ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵡⴰⵎⵎⴰⵙ ⵏ ⵡⴰⴼⵔⵉⵇⵢⴰ ⵎⴰⵙⵙ ⵉⴼⴰⵔⵉⵙⵜ ⵏⴳⴰⵎⴰⵏⴰ ⴰⵏⵏⴰⵍ ⵉⵕⵚⵚⴰⵏ ⵏ ⵜⴳⵔⵓⵎⵎⴰ ⵉ ⵜⵎⵖⵔⴰⴱⵉⵜ ⵏ ⵜⵏⵣⵔⵓⴼⵜ, ⴰⵀⴰ ⵉⵙⴷⴷⵉⴷ ⴰⵜⵉⴳ ⵏ ⵉⵥⵕⵉ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴹⵓ ⵕⴱⴱⵉ ⵉ ⵓⵙⵔⵓⵙ ⵏ ⵜⵎⵓⵏⵜ ⴷ ⵓⵎⵢⴰⵡⴰⵙ ⴷ ⵓⵎⵢⴰⴷⴰⴼ ⴰⴼⵔⵉⵇⵉ.
ⵢⵓⵙⴰ ⴷ ⵓⵙⴷⴷⵉⴷ ⴰⴷ ⴳ ⵜⵉⵣⵉ ⵏ ⵓⵙⵏⵓⴱⴳ ⵏⵏⴰ ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ ⴳ ⵡⴰⵙⵙ ⵏ ⵡⴰⵢⵏⴰⵙ 20 ⵉⵏⵏⴰⵢⵔ 2025, ⵏⵏⴰ ⵉⴳⴰⵏ ⵢⴰⵜ ⵜⵎⵍⴷⴰ ⵏ ⵓⵔⵣⵣⵓ ⵏ ⵎⵏⵏⴰⵡ ⵉⴷⴰⵙⵉⵡⵏ ⵏ ⵓⵎⵢⴰⵡⴰⵙ ⵉⴳⴳⵓⵜⵏ ⵉⵍⵍⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵡⴰⵎⵎⴰⵙ ⵏ ⵡⴰⴼⵔⵉⵇⵢⴰ ⴷ ⵚⴹⵉⵚ ⵏ ⵉⵡⴰⵏⴽⵏ ⵏⵏⵙ, ⴰⵡⴷ ⴰⵙⵉⵡⵍ ⵅⴼ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⵎⵏⵥⴰⵡⵉⵏ ⵉⵍⴰⵏ ⴰⴽⴰⵎⴷ ⵏ ⵙⵏⴰⵜ ⵜⴼⵓⵍⵉⵏ.
ⴳ ⵓⵙⴰⵜⵉ ⴰⴷ, ⵣⵎⵎⴻⵎⵏⵜ ⵙⵏⴰⵜ ⵜⴼⵓⵍⵉⵏ ⴰⴱⵔⵉⴷ ⵉⵕⵡⴰⵏ ⵏ ⵜⵙⵇⵇⴰⵏ ⵏ ⵍⵎⵖⵔⵉⴱ ⴷ ⵡⴰⴼⵔⵉⵇⵢⴰ ⴷ ⵡⴰⵜⵉⴳ ⴰⵎⵣⵔⴰⵢ ⵏ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ ⵏⴳⵔ ⵍⵎⵖⵔⵉⴱ ⴷ ⵜⴳⵜⵉⵔⴰⵏⵉⵏ ⵏⴳⵔ ⵍⵎⵖⵔⵉⴱ ⴷ ⵜⴳⵔⵓⵎⵎⴰ ⵏ "CEMAC", ⴷⴰⵢ ⵏⵏⴰⵏ ⵉⵙ ⵉⵕⵥⵎ ⵓⵔⵣⴰⴼ ⴰⴷ ⵉⵎⵏⵉⴷⵏ ⵉⴱⵓⵖⵍⴰⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⵉⵙⵡⵓⵔⵓⵢⵏ ⵅⴼ ⵜⵏⵓⴼⴰ ⵏ ⵜⴼⵓⵍⵉⵏ ⴷ ⵓⴳⴰⵏⵉ ⵏ ⵉⵎⴰⴷⴰⵏⵏ ⵏⵏⵙⵏⵜ ⵖⵔ ⵜⴳⵎⵉ ⵉⵙⵙⵓⵔⵏ ⴷ ⵓⵎⵢⴰⵡⴰⵙ ⴳ ⵓⵙⴰⵜⵉ ⵏ ⵓⵎⵏⵣⴰⵢ ⵏ ⵓⴷⵔⴰⵡ ⴰⵎⵔⵓⵣ - ⴰⵎⵔⵓⵣ ⴷ ⵓⵎⵢⴰⵡⴰⵙ ⵉⴼⴼⵓⵙ-ⵉⴼⴼⵓⵙ, ⴰⵀⴰ ⵙⴷⴷⵉⴷⵏⵜ ⵙⵏⴰⵜ ⵜⴼⵓⵍⵉⵏ ⵉⵙ ⵇⴰⵃ ⵜⵉⵏⵥⴰⵕ ⵉⵡⴰⵍⴰⵏ ⵇⴰⵃ ⴰⵎⵏⵥⴰⵡ ⵏ ⵡⴰⴼⵔⵉⵇⵢⴰ, ⵔⴰⵏⵜ ⴳ ⵓⵣⵎⵣ ⴷ ⵢⵓⴷⵙⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⵎⵓⵏ ⵏ ⵜⵣⵎⵎⴰⵔ ⴷ ⵓⵙⵎⵀⵍ ⵏ ⵜⵎⵢⴰⴷⴰⵙⵉⵏ ⵜⵉⵎⴳⵔⴰ ⵏⵏⴰ ⵉⵙⵙⵏⵔⴰⵡⵏ ⴰⵎⵢⴰⵡⴰⵙ ⴷ ⵜⵙⵖⵣⵏⵜ ⵜⴰⵎⵢⴰⵖⵜ.
ⵎⴽⴷⴰ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵅⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴷⵎⵙⴰⵏⵜ ⴷ ⵓⵙⵖⴰⵏ ⵏ ⵉⵣⵎⵣⵣⴰ ⴷ ⵜⵙⵓⴳⴰⵔ ⵉⵍⵍⴰⵏ ⵖⵔ ⵙⵏⴰⵜ ⵜⴼⵓⵍⵉⵏ ⵜⴰⴼⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ, ⴰⵀⴰ ⵉⵙⵏⵄⵜ ⴳ ⵓⵙⴰⵜⵉ ⴰⴷ ⵜⵉⵍⵉⵜ ⵜⴰⴷⵎⵙⴰⵏⵜ ⵉⵖⵓⴷⴰⵏ ⴷ ⵉⵙⵙⴰⵔⵓⵜⵏ ⵏ ⵜⴳⵍⴷⵉⵜ ⴳ ⵓⵎⵏⵥⴰⵡ ⴰⴼⵔⵉⵇⵉ, ⵉⵍⵉⵏ ⴳⵉⵙ ⵉⵡⴰⵏⴽⵏ ⵏ ⵜⴳⵔⵓⵎⵎⴰ, ⵜⴰⴼⴰ ⴰⴷ ⵢⵉⵍⵉ ⵓⵙⵉⵍⵉ ⵏ ⵉⵙⵏⴼⵍⵏ ⵉⵙⵖⵏⵣⵉⵜⵏ ⴷ ⵡⴰⵏⵏⴰⵍ ⵏ ⵓⵎⵙⴰⵙⴰ ⴰⴷⵎⵙⴰⵏ ⴷ ⵓⵎⵢⴰⴷⴰⴼ ⴰⵙⴳⴰⵡⴰⵏ ⴷ ⵜⴰⵣⵣⴰⵣⵜ ⵏ ⵓⵎⵢⴰⵡⴰⵙ ⴰⵥⵕⴼⴰⵏ ⴷ ⵡⵓⴷⵔⵉⵎ ⴷ ⵜⵉⴽⴽⵉ ⵏ ⵢⴰⵜ ⵜⵙⵓⵔⵉⴼⵜ ⵜⴰⵎⴰⵢⵏⵓⵜ ⵉ ⵜⵙⵇⵇⴰⵏ ⴳ ⵉⴳⵔⴰⵏ ⵉⵎⵉⴷⵉⵔⵏ ⵢⴰⴹⵏ ⵏⵏⴰ ⴳⵉⵙⵏ ⵣⵡⴰⵔⵏⵜ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏ ⴷ ⵜⴳⵎⵔⵜ ⵜⴰⵢⵍⴰⵏⵜ.
ⴳ ⵜⵉⵣⵉ ⵏ ⵓⵙⵡⵉⵍ ⵏⵏⵙ ⵅⴼ ⵜⵣⵎⵎⴰⵔ ⵉⵜⵜⴰⵡⵙⴽⴰⵔⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵎⵏⵥⴰⵡ, ⵉⵙⵏⵄⵜ ⵎⴰⵙⵙ ⵡⵍⴷ ⵕⵕⴰⵛⵉⴷ ⴰⵍⵜⴰⵖ ⵉⵕⵡⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵙⵏⵜⴰⵢⵉⵏ ⵉⵏⵏⴰⵍⵏ ⴰⵎⵙⴰⵙⴰ ⴰⴼⵔⵉⵇⵉ ⴷ ⵓⵙⴽⴰⵔ ⵏ ⵢⴰⵏ ⵓⵙⵎⵎⵍ ⵉⵍⴻⵍⵍⵉ ⵏ ⵜⵙⵖⵏⵣⵉⵜ ⵜⴰⴼⵔⵉⵇⵉⵜ ⴷ ⵓⵙⵔⵓⵙ ⵏ ⵉⵡⵜⵜⴰⵙⵏ ⵏ ⵜⵎⵙⵙⴽⵜⵉⵜ ⵏ 2063 ⵣⵓⵏ ⴷ ⵉⵡⵜⵜⴰⵙⵏ ⵉⵙⵜⵔⴰⵜⵉⵊⵉⵢⵉⵏ ⵏ ⵓⵎⵏⵥⴰⵡ ⵉⴱⵓⵖⵍⴰⵏ, ⴰⵀⴰ ⵉⵙⵏⵄⵜ ⵙ ⵜⵖⴰⵔⴰⵙⵜ ⵉⵥⵍⵉⵏ ⵜⵉⵙⵏⵜⴰⵢⵉⵏ ⵜⵉⴳⵍⴷⴰⵏⵉⵏ ⵉⵣⴷⵉⵏ ⴷ ⵉⵡⴰⵏⴽⵏ ⵉⴼⵔⵉⵇⵉⵢⵏ ⵉⵟⵍⴰⵏⵜⵉⵢⵏ ⴷ ⵓⵙⵀⵡⵏ ⵏ ⵡⴰⴷⴰⴼ ⵏ ⵉⵡⴰⵏⴽⵏ ⵏ ⵙⴰⵃⵉⵍ ⴷ ⵜⵏⵣⵔⵓⴼⵜ ⵖⵔ ⵓⴳⴰⵔⵓ ⴰⵟⵍⴰⵏⵜⵉ ⴷ ⵓⵙⵍⴷⴰ ⵏ ⵓⴳⴰⵣ ⵍⵎⵖⵔⵉⴱ - ⵏⵉⵊⵉⵔⵢⴰ.
ⴳ ⵓⵙⴰⵜⵉ ⴰⴷ, ⵉⵙⵙⵉⵡⵍ ⵎⴰⵙⵙ ⵎⵓⵃⵎⵎⴷ ⵡⵍⴷ ⵕⵕⴰⵛⵉⴷ ⵅⴼ ⵓⵙⵓⵊⴷ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵍⵍⵉⴳ ⵉⵍⴰ ⵢⴰⵜ ⵜⵏⴼⴰⵍⵉⵜ ⵜⵓⴼⵔⵉⴷⵜ, ⵉ ⵜⵎⵓⵏⵜ ⴰⴽⴷ ⵜⵙⵇⵇⴰⵏ ⵉⴱⵓⵖⵍⴰⵏ ⵏⴳⵔ ⵍⵎⵖⵔⵉⴱ ⴷ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵡⴰⵎⵎⴰⵙ ⵏ ⵡⴰⴼⵔⵉⵇⵢⴰ ⵙ ⵇⴰⵃ ⵜⵉⵙⵏⵜⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵉⵅⵚⵚⴰⵏ ⵉ ⵓⵙⵙⵔⵇⴱ ⵏ ⵓⵎⵙⴰⵡⴰⵍ ⴷ ⵓⵏⵔⴰⵎⴰⵙ ⵏⴳⵔ ⵉⵎⴰⴷⴰⵏⵏ ⴷ ⵓⵙⵕⵚⵚⴰ ⵏ ⵡⴰⵎⵎⴰⴽⵏ ⵉ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷ ⵓⵎⵎⵙⴽⴰⵍ ⵏ ⵜⵔⵎⵉⵜⵉⵏ ⴷ ⵜⵎⵙⴽⴰⵔ ⵢⴰⵜⵜⵓⵢⵏ ⴷ ⵓⵣⴷⴷⵓⵢ ⵏ ⵡⴰⴷⴷⴰⴷⵏ ⴷ ⵜⵡⵓⵔⵉ ⵉⵙⵙⵓⵔⵏ ⵊⴰⵊ ⵏ ⵉⴳⵔⴰⵡⵏ ⵉⴱⵕⵍⴰⵎⴰⵏⵏ ⵉⴳⵔⴰⵖⵍⴰⵏⵏ ⵏⵏⴰ ⴳⵉⵙⵏ ⵜⵏⵏⴰ ⵉⵙⵎⵓⵏⴰⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ ⴷ ⵡⴰⴼⵔⵉⵇⵢⴰ.
ⴳ ⵓⵏⵎⵓⵇⵇⴰⵔ ⴰⴷ, ⵓⵔ ⵜⵣⵔⵉ ⵜⵉⵣⵉ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴷ ⵉⵙⵏⵉⵎⵎⵔ ⴷ ⴰⴷ ⵢⵓⵍⵖ ⴰⴷⴷⴰⴷ ⵏ ⵜⴳⵎⴰⵜ ⵉⵀⵢⵢⴰⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⵏ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵡⴰⵎⵎⴰⵙ ⵏ ⵡⴰⴼⵔⵉⵇⵢⴰ ⵉⵏⵏⴰⵍⵏ ⵜⴰⵎⵖⵔⴰⴱⵉⵜ ⵏ ⵜⵏⵣⵔⵓⴼⵜ, ⴰⵀⴰ ⵉⵏⵏⴰ ⴳ ⵓⵙⴰⵜⵉ ⴰⴷ ⵉⵙ ⴰⴷⴷⴰⴷ ⴰⴷ ⵉⵕⵚⵚⴰⵏ ⴰⵔ ⵉⵜⵜⵎⵙⴰⵙⴰ ⴷ ⵜⴷⵉⵏⴰⵎⵉⵜ ⵏ ⵡⴰⵏⵏⴰⵍ ⵉⵔⵏⵏⵓⵏ ⵉⵔⵉⵡⵏ ⵏ ⵜⵎⵙⴰⵔⵜ ⵏ ⵜⵎⵓⵏⵜ ⵜⴰⵎⵓⵔⴰⵏⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵏⵏⴰ ⵉⵎⵎⴰⵍⵏ ⴰⵡⵡⴰⵙ ⵏ ⵜⵓⴳⴷⵜ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ ⴷ ⵡⴰⵎⵓⵏ ⴰⴳⵔⴰⵖⵍⴰⵏ ⵉ ⵉⵥⵕⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ ⵉ ⵉⵎⴰⵍ ⵏ ⵜⵏⵣⵔⵓⴼⵜ ⵜⴰⵎⵖⵔⴰⴱⵉⵜ ⵙ ⵇⴰⵃ ⵉⵎⵏⵉⴷⵏ ⵏⵏⵙ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴳⵎⴰ.
ⵙⴳ ⵜⵏⵉⵍⴰ ⵏⵏⵙ ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵜⴳⵔⵓⵎⵎⴰ ⵜⴰⴷⵎⵙⴰⵏⵜ ⴷ ⵜⵓⴷⵔⵉⵎⵜ ⵏ ⵡⴰⵎⵎⴰⵙ ⵏ ⵡⴰⴼⵔⵉⵇⵢⴰ ⵎⴰⵙⵙ ⵉⴼⴰⵔⵉⵙⵜ ⵏⴳⴰⵎⴰⵏⴰ ⴰⵙⵏⵉⵎⵎⵔ ⵏⵏⵙ ⵉ ⵜⵙⵏⵜⴰⵢⵜ ⵏ ⵜⵖⵓⵔⵉ ⵏⵏⵙ ⵜⴰⴼⴰ ⴰⴷ ⵉⵙⴽⵔ ⴰⵔⵣⴰⴼ ⴰⴷ ⵎⵓ ⵢⴰⵜⵜⵓⵢ ⵓⵙⵡⵉⵔ, ⴰⵀⴰ ⵉⵙⵙⵉⵡⵍ ⵅⴼ ⵓⴱⵓⵔⵣ ⵏⵏⵙ ⵙ ⵉⵥⵕⵉ ⵓⵏⵥⵉⵥ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵢⴰⵔⵢ ⵕⴱⴱⵉ ⴷ ⵜⵣⵎⵎⴰⵔ ⵏⵏⵙ ⵉⵙⵓⵍⵏ ⵜⴰⴼⴰ ⴰⴷ ⵢⵉⵍⵉ ⵓⵙⵏⵄⵜ ⵏ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵓⵎⵢⴰⵡⴰⵙ ⴰⵙⴳⴰⵡⴰⵏ, ⴰⵀⴰ ⵉⵙⵙⵉⵡⵍ ⵅⴼ ⵓⵙⵓⵊⴷ ⵏⵏⵙ ⵉⵙⵎⴷⵏ ⵜⴰⴼⴰ ⴰⴷ ⵜⵇⵇⵉⵎ ⵜⵡⵓⵔⵉ ⵅⴼ ⵓⵙⴷⵓⵙ ⵏ ⵉⵙⵖⵡ&ⵏ ⵉⴷⵓⵙⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵉⵡⴰⵏⴽⵏ ⵏ ⵜⴳⵔⵓⵎⵎⴰ.
ⵍⵍⵉⴳ ⵉⵙⵏⵄⵜ ⵜⵉⵍⴰⵍ ⵜⵉⵏⴼⵔⴰⵔⵉⵏ ⵉⵍⴰⵏ ⵖⵔ ⵜⴳⵔⵓⵎⵎⴰ ⴷ ⵓⵙⵎⵓⵙⵙⵓ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⵉⵙⴷⴷⵉⴷ ⵓⵎⵙⵜⴳⴳⴰⵔ ⴰⴼⵔⵉⵇⵉ ⵉⵙ ⴷⴰ ⵉⴷⵔⵔⵓ ⵓⴱⵕⵍⴰⵎⴰⵏ ⵏ ⵜⴳⵓⵎⵎⴰ ⵉⵎⵓⵣⵔⵏ ⵏ ⵉⵡⴰⵏⴽⵏ ⴳ ⵜⵣⵎⵎⴰⵔ ⵏ ⵡⴰⴷⴰⵙ ⵏ ⵉⵎⵓⵖⵍⵉⵜⵏ ⵏⴳⵔ ⵉⵎⴰⴷⴰⵏⵏ ⴷ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴷ ⵓⴳⵜⵉⵔⴰⵏ, ⴰⵀⴰ ⵉⵙⵏⵄⵜ ⴳ ⵓⵎⵏⴰⴹ ⴰⴷ ⴰⵙⵙⴱⵖⵔ ⵉⵍⵍⴰⵏ ⵖⵔ ⵉⵡⴰⵏⴽⵏ ⵏ ⵜⴳⵓⵎⵎⴰ ⴳ ⵓⵎⵢⴰⵡⴰⵙ ⴰⴽⴷ ⵍⵎⵖⵔⵉⴱ ⵍⵓⵎⵎⵏ ⴳ ⵉⴳⵔⴰⵏ ⵏ ⵜⵥⴹⴰⵕⵜ ⴷ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ ⴰⵡⴷ ⴳ ⵢⵉⴳⵔ ⴰⴷⵉⴱⵍⵓⵎⴰⵙⵉ, ⴰⵀⴰ ⵢⵓⵍⵖ ⵜⵉⵙⵏⵜⴰⵢⵉⵏ ⵜⵉⵏⴼⵔⴰⵔⵉⵏ ⵏⵏⴰ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴹⵓ ⵕⴱⴱⵉ ⵜⴰⴼⴰ ⴰⴷ ⵢⵉⵍⵉ ⵓⵙⵖⵓⴷⵓ ⵏ ⵓⵎⵢⴰⵡⴰⵙ ⴰⴼⵔⵉⵇⵉ ⵉⴳⴳⵓⴷⵉⵏ ⵏⵏⴰ ⴳⵉⵙⵏⵜ ⵜⵣⵡⴰⵔ ⵜⵏⵏⴰ ⵉⵣⴷⵉⵏ ⴷ ⵓⵙⵓⵜⴳ ⵏ ⵓⵎⵏⵉⴷ ⴰⵟⵍⴰⵏⵜⵉ ⴰⴼⵔⵉⵇⵉ ⴷ ⵓⵙⴽⴰⵔ ⵏ ⵓⵙⵍⴷⴰ ⵏ ⵓⴳⴰⵣ ⴰⴼⵔⵉⵇⵉ ⴰⵟⵍⴰⵏⵜⵉ.
ⴰⵀⴰ ⵉⵏⵏⴰ ⵎⴰⵙⵙ ⵉⴼⴰⵔⵉⵙⵜ ⵏⴳⴰⵎⴰⵏⴰ ⵉⵙ ⴰⵏⵏⴰⵍ ⵏ ⵜⴳⵔⵓⵎⵎⴰ ⵉ ⵉⵙⵏⵜⴰⵢ ⴰⴷ ⵔⴰⴷ ⵢⴰⵎⵥ ⵉⵎⵏⴰⴷⵏ ⵉⵎⵇⵔⴰⵏⵏ ⴳ ⵉⵎⴰⵍ ⴳ ⵜⵉⵣⵉ ⵏ ⵡⴰⴷⴰⴼ ⵏ ⵙⵎⵎⵓⵙ ⵏ ⵉⵡⴰⵏⴽⵏ ⵖⵔ ⵜⴳⵎⴰⵎⵜ ⵏ ⵜⴳⵔⵓⵎⵎⴰ.