ⵙ ⵢⵉⵙⵎ ⵏ ⵕⴱⴱⵉ ⴱⵓ ⵜⵎⵍⵍⴰ ⴰⵎⵙⵎⵓⵍⵍⵓ
ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ;
ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⴳⴷⵓⴷⴰⵏⵜ ⵏ ⵛⵛⵉⵍⵉ;
ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⵏⴷⵉⵏⵉ;
ⵉⴷ ⵎⴰⵙⵙ ⵉⵎⴰⵡⵙⴰⵙⵏ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵏ ⵜⴳⴷⵓⴷⴰⵏⵜ ⵏ ⵛⵛⵉⵍⵉ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵙⵡⵉⵏⴳⵉⵎⵏ ⴷ ⵉⵎⵓⵣⴰⵢⵏ ⴷ ⵉⴽⴰⴷⵉⵎⵉⵢⵏ;
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵏⵙⴰⵙⵏ ⵏ ⵉⵎⴰⵙⵙⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵏ ⵓⵙⵏⵖⵎⵙ;
ⴰⴳⴷⵓⴷ ⴰⵏⵍⵓⵎⵎⵜ,
ⴰⵣⵓⵍ ⴼⵍⵍⴰⵡⵏ ⴷ ⵜⵎⵍⵍⴰ ⵏ ⵕⴱⴱⵉ ⴷ ⵜⵎⴰⵅⵉⵔⵉⵏ ⵏⵏⵙ
ⵎⵎⵔⵖ ⴰⴷ ⴽⵯⵏ ⵙⵏⵓⴱⴳⵖ ⴳ ⵓⵏⵎⵓⵇⵇⴰⵔ ⴰⴷ ⴰⵡⵏⴳⵉⵎ ⴷ ⵜⵎⵙⴰⵔⵜ ⵜⴰⴳⵔⴰⵖⵍⴰⵏⵜ ⵉⵀⵢⵢⴰⵏ, ⵏⵏⴰ ⵉⵙⵎⵓⵏⴰⵏ ⵜⵓⴳⵜⵜ ⵏ ⵉⵏⴱⴷⴰⴷⵏ ⵏ ⵜⵓⴼⵔⵉⵏⵉⵏ ⵜⵉⵙⵔⵜⴰⵏⵉⵏ ⴷ ⵜⴽⴰⴷⵉⵎⵉⵢⵉⵏ, ⵏⵏⴰ ⴳ ⵍⵍⴰⵏ ⵉⵎⵔⵣⵓⵜⵏ ⴷ ⵉⵎⴳⴳⴰⵢⵏ ⴷ ⵉⵎⵥⵍⴰⵢⵏ, ⵙⴳ ⵎⵏⵏⴰⵡⵜ ⵜⵙⴳⵉⵡⵉⵏ ⵏ ⵓⵎⴰⴹⴰⵍ, ⵜⴰⴼⴰ ⴰⴷ ⵏⵙⵡⵉⵏⴳⵎ ⵎⵍⵉⵃ ⴳ ⵉⵎⴰⵍ ⵏ ⵜⴼⴳⴰⵏⵜ ⴷ ⵓⵙⴱⴷⴷⵉ ⵏ ⵜⵏⵥⴰⵕ ⵏⵏⵙ ⵜⵉⵎⵇⵔⴰⵏⵉⵏ, ⵙⴳ ⵜⵏⵉⵍⴰⵡⵉⵏ ⴷ ⵜⵎⵢⴰⴷⴰⵙⵉⵏ ⵜⵉⵎⴰⵙⵙⴰⵏⵉⵏ ⵉⵎⵢⴰⵏⴰⵡⵏ ⵉⴳⴳⵓⵜⵏ.
ⵉⴳⴰ ⴰⵖ ⴰⴱⵓⵔⵣ, ⴰⴷ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵙⵓⵜⵍⵜ ⴰⴷ ⵏ "ⵓⴳⵔⴰⵡ ⵏ ⵉⵎⴰⵍ", ⵍⵍⵉⴳ ⵜⴳⴰ ⵜⴰⵙⵓⵜⵍⵜ ⵜⴰⵎⵣⵡⴰⵔⵓⵜ ⵉⵜⵜⵓⵙⵏⵎⴰⵍⴰⵏ ⴱⵕⵕⴰ ⵏ ⵜⴳⴷⵓⴷⴰⵏⵜ ⵏ ⵛⵛⵉⵍⵉ ⴷ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ.
ⵓⵔ ⴳⵉⵙ ⵜⵓⵔⴷⴰ, ⵎⴰⵙ ⵉⵍⴰ ⵓⵢⵏⵏⴰ ⵉⵏⵓⵎⴰⴽ ⵏⵏⵙ ⵏ ⵉⵏⵉⴳⵍ ⵉⴷⵓⵙⵏ, ⵍⵍⵉⴳ ⵉⴳⴰ ⴰⵙⴷⴷⵉⴷ ⵏ ⵓⴷⵖⴰⵔ ⵉⵣⵡⴰⵔⵏ ⴷ ⵜⵎⵢⵉⵎⴰⵏⵜ ⵉⵍⵍⴰⵏ ⵖⵔ ⵜⵎⴰⵣⵉⵔⵜ ⵏⵏⵖ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⵙⴳⴰⵡⴰⵏ, ⴷⴷⵓ ⵏ ⵜⵏⴰⵔⴰ ⵜⴰⵎⵉⵖⵉⵙⵜ ⴷ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ.
ⴰⵔ ⵉⵎⵎⴰⵍ ⵙⴳ ⵜⵙⴳⴰ ⵢⴰⴹⵏ, ⴰⴳⴳⴰⴹ ⵏ ⵜⵙⵇⵇⴰⵏ ⵉⵖⵓⴷⴰⵏ ⵉⵇⴱⵓⵔⵏ ⵉⵙⵎⵓⵏⴰⵏ ⵙⵏⴰⵜ ⵜⵎⵉⵣⴰⵔ ⵏⵏⵖ ⵜⵉⵎⴷⴷⵓⴽⴽⴰⵍ, ⵍⵎⵖⵔⵉⴱ ⴷ ⵛⵛⵉⵍⵉ, ⵙⴳ ⵡⴰⵜⵜⴰⵢⵏ ⵏ 64 ⵏ ⵓⵙⴳⴳⵯⴰⵙ ⵅⴼ ⵜⵓⴳⵉ ⵏ ⵜⵙⵇⵇⴰⵏ ⵏⵏⵖ ⵜⵉⴷⵉⴱⵍⵓⵎⴰⵙⵉⵢⵉⵏ ⵏⵏⴰ ⵉⵣⵔⵉⵏ ⴰⵙⵙ ⴰⴷ ⴰⴳⵏⴰⵔ (20) ⵏ ⵓⵙⴳⴳⵯⴰⵙ ⵅⴼ ⵓⵔⵣⴰⴼ ⴰⵎⵣⵔⴰⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵀⴹⵓ ⵕⴱⴱⵉ ⵖⵔ ⵜⵎⴰⵣⵉⵔⵜ ⴰⴷ ⵜⴰⵎⴷⴷⴰⴽⴽⵯⵍⵜ.
ⴳⴰⵏⵜ ⵜⵉⵙⵇⵇⴰⵏ ⵏ ⵜⵉⴷⴷⵓⴽⵍⴰ ⵉⴷⵓⵙⵏ ⵉⵕⵚⵚⴰⵏ, ⵉⴷⵓⵙⵏ ⵙ ⵜⵉⵔⴰⵜ ⴷ ⵜⴽⴰⵢⵍⴰⵍⵜ ⵉⵙⵙⵓⵔⵏ ⵅⴼ ⵓⵎⵏⵉⴷ ⵉⵀⵢⵢⴰⵏ ⵉ ⵉⵎⴰⴷⴰⵏⵏ ⵏⵏⵖ ⵉⵎⴷⴷⵓⴽⴽⴰⵍ;
ⵜⵉⵙⵇⵇⴰⵏ ⵏⵏⴰ ⵎⵎⴰⵍⴰⵏ ⵉⴼⵔⴰⵢⵏ ⵏ ⵓⵙⵓⵜⴳ ⵉⵀⵢⵢⴰⵏ ⵉⵍⵍⴰⵏ ⵖⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴹⵓ ⵕⴱⴱⵉ, ⴳ ⵜⵎⵏⴰⴹⵜ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⴰⵡⴷ ⵜⴰⴼⵍⵙⵜ ⵏ ⵜⵉⴷⵜ ⵙ ⵜⵣⵔⴼⵜ ⵏ ⵜⵎⵙⴰⵔⵜ ⵜⴰⵏⴰⵎⵓⵔⵜ, ⴷ ⵡⴰⵏⵏⴰⵍ ⵉⵖⵓⴷⴰⵏ ⵉ ⵜⵎⵓⵏⵜ ⵜⴰⵎⵓⵔⴰⵏⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ.
ⵉⵍⵍⴰ ⴰⴽⵉⴷⵏⵖ ⴰⵙⵙ ⴰⴷ ⴳⵯⵎⴰⵜⵏⵖ ⴷ ⵓⵎⴷⴷⴰⴽⴽⵯⵍ ⴳⵓⵙⵜⴰⴼⵓ ⴱⴰⵜⵛⵉⴽⵓ, ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⴰⵏⴷⵉⵏⵉ, ⵏⵏⴰ ⵉⵙⵎⵓⵏⴰⵏ ⴳ ⵜⴳⵎⴰⵎⵜ ⵏⵏⵙ ⵜⴰⴳⴷⵓⴷⴰⵏⵜ ⵜⴰⵎⴷⴷⴰⴽⴽⵯⵍⵜ ⵏ ⵛⵛⵉⵍⵉ, ⴰⵊⵊⵎ ⵉⵢⵉ ⴰⴷ ⴰⵙ ⵙⵙⵎⵏⵉⴷⵖ ⴰⴽⵉⴷⵓⵏ, ⵉ ⵇⴰⵃ ⵉⵎⴷⴷⵓⴽⴽⴰⵍ ⴳ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⵜⵉⴳⵓⵔⵉⵡⵉⵏ ⵢⴰⵜⵜⵓⵢⵏ ⵏ ⵓⵙⵓⵜⴳ ⴷ ⵓⵙⵏⵉⵎⵎⵔ, ⵅⴼ ⵇⴰⵃ ⵎⴰⵢ ⵏⵥⵕⴰ ⵣⵣⵉⴳⵓⵏ ⵙⴳ ⵜⵉⵔⴰⵜ ⵉⴷⵓⵙⵏ ⵉ ⵓⴼⵔⴰⴳ ⴷ ⵓⵙⴷⵓⵙ ⵏ ⵜⵙⵇⵇⴰⵏ ⵜⵉⴱⵕⵍⴰⵎⴰⵏⵉⵢⵉⵏ, ⵉⴳⴰⵏ; ⴱⵍⴰ ⵜⵓⵔⴷⴰ; ⵜⵉⵔⴰⵜ ⴷ ⵉⵎⵏⵣⴰⵢⵏ ⴷ ⵡⴰⴷⴳⵉ ⵉⵙⵙⵓⵜⵉⵏ ⴰⵍⵖⵓ ⵉⵙⵙⵓⵔⵏ ⵉⵍⵍⴰⵏ ⴳ ⵓⵎⴰⴳⵔ ⵏⵏⴰ ⴰⵖ ⵉⵙⵎⵓⵏⴰⵏ, ⴳ ⵜⵙⴷⵍⵉⵙⵜ ⵏ ⵓⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ.
ⵔⵉⵖ ⴰⴷ ⵜⵙⵙⵉⵡⴹⵎ ⵉ ⵇⴰⵃ ⵉⵏⵙⵙⵉⵅⴼⵏ ⵏⵏⴰ ⵉⵙⵙⴳⵎⴹⵏ ⴰⵍⵖⵓ ⴰⴷ ⵉⵙⵙⵓⵔⵏ, ⴰⵣⵓⵍ ⵏ ⵓⴱⵓⵔⵣ ⴷ ⵓⵙⵏⵉⵎⵎⵔ ⵅⴼ ⵜⵎⵢⵉⵎⴰⵏⵜ ⴰⴷ, ⴷ ⵜⴱⵔⴰⵜ ⵏ ⵓⵙⴷⴷⵉⴷ ⵉⵙ ⵔⴰⴷ ⵏⵏ ⵏⴳ ⵜⵓⴳⴳⴰⵙ ⵉⵅⴰⵜⵔⵏ ⵉ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏ ⵓⵍⵖⵓ ⵏⵏⵖ, ⴷ ⴰⴷ ⵏⴰⵡⴹ ⵉⵡⵜⵜⴰⵙⵏ ⵉⵜⵜⵓⵏⵓⵔⵣⵏ.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⵙ ⵓⵙⵙⴹⴼⵕ ⵉ ⵎⴰ ⵉⵣⵔⵉⵏ, ⵢⵓⵙⴰ ⴷ ⵓⵙⵏⵓⴱⴳ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵜⵙⵓⵜⵍⵜ ⴰⴷ ⵏ ⵓⴳⵔⴰⵡ ⴳ ⵓⵙⴰⵜⵉ ⵏ ⵢⴰⵏ ⵓⵥⵏⵥⵕ ⵏ ⵜⵙⵏⵜⴰⵢⵜ ⴰⴷ ⵊⴰⵊ ⵏ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ, ⵍⵓⵎⵎⵏ ⵍⵍⵉⴳ ⵜⴰⵔⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵙⴷⵓⵙ ⵏ ⵡⴰⵏⵙⴰ ⵏⵏⵙ ⴰⵙⴳⴰⵡⴰⵏ ⴳ ⵜⵎⵏⵥⴰⵡⵜ ⵜⴰⴼⵔⵉⵇⵉⵜ ⴷ ⵢⴰⵏ ⵙⴳ ⵉⵡⵜⵜⴰⵙⵏ ⵏⵏⵙ ⵉⵏⴼⵔⴰⵔⵏ ⵉⵙⵔⵜⴰⵏⵏ ⴷ ⵉⵊⵢⵓⵙⵜⵔⴰⵜⵉⵊⵉⵢⵏ ⵉⵎⴰⵜⴰⵢⵏ, ⵉⵜⵜⴳⴳⴰⵏ ⴰⵎⵢⴰⵡⴰⵙ ⵏⴳⵔ ⵉⴼⴼⵓⵙ ⴷ ⵢⵉⴼⴼⵓⵙ ⴷ ⵡⴰⵏⵏⴰⵍ ⵏ ⵜⵙⵏⵜⴰⵢⵉⵏ ⵜⵉⵏⴳⵎⴰ ⴷ ⵜⵏⵎⵢⴰⵡⴰⵙⵉⵏ, ⵏⵏⴰ ⵉⴳⴰⵏ ⵙⴳ ⵜⵔⵙⴰⵍ ⵏ ⵜⵙⵔⵜⵉⵜ ⵜⴰⴼⵔⵉⵇⵉⵜ ⵏ ⵍⵎⵖⵔⵉⴱ.
ⴳ ⵓⵙⴰⵜⵉ ⴰⴷ, ⵓⵔ ⵖⵉⴼⵓⵏ ⵉⵏⵜⵍ ⵡⴰⵜⵉⴳ ⵏ ⵜⵙⵏⵜⴰⵢⵉⵏ ⵜⵉⴷⵎⵙⴰⵏⵉⵏ ⴷ ⵜⵙⵔⵜⴰⵏⵉⵏ ⵜⵉⵎⵇⵔⴰⵏⵉⵏ ⵏⵏⴰ ⵉⵕⵥⵎ ⵍⵎⵖⵔⵉⴱ ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ ⴳ ⵜⵙⵇⵇⵏⵜ ⵏⵏⵙ ⴰⴽⴷ ⵉⵡⴰⵏⴽⵏ ⵏ ⵡⴰⴼⵔⵉⵇⵢⴰ ⵏ ⵢⵉⴼⴼⵓⵙ ⵏ ⵜⵏⵣⵔⵓⴼⵜ, ⵙ ⵜⵏⵙⵜⴰⵢⵜ ⴷ ⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴹⵓ ⵕⴱⴱⵉ, ⵣⵣⵉⴳⵙⵏⵜ ⴰⵙⵏⵜⴰⵢ ⵏ ⵓⵙⵍⴷⴰ ⵏ ⵓⴳⴰⵣ ⵏⵉⵊⵉⵔⵢⴰ ⵍⵎⵖⵔⵉⴱ, ⴷ ⵜⵙⵏⵜⴰⵢⵜ ⵏ ⵓⵙⴷⵓⵙ ⵏ ⵡⴰⴷⴰⴼ ⵏ ⵜⵎⵉⵣⴰⵔ ⵏ ⵜⴰⵖⴰⵔⵜ ⵖⵔ ⵓⴳⴰⵔⵓ ⴰⵟⵍⴰⵏⵜⵉ, ⵏⵏⴰ ⵉⵥⴹⴰⵕⵏ ⴰⴷ ⵜⵙⴽⵔ ⴰⵙⴷⵓⵙ ⵏ ⵜⵔⵙⴰⵍ ⵏ ⵓⵔⴳⴳⵉⴳ ⴳ ⵜⵎⵏⴰⴹⵜ ⴷ ⵓⵙⵎⴽⵍ ⵏ ⵜⵎⵙⴰⵔⵉⵏ ⵏⵏⴰ ⵉⵣⴷⵉⵏ ⴷ ⵜⵣⵡⴰⴳⵜ ⴷ ⵜⵏⴼⵔⵓⵜ ⴷ ⵜⴳⵎⵉ.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⵀⴰ ⵏⵏ ⵜⴰⵡⵏⴳⵉⵎⵜ ⵏⵏⴰ ⵅⴼ ⵏⵎⵓⵏ ⴰⵙⵙ ⴰⴷ, ⵜⴳⴰ ⵓⵎⵎⵍ ⴰⵏⴼⴳⴰⵏ ⵉⵙⵙⵓⵔⵏ, ⴰⵀⴰ ⵜⵉⵏⵥⴰⵕ ⵉⵡⴰⵍⴰⵏ ⴷⵖⵉ ⵉⵍⵉ ⴰⵏⴼⴳⴰⵏ ⴰⵔ ⵣⵔⵔⵉⵏⵜ ⵉⵡⵓⵜⵜⴰ ⵉⵣⴰⵢⴽⵓⵜⵏ;
ⴳⴰⵏⵜ ⵜⵉⵏⵥⴰⵕ ⵉⵣⵔⵔⵉⵏ ⵉⵡⵓⵜⵜⴰ ⵏ ⵜⵊⵖⵕⴰⴼⵜ ⴷ ⵜⵥⵍⴰⵢⵉⵏ ⵜⵉⴷⵖⵔⴰⵏⵉⵏ ⴷ ⵜⴷⵍⵙⴰⵏⵉⵏ;
ⵜⵉⵏⵥⴰⵕ ⵏⵏⴰ ⵓⵔ ⵉⵍⵉⵏ ⴰⵣⴳⵣⵍ ⴳ ⵖⴰⵙ ⵜⵉⵎⵙⴰⵔⵉⵏ ⵜⵉⵜⵉⵇⵏⵉⵢⵉⵏ ⵉⴼⵙⵙⵉⵏ ⵙ ⵜⴳⴷⴰⵣⴰⵍⵉⵏ ⵜⵓⵙⵏⵉⴽⵉⵏ ⵏⵉⵖ ⵜⵉⵙⵔⵜⴰⵢ ⵜⵉⵣⵓⵏⴰⵏⵉⵏ, ⵎⴰⵛⴰ ⴳⴰⵏⵜ ⵜⵉⵎⵙⴰⵔⵉⵏ ⵏ ⵡⵓⵎⵎⵍ ⵉⵙⵙⴰⵖⴰⵏ ⴰⵎⵎⴰⵙ ⵏ ⵜⴼⴳⴰⵏⵜ ⴷ ⵉⵍⵉ ⵏⵏⵙ, ⵙ ⵓⵎⴷⵢⴰ ⴰⵙⵏⴼⵍ ⵏ ⵓⵏⵣⵡⵉ, ⵏⵏⴰ ⵉⴳⴰⵏ ⵜⴰⵢⴰⴼⵓⵜ ⵏ ⵓⵏⴷⵍⴼ ⵏ ⵜⵙⵇⵇⵏⵜ ⵏ ⵓⴼⴳⴰⵏ ⴷ ⵓⴳⴰⵎⴰ, ⴰⵢⵍⵍⵉ ⵉⴳⴰⵏ ⵜⵉⵏⵥⵕⵜ ⵏⵏⴰ ⴰⵖ ⵉⵙⵡⴰⵍⴰⵏ ⵎⵏⵉⴷ ⵏ ⵉⵎⵉⵣⴰⵏ ⵉⵎⵇⵔⴰⵏⵏ.
ⵉⴼⵔⴽ ⵍⵎⵖⵔⵉⴱ ⵙ ⵓⴽⵙⴰⵢ ⵏ ⵉⵎⵉⵣⴰⵏ ⴰⴷ, ⵙ ⵜⵖⴰⵔⴰⵙⵜ ⵏ ⵓⴱⴷⴰⴷ ⵏⵏⵙ ⵅⴼ ⵡⵓⴹⵓⴼ ⵏ ⵓⴱⵔⵉⴷ ⴰⵎⵖⴰⵡⵍ ⵉⴱⴷⴷⵏ ⵅⴼ ⵜⵙⵜⵔⴰⵜⵉⵊⵉⵢⵉⵏ ⵜⵉⵏⴳⵎⴰ, ⵉ ⵓⵙⴷⵓⵙ ⵏ ⵜⵣⵎⵎⴰⵔ ⵉⵡⴰⵜⵜⵙⵏ ⴰⴹⴰⴽⴰⵍ ⵏ ⵓⴱⴰⴹ ⵓⵥⴹⵉⵕ, ⴷ ⵜⴰⵣⵣⴰⵣⵜ ⵏ ⵜⵣⵉⴳⵣⵜ ⵏ ⵓⵎⵓⵜⵜⵉ ⵙ ⵜⴷⴰⵎⵙⴰ ⵜⴰⵣⴳⵣⴰⵡⵜ, ⵍⵓⵎⵎⵏ ⴳ ⵓⵙⵡⵉⵔ ⵏ ⵓⵙⵙⴰⵔⵓ ⴳ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ, ⵙ ⵓⵎⵙⴰⵙⴰ ⴷ ⵉⵡⵜⵜⴰⵙⵏ ⵏ "ⵓⵖⴰⵡⴰⵙ ⴰⵏⴰⵎⵓⵔ ⵎⵓ ⵉⴷⵔⵓⵙ ⵓⴽⴰⵕⴱⵓⵏ ⵎⵓ ⵉⵖⵣⵣⵉⴼ ⵡⴰⴽⵓⴷ 2050", ⵏⵏⴰ ⵉⵙⵙⵎⵏⵉⴷ ⵍⵎⵖⵔⵉⴱ ⵉ ⵜⵎⵜⵜⴰ ⵉⵎⵓⵏⵏ ⴳ ⵜⴳⵉⵔⴰ ⵏ ⵓⵙⴳⴳⵯⴰⵙ ⵏ 2021.
ⵓⵔ ⵜⵣⴷⵉ ⵜⵎⵔⵉⵙⵜ ⵖⴰⵙ ⴷ ⵜⵎⵙⴰⵔⵜ ⵏ ⵓⵏⴳⵉⴳⵜ, ⵎⴰⵛⴰ ⵜⵙⵎⵓⵏⴰ ⴰⵡⴷ ⵜⴰⵏⴼⵔⵓⵜ ⵜⴰⵎⵙⴰⴷⵓⵔⵜ, ⵍⵓⵎⵎⵏ ⴳ ⵜⵉⵣⵉ ⵏ ⵜⵎⵓⴽⵔⵉⵙⵉⵏ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵉⵎⵏⵣⴰⵖⵏ ⵉⵙⴳⴰⵡⴰⵏⵏ, ⴰⵀⴰ ⵜⵍⵍⴰ ⵖⵔ ⵜⵎⵓⵔⵜ ⵏⵏⵖ ⵢⴰⵜ ⵜⵉⵍⴰⵍⵜ ⵉⵣⵡⴰⵔⵏ ⵙ ⵜⵏⴰⵔⴰ ⵏ ⵓⵎⵓⵣⵔ ⵏ ⵜⵎⵓⵔⵜ, ⴰⴷ ⵜ ⵉⵃⴹⵓ ⵕⴱⴱⵉ ⵢⴰⵡⵙ ⴰⵙ, ⴳ ⵓⵕⵥⵥⵓⵎ ⴷ ⵡⴰⵏⵏⴰⵍ ⵏ ⵜⵓⴳⵜⵜ ⵏ ⵜⵙⵏⵜⴰⵢⵉⵏ ⵜⵉⵏⴳⵎⴰ ⴷ ⵜⵏⵎⵢⴰⵡⴰⵙⵉⵏ ⵉⵡⴰⵜⵜⵙⵏ ⴰⵙⴱⵓⵖⵍⵓ ⵏ ⵉⴷⵔⴰⵡⵏ ⵏⴳⵔ ⵜⵓⴳⵜⵜ ⵏ ⵜⵎⵏⴰⴹⵉⵏ ⴷ ⵉⵡⴰⵏⴽⵏ ⵏ ⵓⵎⴰⴹⴰⵍ, ⵍⵓⵎⵎⵏ ⵜⴰⵎⵏⴰⴹⵜ ⵜⴰⵄⵕⴰⴱⵜ ⴷ ⵜⴼⵔⵉⵇⵉⵜ ⴷ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⴽⴰⵕⴰⵢⵉⴱ, ⵣⵣⵉⴳⵙⵏⵜ ⵜⴰⵏⵙⵜⴰⵢⵜ ⵏ ⵜⵏⴰⵎⵉⵜ ⵏ ⵜⴼⵍⵍⴰⵃⵜ ⵜⴰⴼⵔⵉⵇⵉⵜ ⴰⴽⴷ ⵉⵙⵏⴼⵍⵏ ⵏ ⵓⵏⵣⵡⵉ, ⵏⵏⴰ ⵉⵜⵜⵡⴰⵙⵙⵏⵏ ⵙ ⵜⵙⵏⵜⴰⵢⵜ "Triple A", ⵏⵏⴰ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⵙ ⵜⵎⵍⴷⴰ ⵏ ⵜⵎⵓⵏⵉ ⵏ ⵓⵏⴳⵉⴳⵜ "ⴽⵓⴱ 22'.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⵙⴳ ⵜⵎⵙⴰⵔⵉⵏ ⵏⵏⴰ ⵉⵙⵎⵓⵏⵏ ⴰⴽⴰⵎⴷ ⵏ ⵉⵎⴷⵔⴰⵡⵏ ⵜⵍⵍⴰ ⵜⵎⵙⵍⴰⵢⵜ ⵏ ⵜⵏⴰⴳⵔⵉⵜ ⴷ ⵜⵏⴼⵔⵓⵜ ⵜⴰⴳⵔⴰⵖⵍⴰⵏⵜ, ⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⵙⵏⵄⵜ ⴰⴱⴷⴰ ⵢⴰⵜ ⵜⵎⵔⵉⵙⵜ ⵜⴰⵔⵎⵙⴽⵉⵍⵜ ⴷ ⵜⵎⵖⵍⴰⵍⵜ ⵉ ⵓⵃⵟⵟⵓ ⵏ ⵜⵏⴰⴳⵔⵉⵜ ⴷ ⵜⵏⴼⵔⵓⵜ ⴳ ⵓⵎⴰⴹⴰⵍ, ⵙ ⵓⵎⵙⴰⵙⴰ ⴷ ⵢⴰⵜ ⵜⴰⵏⵏⴰⵢⵜ ⵜⴰⴳⵍⴷⴰⵏⵜ ⵜⵓⵏⵥⵉⵥⵜ ⵉ ⵜⵙⵔⵜⵉⵜ ⵏ ⴱⵕⵕⴰ ⵏ ⵍⵎⵖⵔⵉⴱ, ⵉⴱⴷⴷⵏ ⵅⴼ ⵜⵎⵔⵉⵙⵜ ⵙ ⵜⵡⵓⵔⵉ ⵉⵙⵙⵓⵔⵏ, ⴷ ⵓⵙⵕⵚⵚⴰ ⵏ ⵉⵣⴰⵍⵉⵡⵏ ⵏ ⵓⵎⵢⴰⵡⴰⵙ ⴰⵎⴳⴳⴰⵢ ⴷ ⵓⵎⵢⴰⵡⴰⵙ ⵉⵕⵡⴰⵏ, ⴷ ⵓⴼⵙⴰⵔ ⵏ ⵉⵣⴰⵍⵉⵡⵏ ⵏ ⵓⵎⵙⴰⵡⴰⵍ ⴷ ⵜⵏⴰⴳⵔⵉⵜ ⴷ ⵜⵎⵢⵉⴷⵉⵔⵜ ⴳ ⵓⵎⴰⴹⴰⵍ, ⴷ ⵡⴰⵎⵎⴰⵥ ⴳ ⵓⴼⵙⵙⴰⵢ ⴰⵏⴳⵔⴰⵢ ⵏ ⵉⵎⵏⵣⴰⵖⵏ, ⴷ ⵓⵣⵔⴰⴽ ⵏ ⵓⴱⴰⴹ ⵏ ⵉⵡⴰⵏⴽⵏ ⴷ ⵜⵎⵓⵏⵜ ⵏⵏⵙⵏ ⴷ ⵡⴰⵔⴽⵛⵛⵓⵎ ⴳ ⵜⵖⴰⵡⵙⵉⵡⵉⵏ ⵜⵉⴳⵯⵏⵙⴰⵏⵉⵏ ⵏ ⵉⵡⴰⵏⴽⵏ ⵢⴰⴹⵏ.
ⴳ ⵎⴰⴷ ⵉⵣⴷⵉⵏ ⴷ ⵜⵎⵙⴰⵔⵜ ⵏ ⵜⵣⵡⴰⴳⵜ, ⵀⴰ ⵜⵉⵏ ⵓⵔ ⵜⴳⵉ ⵖⴰⵙ ⵜⴰⵙⵙⴰⵙⵜ ⵓⴽⴰⵏ, ⵎⴰⵛⴰ ⵜⴳⴰ ⵜⵓⵎⴰⵏⵜ ⵉⵍⴰⵏ ⴷⵖⵉ ⵉⵎⵏⵉⴷⵏ ⵉⵅⴰⵜⵔⵏ, ⵉⵅⵚⵚⴰ ⵉ ⵓⵙⵡⵓⴷⴷⵓ ⵏⵏⵙⵏ ⵢⴰⵏ ⵉⵥⵕⵉ ⴰⵏⴼⴳⴰⵏ ⵉⵙⵎⴷⵏ ⵉⵙⵎⵙⴰⵙⴰⵏ ⵏⴳⵔ ⵓⴱⴰⴹ ⴰⵏⴰⵎⵓⵔ ⴷ ⵉⵣⵔⴼⴰⵏ ⵏ ⵉⵎⵣⵡⴰⴳⵏ. ⴰⵔ ⵉⵙⵙⵎⵏⵉⴷ ⵍⵎⵖⵔⵉⴱ ⵢⴰⵏ ⵓⵣⵓⵔⵜ ⵉⵜⵜⴰⵡⴹⴼⴰⵕⵏ ⴳ ⵓⵙⴰⵜⵉ ⴰⴷ, ⴰⵔ ⵜ ⵉⵎⵎⴰⵍⴰ ⵓⵎⵙⴰⵙⴰ ⴰⴳⵔⴰⵖⵍⴰⵏ ⵅⴼ "ⵜⵏⵜⵜⴰⵎⵜ ⵜⴰⴳⵔⴰⵖⵍⴰⵏⵜ ⵏ ⵜⵣⵡⴰⴳⵜ ⵉⴼⵍⵙⵏ ⵉⵏⵎⴰⵍⴰⵏ ⵉⵜⵜⵓⵙⵏⵎⴰⵍⴰⵏ", ⵏⵏⴰ ⵉⵜⵜⵓⵙⵖⵣⵏⵏ ⴳ ⵜⵙⵎⵓⵏⵉ ⵎⵓ ⵢⴰⵜⵜⵓⵢ ⵓⵙⵡⵉⵔ, ⵉⵜⵜⵓⵙⵏⵎⴰⵍⴰⵏ ⴳ ⵜⵎⴷⵉⵏⵜ ⵏ ⵎⵕⵕⴰⴽⵛ ⴳ ⴷⵓⵊⴰⵏⴱⵉⵔ 2018, ⵏⵏⴰ ⵉⴳⴰⵏ ⵢⴰⵜ ⵜⵉⵣⵉ ⵜⴰⵎⵣⵔⴰⵢⵜ ⵏ ⵓⵙⵏⴼⵍ ⴳ ⵓⵎⵔⴰⵔⴰ ⴷ ⵜⵎⵙⴰⵔⵜ ⵏ ⵜⵣⵡⴰⴳⵜ.
ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ
ⵍⵍⴰⵏⵜ ⴽⵔⴰ ⵏ ⵜⵎⵙⴰⵔⵉⵏ ⵉⵍⴰⵏ ⴰⵜⵉⴳ, ⴰⵎ ⵜⴷⵓⵙⵉ, ⴷ ⵉⵙⴽⵉⵍ ⵏⴳⵔ ⵙⵉⵏ ⵉⵔⵉⵙⵏ, ⴷ ⵉⵣⴰⵍⵉⵡⵏ ⵏ ⵓⵎⵙⵓⵔⵓⴼ, ⴷ ⵜⵖⵉⵙⵜ ⵜⴰⵙⵎⴳⵓⵔⵜ ⴷ ⵉⵙⵏⴼⵍⵏ ⴳ ⵢⵉⴳⵔ ⵏ ⵜⵙⵇⵇⴰⵏ ⵜⵉⵏⴼⴳⴰⵏⵉⵏ ⴷ ⵉⵙⵖⵡⴰⵏ ⵉⵏⴰⵎⵓⵏⵏ, ⴷ ⵉⵎⵔⵙⵉⵜⵏ ⵢⴰⴹⵏ ⵉⵣⴷⵉⵏ ⴷ ⵉⵙⴳⵓⵎⵏ ⵉⵍⵍⴰⵏ ⴳ ⵓⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⴷ, ⵏⵏⴰ ⵓⵔ ⵉⵍⵉⵏ ⴰⴽⵓⴷ ⴰⴷ ⵖⵉⴼⵙⵏ ⵏⵙⵙⵉⵡⵍ.
ⵓⵔ ⵖⵓⵔⵉ ⵜⵓⵔⴷⴰ ⵎⴰⵙ ⴷ ⴰⴳⵔⴰⵡ ⴰⴷ, ⵙ ⵢⴰⵜ ⴷ ⵎⵔⴰⵡⵜ (11) ⵏ ⵜⵖⵉⵎⴰ ⵏⵏⵙ ⵉⵙⵎⴷⵏ ⵉⵣⵎⵎⵣⴷⵉⵏ, ⵙ ⵓⴳⵓⴷⵉ ⴷ ⵓⵎⵢⴰⵏⴰⵡ ⵏ ⵉⵏⴱⵣⴰⵔⵏ ⴷ ⵉⵎⴷⵔⴰⵡⵏ ⵏⵏⵙ, ⵔⴰⴷ ⵢⵉⵍⵉ ⴷ ⵢⴰⵜ ⵜⵎⵍⴷⴰ ⵏ ⵓⵎⴹⴰⴽⴰⵕ ⵏ ⵎⵏⵏⴰⵡⵜ ⵏ ⵜⵎⵙⴰⵔⵉⵏ, ⴷ ⴰⴷ ⵜⴱⵓⵖⵍⵓ ⵜⵖⵉⵙⵜ ⵏⵏⵖ ⵜⴰⵙⵎⴳⵓⵔⵜ ⵙ ⵉⵡⵏⴳⵉⵎⵏ ⴷ ⵉⵎⴷⵡⴰⵏⵏ ⵉⵏⵏⴰⵍⵏ ⵜⴰⴽⴰⵢⵍⴰⵍⵜ ⵏⵏⵖ ⵉⵙⵙⵓⵔⵏ ⴰⴼⴰⴷ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵎⵏⵏⴰⵡⵜ ⵏ ⵜⵏⵥⴰⵕ ⵉⵡⴰⵍⴰⵏ ⵜⴰⴼⴳⴰⵏⵜ.
ⴳ ⵓⵎⴳⴳⴰⵔⵓ, ⵙⵓⵔⴼⴰⵜ ⵉⵢⵉ ⴰⴷ ⵙⵙⵎⵏⵉⴷⵖ ⴰⵙⵙⵔⵖⵓⴷ ⵉ ⵓⵎⴷⴷⴰⴽⴽⵯⵍ ⵊⵉⵕⴰⵕⴹⵉ ⴳⵡⵉⴹⵓ, ⵅⴼ ⵓⵢⵏⵏⴰ ⵉⵙⴽⵔ ⴳ ⵓⴳⴰⵔ ⵏ ⵎⵔⴰⵡ ⵏ ⵉⵙⴳⴳⵯⴰⵙⵏ, ⵜⴰⴼⴰ ⴰⴷ ⵉⵙⵔⵙ ⵜⴰⵙⵏⵜⴰⵢⵜ ⴰⴷ ⴳ ⵓⵖⴰⵡⴰⵙ ⵏ ⵓⵙⵡⵉⵏⴳⵎ ⴰⵎⴰⵙⵙⴰⵏ ⴰⴳⵔⴰⵖⵍⴰⵏ ⵙ ⵓⵎⴹⴰⴽⴰⵕ ⵏ ⵜⵎⵙⴰⵔⵉⵏ ⵏ ⵉⵎⴰⵍ ⴷ ⵉⵎⴷⵡⴰⵏⵏ ⴷ ⵉⵎⵉⴷⴷⵣⵉⵜⵏ ⵉⵍⵍⴰⵏ.
ⴰⵔ ⵙⵎⴰⵢⵏⵓⵖ ⴰⵙⴱⵔⵔⴽ ⵉⵏⵓ ⵉⵙⵓⵏ, ⴷ ⵓⵙⵏⵉⵎⵎⵔ ⵏ ⵇⴰⵃ ⵉⵎⴷⵔⴰⵡⵏ ⴷ ⵉⵎⵙⵏⵎⴰⵍⴰⵜⵏ, ⴰⵡⴷ ⵉ ⵇⴰⵃ ⵏⵏⵓⵏ ⵅⴼ ⵜⵉⵍⵉⵜ ⵏⵏⵓⵏ ⴷ ⵜⴷⵔⴰⵡⵜ ⵏⵏⵓⵏ ⵉⵕⵡⴰⵏ, ⵥⵓⵥⴹⵖ ⴰⵎⵓⵔⵙ ⴷ ⵓⵖⵓⴷⵓ ⵉ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⴷ ⵏⵏⵖ.
ⴰⵣⵓⵍ ⵏⵏⵓⵏ ⴷ ⵜⵎⵍⵍⴰ ⵏ ⵕⴱⴱⵉ ⴷ ⵜⵎⴰⵅⵉⵔⵉⵏ ⵏⵏⵙ.