ⵜⵉⵙⵏⵙⵉ ⵏ ⵉⵣⵔⴼⴰⵏ ⵏ ⵜⵓⵣⵍⵜ

ⴰⵔ ⵢⴰⴽⴽⴰ ⵓⴷⵓⵙⵜⵓⵔ ⵉ ⵜⵓⵣⵍⵜ ⵜⴰⴱⵕⵍⴰⵎⴰⵏⵉⵜ ⵢⴰⵏ ⵡⴰⴷⴷⵓⵔ ⵍⵍⵉ ⴰⵙ ⵢⴰⴽⴽⴰⵏ ⵉⵣⵔⴼⴰⵏ, ⵍⵍⵉ ⵉⵥⴹⴰⵕⵏ ⴰⴷ ⵜⵜ ⴰⵊⵊⵉⵏ ⴰⴷ ⵜⵏⴽⵔ ⵙ ⵜⵡⵓⵔⵉⵡⵉⵏ ⵏⵏⵙ, ⵙ ⵜⵖⴰⵔⴰⵙⵜ ⴰⴽⴽⵯ ⵉⵙⵎⴷⵏ ⴳ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⴷ ⵜⵓⴷⵔⵜ ⵜⴰⵙⵔⵜⴰⵏⵜ.

ⴰⵡⴷ ⵙ ⵓⵎⵙⴰⵙⴰ ⴷ ⵓⵎⵏⵏⵉ 85 ⵏ ⵓⵙⵍⴳⵏ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⵀⴰ ⵏⵏ ⵉⵅⵚⵚⴰ ⵉ ⵜⵔⵓⴱⴱⴰ ⴷ ⵜⴳⵔⵓⵎⵎⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵏⵏⴰ ⵉⵙⵜⵉⵏ ⴰⴷ ⵉⵍⵉⵏⵜ ⴳ ⵜⵓⵣⵍⵜ, ⴰⴷ ⵙⵙⴳⵓⵔⵉⵏⵜ ⵙ ⵓⵢⵏⵏⴰ ⵙ ⵜⵉⵔⵔⴰ ⵖⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴳ ⵜⵉⵣⵡⵉⵔⴰ ⵏ ⵜⵉⵣⵉ ⵜⴰⵏⵎⵓⵔⴰⵢⵜ ⴰⵡⴷ ⴳ ⵓⵣⴳⵏ ⵏⵏⵙ.

ⵙ ⵓⴽⴰⵎⴷ ⵏ ⵜⵏⴼⴰⵍⵉⵜ ⵏ ⵓⵙⵇⵇⵉⵎ, ⵓⵔ ⴷ ⵢⵓⵙⵉ ⴷⵉ ⵇⴰⵃ ⴰⴷⴷⴰⴷⵏ ⴰⴷ ⵉⵍⵉⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵏⵏⴰ ⵓⵔ ⵉⵙⵜⵉⵏ ⴰⴷ ⴹⴼⴰⵕⵏⵜ ⵉ ⵜⵓⵣⵍⵜ ⵙ ⵜⵖⴰⵔⴰⵙⵜ ⵜⴰⵙⴼⴼⵏⵥⴰⵢⵜ, ⴹⴼⴰⵕⵏⵜ ⵉ ⵜⵓⴳⵜⵜ.

ⵙ ⵡⴰⴱⴷⴰ, ⵉⵣⵔⵉ ⵡⵓⴽⵓⵙ ⵏ ⵜⵙⴳⵓⵔⵉ ⵏⵏⴰ ⵉⵜⵜⴰⵡⴱⴷⴰⵔⵏ ⴳ ⵓⴼⵍⵍⴰ ⵙ ⵜⵉⵔⵔⴰ.

ⴰⵔ ⵜⵜⴰⵡⴼⵙⴰⵔⵏⵜ ⵜⵙⴳⵓⵔⵉⵡⵉⵏ ⵉⵜⵜⴰⵡⴱⴷⴰⵔⵏ ⴷ ⵓⵙⵏⴼⵍ ⵏⵏⵙⵏⵜ ⴳ <56>ⵓⵖⵎⵉⵙ ⴰⵎⴰⴷⴷⵓⴷ ⵏ ⵓⴱⵕⵍⴰⵎⴰⵏ</56>.

ⴰⵔ ⵣⵣⵉⴳⵉⵣⵏ ⵉⵙⴱⴷⴰⴷⵏ ⴰⴷ ⵅⴼ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉⵔⴳⵎⴰⵎⵏ.

ⴰⵔ ⵜⵙⴽⴰⵔ ⵜⵓⵣⵍⵜ ⴰⴷ ⵉⵣⵔⴼⴰⵏ ⵏⵏⵙ ⵉⴷⵙⵜⴰⵔⵏ, ⵙ ⵜⵖⴰⵔⴰⵙⵜ ⵏ:

1- ⴰⴷⵔⴰⵡ ⴳ ⵜⵙⵖⵏⵜ ⵜⵓⵣⵔⵉⴼⵜ, ⵙⵍⴰⵡⴰⵏ ⴰⴽⴽⵯ ⵙ:

• ⴰⵔ ⵉⵜⵜⴰⵡⵥⵍⴰⵢ ⵢⴰⵏ ⵡⴰⵙⵙ ⵙ ⵎⴰⴷ ⵉⴷⵔⵓⵙ ⴳ ⵡⴰⵢⵢⵓⵔ ⵙ ⵓⵎⵙⴰⵙⴰ ⴷ ⵓⵎⴰⴳⵔⴰⴷ 82 ⵏ ⵓⴷⵓⵙⵜⵓⵔ, ⵙ ⵜⵖⵔⵉ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ, ⵣⵣⵉⴳⵙⵏⵜ ⵜⵏⵏⴰ ⵉⵜⵜⴰⵡⵙⵎⵏⵉⴷⵏ ⵙⴳ ⵜⵏⵉⵍⴰ ⵏ ⵜⵓⵣⵍⵜ.
• ⴰⵣⵎⵎⴻⵎ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⴳ ⵜⴼⵍⵡⵉⵜ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ, ⴰⵀⴰ ⴰⴷ ⵜⵙⵙⵓⵜⵔ ⵢⴰⵜ ⵜⵔⴰⴱⴱⵓⵜ ⵙⴳ ⵜⵓⵣⵍⵜ ⴰⴷ ⵜⴻⵜⵜⴰⵡⵣⵎⵎⴰⵎ ⵢⴰⵜ ⵜⵙⵓⵎⵔⵜ ⵏ ⵓⵙⵍⴳⵏ ⵏⵉⵖ ⵓⴳⴰⵔ ⴳ ⵜⴼⵍⵡⵉⵜ ⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ, ⴷⴼⴼⵉⵔ ⵏ ⵓⵙⵎⴰⴷ ⵏ ⵉⵣⵎⴰⵣ ⵉⵜⵜⴰⵡⴱⴷⴰⵔⵏ ⴳ ⵓⵏⴳⵔⴰⵡ ⴰⴳⵯⵏⵙⴰⵏ;
• ⴰⵥⵍⴰⵢ ⵏ ⵢⴰⵜ ⵜⵉⵣⵉ ⴳ ⵙⵎⵎⵓⵙⵜ ⵏ ⵜⵓⵙⴷⵉⴷⵉⵏ ⴳ ⵎⴰⴷ ⵉⴷⵔⵓⵙ ⵉ ⵓⵙⵎⵏⵉⴷ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⵉⵜⵜⴰⵡⵙⵎⵏⵉⴷⵏ ⵙⴳ ⵜⵏⵉⵍⴰ ⵏ ⵢⴰⵜ ⵜⵔⴰⴱⴱⵓⵜ ⵙⴳ ⵜⵓⵣⵍⵜ, ⴷ ⵓⵢⵏⵏⴰ ⴳ ⵜⵉⵣⵡⵉⵔⴰ ⵏ ⵜⴳⵉⵡⵔⵜ ⵉⵜⵜⴰⵡⵥⵍⴰⵢⵏ ⵙ ⵜⵖⵔⵉ ⵏ ⵜⵙⵓⵎⴰⵔ ⵏ ⵉⵙⵍⴳⵏⵏ ⵙ ⵓⵎⵙⴰⵙⴰ ⴷ ⵓⴳⵟⵟⵓⵎ ⵡⵉⵙ ⵙⵉⵏ ⵙⴳ ⵓⵎⴰⴳⵔⴰⴷ 82 ⵏ ⵓⴷⵓⵙⵜⵓⵔ;
• ⴰⵙⵎⵏⵉⴷ ⵏ ⵉⵙⴳⴳⴷⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰⵡⵉⵏ ⵏ ⵜⵓⵣⵍⵜ ⵙ ⵓⵙⵉⵣⵡⵔ ⴳ ⵜⴳⵉⵡⵔⵉⵏ ⵜⵉⵎⴰⵜⴰⵢⵉⵏ ⵜⵓⵣⵔⵉⴼⵉⵏ.

2- ⴰⴷⵔⴰⵡ ⴳ ⵜⵙⵖⵏⵜ ⵏ ⵜⵉⴹⴰⴼ, ⴷ ⵓⵢⵏⵏⴰ ⵙ:

• ⴰⵥⵍⴰⵢ ⵏ ⵢⴰⵏ ⵓⵙⵖⵍ ⵙⴳ ⵉⵙⵇⵙⵉⵜⵏ ⵉⵎⵉⵡⴰⵏⵏ ⴰⵢⵢⵓⵔⴰⵏⵏ ⴷ ⵉⵏⵎⵍⴰⵙⵙⵏ ⵉ ⵓⵢⵏⵏⴰ, ⴰⵀⴰ ⵓⵔ ⵉⵜⵜⴷⵔⵓⵙ ⵅⴼ ⵓⵙⵖⵍ ⵏ ⵜⴳⵏⵙⴰⵙⵜ ⵏⵏⵙ.
• ⴰⵙⵓⵎⵔ ⴽⵓⴷⵏⵏⴰ ⴷ ⵉⵇⵇⴰⵏ ⵅⴼ ⵓⵙⵉⵔⴰ ⵏ ⵓⵙⵇⵇⵉⵎ ⴹⴰⵕⵜ ⵏ ⵓⵙⵎⴰⴷ ⵏ ⴽⵕⴰⴹ ⵏ ⵓⵙⵙⴰⵏ ⵅⴼ ⵓⵙⵔⵓⵙ ⵏ ⵢⴰⵏ ⵓⵍⴰⵖⴰⴷ ⵏ ⵓⵙⵇⵙⵉ ⵏ ⵜⵏⴱⴰⴹⵜ ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 106 ⵏ ⵓⴷⵓⵙⵜⵓⵔ, ⴰⵙⴰⴽⵓⴷ ⵏ ⵓⵙⵏⵎⴰⵍⴰ ⵏ ⵜⴳⵉⵡⵔⵜ ⵏ ⵓⵙⵜⴰⵢ ⵏⵏⵙ, ⴷ ⵜⵉⵣⵉ ⵏⵏⵙ ⵉⵖ ⵉⵍⵍⴰ ⵓⵎⵙⴰⵙⴰ ⵅⴼ ⵓⵍⴰⵖⴰⴷ ⵙ ⵜⵓⴳⵜⵜ ⵉⴼⴰⵡⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ.

3- ⴰⵙⵎⴷⵢⴰ ⴳ ⵡⴰⵍⵍⴰⵍⵏ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵙ:

• ⴰⵥⵍⴰⵢ ⵏ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵜⵓⵣⵍⵜ, ⵏⵏⴰ ⵓⵔ ⵉⵥⴹⴰⵕⵏ ⴰⴷ ⵜⵉⵍⵉ ⵜⵎⵏⴽⴷⵜ ⵉ ⵜⵏⵙⵙⵉⵅⴼⵜ ⵏⵏⵙ ⵖⴰⵙ ⵉ ⵢⴰⵜ ⵜⵎⵛⵛⵉⵡⵕⵜ ⵏⵉⵖ ⴰⵎⵛⵛⵉⵡⵕ ⵣⵣⵉⴳⵙ, ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 69 ⵏ ⵓⴷⵓⵙⵜⵓⵔ, ⴷ ⵓⵎⵏⵏⵉ 99 ⵙⴳ ⵓⵙⵍⴳⵏ ⴰⴷ ⴰⴳⵯⵏⵙⴰⵏ;
• ⴰⵥⵍⴰⵢ ⵏ ⵓⴷⵖⴰⵔ ⵏ ⵓⵏⵙⵙⵉⵅⴼ ⵏⵉⵖ ⴰⵏⵖⵜⴰⵙ ⴳ ⵇⴰⵃ ⵜⵉⵙⵇⵇⵉⵎⵉⵏ ⵜⴰⵔⵙⵓⵍⴰⵏⵉⵏ ⵉ ⵜⵓⵣⵍⵜ, ⵉⵖ ⴳⴰⵏⵜ ⵜⵉⵙⵇⵇⵉⵎⵉⵏ ⵜⵉⵏⵎⵓⵔⴰⵢⵉⵏ ⵏ ⵓⵙⴰⴳⴳⵯ, ⵏⵉⵖ ⵜⵉⴳⵔⵓⵎⵎⴰⵡⵉⵏ ⵜⵉⵙⴳⵓⵎⴰⵏⵉⵏ ⵏ ⵜⵡⵓⵔⵉ, ⵏⵉⵖ ⵜⵉⴳⵔⵓⵎⵎⴰⵡⵉⵏ ⵏ ⵓⵙⴰⴳⴳⵯ, ⵏⵉⵖ ⵜⴰⵙⵇⵇⵉⵎⵜ ⵏ ⵜⵉⴹⴰⴼ ⵏ ⵓⵙⵓⴼⵖ ⵏ ⵜⵎⵙⴰⵙⵜⵍⵜ ⵏ ⵓⵙⵇⵇⵉⵎ.
• ⴰⵔ ⵉⵜⵜⵎⵎⵓⵛ ⵉ ⵜⵓⵣⵍⵜ ⴰⵙⵉⵣⵡⵔ ⴳ ⵓⵙⵜⴰⵢ ⵙⴳ ⵙⵉⵏ ⵉⴷⵖⴰⵔⵏ ⵉⵜⵜⴰⵡⴱⴷⴰⵔⵏ, ⴰⵀⴰ ⵓⵔ ⵉⵅⵚⵚⴰ ⴰⴷ ⵜⵉⵍⵉ ⵜⵎⵏⴽⴷⵜ ⵉ ⵓⴷⵖⴰⵔ ⵏⵏⴰ ⵉⵜⵜⴰⵡⵙⵜⴰⵢⵓⵏ ⵖⴰⵙ ⵉ ⵢⴰⵏ ⵓⴳⵎⴰⵎ ⵏⵏⵙ.
• ⴰⵙⵎⴷⵢⴰ ⵏ ⵜⵔⵓⴱⴱⴰ ⵏ ⵜⵓⵣⵍⵜ ⴳ ⵜⵙⵇⵇⵉⵎⵉⵏ ⵜⴰⵔⵙⵓⵍⴰⵏⵉⵏ, ⴰⵡⴷ ⴳ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⵏⵏⵉ 334 ⵏ ⵓⵏⴳⵔⴰⵡ ⴰⴳⵯⵏⵙⴰⵏ.
• ⴰⴱⵣⴰⵔ ⵏ ⵜⵓⵣⵍⵜ ⴳ ⵓⵙⵓⵎⵔ ⵏ ⵉⵎⵏⴽⴰⴷⵏ ⴰⵡⴷ ⴳ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵜⵙⵏⴱⴹⴰⵢⵜ ⵜⴰⴷⵙⵜⴰⵔⵜ, ⴷ ⵓⵢⵏⵏⴰ ⵙ ⵓⵎⵙⴰⵙⴰ ⴷ ⵜⵎⴰⵎⴽⵉⵏ ⵉⵜⵜⴰⵡⴱⴷⴰⵔⵏ ⴳ ⵓⵎⵏⵏⵉ 341 ⴷ 342 ⵏ ⵓⵏⴳⵔⴰⵡ ⴰⴳⵯⵏⵙⴰⵏ.
• ⴰⵙⵎⵏⵉⴷ ⵏ ⵜⵙⵓⵎⴰⵔ ⵉ ⵓⵙⵉⵔⴰ ⵏ ⵓⵙⵇⵇⵉⵎ ⴽⵓⴷⵏⵏⴰ ⴷ ⵉⵇⵇⴰⵏ ⵃⵎⴰ ⴰⴷ ⵜⴷⵓⵙ ⵜⵉⵍⴰⵍⵜ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ.

ⴷ ⴰⵔ ⵜⴱⵣⵣⵔ ⵜⵓⵣⵍⵜ ⴳ ⵇⴰⵃ ⵜⵉⵣⵓⵏⴰ ⵜⵉⴱⵕⵍⴰⵎⴰⵏⵉⵢⵉⵏ ⵙ ⵢⴰⵏ ⵓⵙⵖⵍ ⵓⵔ ⵉⴷⵔⵓⵙⵏ ⵅⴼ ⵜⴳⵏⵙⴰⵙⵜ ⵏⵏⵙ, ⵢⵉⵍⵉ ⵓⴽⴰⵎⴷ ⵏ ⵜⵉⵍⵉⵜ ⵏⵏⵙ ⴳ ⵓⵙⵙⵓⵏⵛⴽ ⵏ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵏ ⴳ ⵜⵙⵎⵉⴳⴰⵍ ⵏ ⴱⵕⵕⴰ.

ⵃⵎⴰ ⴰⴷ ⵜⵙⴽⵔ ⵜⵉⵙⵎⵉⴳⴰⵍ ⵏⵏⵙ ⵜⵉⴷⵙⵜⴰⵔⵉⵏ, ⵀⴰ ⵏⵏ ⵜⵓⵣⵍⵜ ⵜⴰⴱⵕⵍⴰⵎⴰⵏⵉⵜ ⵖⵔⵙ ⴰⵣⵔⴼ ⴰⴷ ⵜⴰⵎⵥ ⵜⵉⵣⵎⵎⴰⵔ ⵜⵉⴽⵎⴰⵎⵉⵏ ⴷ ⵜⵏⴼⴳⴰⵏⵉⵏ ⵜⴰⴼⴰ ⴰⴷ ⵜⵏⴽⵔ ⵙ ⵜⵙⵎⵉⴳⴰⵍ ⵏⵏⵙ ⴰⵎ ⵜⵙⵖⵣⴰⵏ ⴷ ⵜⵎⵓⵣⴰⵢⵉⵏ ⴷ ⵉⵙⴰⵢⵔⴰⵔⵏ ⵏ ⵓⵙⵡⵓⵔⵉ ⵙ ⵓⴽⴰⵎⴷ ⵏ ⵉⵙⴱⴷⴰⴷⵏ ⵏ ⵓⵎⵏⵏⵉ 52 ⵏ ⵓⵏⴳⵔⴰⵡ ⴰⴳⵯⵏⵙⴰⵏ

ⵉⵇⵇⴰⵏ ⴷ ⴰⴷ ⵉⵜⵜⴰⵡⴱⴷⴰⵔⵏ ⵉⵖ ⵜⵙⵏⴼⵍ ⴽⵔⴰⵢⴳⴰⵜⵜ ⵜⴰⵔⴰⴱⴱⵓⵜ ⵏⵉⵖ ⵜⴰⴳⵔⵓⵎⵎⴰ ⵜⴰⴱⵕⵍⴰⵎⴰⵏⵉⵜ ⵜⴰⴳⵯⵎⴰⵏⵉⵜ ⵉ ⵜⵓⵣⵍⵜ, ⴰⵔ ⵜⵜⴽⴽⵙⵏ ⵉⴷⵖⴰⵔⵏ ⵏ ⵜⵎⵙⵜⴳⴳⴰⵔⵜ ⵏⵏⴰ ⵜⵏ ⵓⵎⵥⵏ ⵉⴳⵎⴰⵎⵏ ⵏⵏⴰ ⴰⵙ ⵉⴹⴼⴰⵕⵏ ⵙ ⵓⴼⵔⵉⵙ ⴰⴷ.