎⵙⴰⵏ ⴰⵙⵓⵍⴰⵏ, ⵏⵏⴰ ⵉⴱⵣⵣⵔⵏ ⴳ ⵜⵏⴰⴼⵓⵜ ⵏ ⵜⵓⵚⴽⴰ ⵏ ⵓⵎⴰⴹⴰⵍ ⵉⵍⴰⵏ ⵜⴰⵣⵔⴼⵜ ⴷ ⵓⵎⵙⴰⵙⴰ.
ⴰⵔ ⵜⵜⴱⵔⵔⴰⵃⵏⵜ ⵜⴼⵓⵍⵉⵏ ⵜⵉⵎⵙⴳⵎⴰⴹⵉⵏ:
ⴰⵙⵔⵓⵙ ⵏ "ⵓⵙⴳⵔⴰⵡ ⴰⴱⵕⵍⴰⵎⴰⵏⵉ ⴰⴷⵎⵙⴰⵏ ⵍⵎⵖⵔⵉⴱ-ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ", ⴰⵎ ⵢⴰⵜ ⵜⵙⵏⵜⴰⵢⵜ ⵉⵙⴰⴷⵎⵔⵏ ⵉ ⵡⴰⵙⵙⴰⵔ ⵏ ⵓⵙⵎⵖⵔ ⵏ ⵜⵙⵇⵇⴰⵏ ⴰⴷ ⵜⵉⵙⵜⵔⴰⵜⵉⵊⵉⵢⵉⵏ, ⴷ ⵓⵙⴽⴰⵔ ⵏ ⵢⴰⵏ ⵓⵙⴰⵢⵔⴰⵔ ⴰⵎⵔⵙⴰⵍ ⴰⵎⴰⴷⴷⵓⴷ ⴷ ⵓⵎⵖⵍⴰⵍ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵏⴳⵔ-ⴰⵙⴳⴰⵡⴰⵏ ⵏⵏⴰ ⵉⵥⴹⴰⵕⵏ ⴰⴷ ⵉⵙⴷⵓⵙ ⴰⵎⵢⴰⵡⴰⵙ ⴷ ⵜⵡⵓⵔⵉ ⵉⵙⵙⵓⵔⵏ ⴳ ⵜⵖⴰⵡⵙⵉⵡⵉⵏ ⵉⵍⴰⵏ ⴰⴽⴰⵎⴷ ⴰⵎⴰⵣⴰⵔ.
ⵉⴳⴰ ⵓⵡⵜⵜⴰⵙ ⴰⴷⵙⵍⴰⵏ ⵏ ⵓⵙⴳⵔⴰⵡ ⴰⴷ ⴰⵙⴷⵓⵙ ⵏ ⵜⵙⵇⵇⵏⵜ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵉⴳⵔⴰⵏ ⴰⵎ ⵜⵙⵖⵏⵣⵉⵜ ⴷ ⵜⵏⴰⴳⵔⵉⵜ ⵜⴰⵙⴳⴰⵡⴰⵏⵜ ⴷ ⵓⵙⴷⵓⵙ ⴷ ⵜⵙⵓⵍⵜ ⵏ ⵜⵙⵔⵜⴰⵢ ⵏ ⵜⴳⵎⵉ ⵉⵙⵎⴷⵏ.
ⵙ ⵓⵙⴳⵎⴹ ⵏ ⵜⵎⵙⵙⴽⵜⵉⵜ ⴰⴷ, ⴰⵔ ⵙⴷⴷⵉⴷⵏⵜ ⵜⴼⵓⵍⵉⵏ ⴰⵙⵖⵓⵏ ⵏⵏⵙⵏⵜ ⵙ ⵓⴱⵣⴰⵔ ⵙ ⵜⵕⵡⵉ ⴳ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴰⵏⴳⵔⴰⵙⴳⴰⵡⴰⵏ ⵉⴷⵓⵙⵏ ⵉⵍⴰⵏ ⵜⵓⵙⵓⵔⵜ ⵜⴰⵎⵖⵍⴰⵍⵜ, ⵏⵏⴰ ⵔⴰⴷ ⵉⴼⴽ, ⵓⵔ ⴷ ⵖⴰⵙ ⵜⴰⵏⴼⴰ ⵉ ⵜⴷⴰⵎⵙⵉⵡⵉⵏ ⵏ ⵉⵡⴰⵏⴽⵏ ⵏⵏⵙⵏ, ⵎⴰⵛⴰ ⴰⵡⴷ ⴰⴷ ⵢⵉⵍⵉ ⵓⵙⴷⵓⵙ ⵏ ⵢⴰⵏ ⵓⵎⴰⴹⴰⵍ ⵉⵙⵓⵍⵏ ⵉⵍⴰⵏ ⵜⴰⵣⵔⴼⵜ.
ⵉⵜⵜⴰⵡⵙⴳⵎⴰⴹ ⴳ ⵜⵙⴷⵍⵉⵙⵜ ⵏ ⵓⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴳ ⵜⵎⴰⵥⵓⵏⵜ ⵏ ⵜⴳⴷⵓⴷⴰⵏⵜ ⵏ ⴱⴰⵏⴰⵎⴰ ⴳ ⵙⵏⴰⵜ ⵜⵓⵏⵖⵉⵍⵉⵏ ⵙ ⵢⴰⵜ ⵜⵍⵖⴰ ⵜⵓⵍⴳⵉⵏⵜ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵜⵚⴱⵍⵢⵓⵍⵉⵜ, ⴳ ⵡⴰⵙⵙ ⵏ 04 ⴷⵓⵊⴰⵏⴱⵉⵔ 2024.
ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ
ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵎⵉⵔⵉⴽⴰⵏ ⵜⴰⵏⴰⵎⵎⴰⵙⵜ ⵜⴰⵏⵙⵙⵉⵅⴼⵜ ⵏ ⵓⴱⵕⵍⴰⵎⴰⵏ ⵏ ⵎⴰⵕⴽⵓⵙⵓⵔ
ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⵏⴷⵉⵏⵉ