ⵙ ⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⴰⵡⴷ ⴳ ⵓⵙⴰⵜⵉ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ ⴽⵕⴰⴹ ⵡⴰⴳⵏⴰⵔⵏ ⵏ ⵜⵓⵚⴽⴰ ⵏ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵔ ⵉⵙⵏⵎⴰⵍⴰ ⵓⴱⵕⵍⴰⵎⴰⵏ ⵙ ⵉⵙⵇⵇⵉⵎⵏ ⵏⵏⵙ ⵙⵉⵏ ⵉⴳⴰⵏ ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵢⴰⵏ ⵓⵙⴼⵙⵔ ⵏ ⵜⵡⵍⴰⴼⵉⵏ ⴷ ⵜⵏⵜⴰⵎⵉⵏ, ⴷ ⵢⴰⵜ ⵜⵉⵏⴰⵡⵜ ⵜⴰⵏⴰⵎⵓⵔⵜ ⴰⵙⵙ ⵏ ⵡⴰⴽⵕⴰⵙ 17 ⵉⵏⵏⴰⵢⵔ 2024 ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ ⴳ ⵕⵕⴱⴰⵟ.
ⴰⵔ ⵉⵙⵏⵄⴰⵜ ⵓⵙⴼⵙⵔ ⵏ ⵜⵡⵍⴰⴼⵉⵏ ⴷ ⵜⵏⵜⴰⵎⵉⵏ, ⵏⵏⴰ ⵉⵜⵜⴰⵡⵙⵏⵎⴰⵍⴰⵏ ⵙ ⵓⴷⵔⴰⵡ ⴰⴽⴷ ⵜⵎⵔⵙⵍⵜ ⵏ ⵜⵎⵃⴹⵉⵜ ⵏ ⵍⵎⵖⵔⵉⴱ, ⵉⵙⵔⴰⵙ ⵉⴷⵙⵍⴰⵏⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵏⵏⴰ ⵉⵎⵓⵏⵏ ⵙⴳ ⵜⵣⵡⵉⵔⴰ ⴰⴽⴷ ⵓⴱⵓⵖⵍⵓ ⴰⵎⵔⵙⴰⵍ ⴷ ⵓⴷⵉⵎⵓⵇⵕⴰⵟⵉ ⴷ ⵓⵏⴰⵎⵓⵏ ⵏ ⵜⵎⵓⵔⵜ ⵏⵏⵖ, ⵙⴳ ⵜⵉⵣⵉ ⵏ ⵓⵙⵔⵓⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵎⵛⴰⵡⴰⵕ ⴳ ⵓⵙⴳⴳⵯⴰⵙ ⵏ 1956, ⵏⵏⴰ ⵉⴳⴰⵏ ⵜⵉⴼⵔⵉⵙⵜ ⵜⴰⵎⵣⵡⴰⵔⵓⵜ ⵏ ⵓⴱⵕⵍⴰⵎⴰⵏ ⴰⵎⵖⵔⴰⴱⵉ ⵙ ⵜⵙⵏⵜⴰⵢⵜ ⵏ ⵉⴳⵍⵍⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵙⵎⵎⵓⵙ ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ, ⴰⵔ ⵜⵉⵣⵉ ⵏ ⵓⵙⵖⵣⵏ ⵏ ⵓⴷⵓⵙⵜⵓⵔ ⴰⵎⵣⵡⴰⵔⵓ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⴰⵙⴽⴰⵔ ⵏ ⵉⵙⵜⴰⵢⵏ ⵏⵏⴰ ⴳ ⴷ ⵉⴼⴼⵓⵖ ⵓⴱⵕⵍⴰⵎⴰⵏ ⴰⵎⵣⵡⴰⵔⵓ ⵏⵏⴰ ⵉⵙⵎⵓⵏⴰⵏ ⵙⵉⵏ ⵉⵙⵇⵇⵉⵎⵏ, ⴰⴷ ⵜⵏ ⵉⴳⴰⵏ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵓⵙⴳⴳⵯⴰⵙ ⵏ 1963 ⴳ ⵜⵉⵣⵉ ⵏ ⵉⴳⵍⵍⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙ ⵙⵉⵏ ⵜⴰⵎⵍⵍⴰ ⵏ ⵕⴱⴱⵉ ⴼⵍⵍⴰⵙ, ⴰⵔ ⵉⵙⴳⴳⴷⵏ ⵉⵖⴱⴰⵏ ⴷ ⵜⴳⵎⵉ ⵜⴰⵖⵣⵓⵔⴰⵏⵜ ⵎⵓ ⴳⴳⵓⵜⵏ ⵉⵎⵏⵉⴷⵏ ⵏⵏⴰ ⵅⴼ ⴰ ⵉⵜⵜⴱⴷⴰⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ.
ⴰⵔ ⵜⵜⵎⴹⴰⴽⴰⵕⵏ ⵉⵎⴷⵔⴰⵡⵏ ⴳ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵅⴼ ⵙⵉⵏ ⵉⵎⵔⵙⵉⵜⵏ ⵉⴷⵙⵍⴰⵏⵏ ⵉⵣⴷⵉⵏ ⴷ "ⵓⴱⵓⵖⵍⵓ ⴰⴷⵙⵜⴰⵔ ⵏ ⵜⵓⵚⴽⵉⵡⵜ ⴷ ⵜⵙⵖⴰⵏ ⵏ ⵓⴱⵕⵍⴰⵎⴰⵏ" ⴷ "ⵜⴰⵏⵏⴰⵍⵉⵏ ⴷ ⵜⵏⵥⴰⵕ ⴷ ⵉⵎⵏⵉⴷⵏ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ".
ⵔⴰⴷ ⵙⴰⵡⵍⵏ ⵉⵎⵔⵣⵓⵜⵏ ⴷ ⵉⵎⵥⵍⴰⵢⵏ ⴳ ⵜⴳⵉⵡⵔⵜ ⵜⴰⵎⵣⵡⴰⵔⵓⵜ ⵅⴼ ⵓⵏⴳⵔⴰⵡ ⵏ ⵜⵙⵉⵏⵔⴰⵏⵜ ⵜⴰⴱⵕⴰⵎⴰⵏⵉⵜ ⴳ ⵍⵎⵖⵔⵉⴱ, ⴷ ⵜⵙⵇⵇⴰⵏ ⵏⴳⵔ ⵜⵏⴱⴰⴹⵜ ⵜⵓⵣⵔⵉⴼⵜ ⴷ ⵜⵎⵣⵣⴳⴰⵔⵜ, ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵖⵉⴽⵍⵍⵉ ⵔⴰⴷ ⵜⵙⴰⵡⵍ ⵜⴳⵉⵡⵔⵜ ⵜⵉⵙ ⵙⵏⴰⵜ ⵅⴼ ⵜⵙⵇⵇⴰⵏ ⵏⴳⵔ ⵓⴱⵕⵍⴰⵎⴰⵏ ⴷ ⵜⵎⵙⴽⵔⵜ ⵜⴰⴷⵉⵎⵓⵇⵕⴰⵟⵉⵜ, ⴷ "ⵓⴱⵕⵍⴰⵎⴰⵏ ⵉⵏⵏⵓⵕⵥⵎⵏ", ⴷ ⵜⵏⵥⴰⵕ ⵉⵣⴷⵉⵏ ⴷ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ.
ⴰⵀⴰ ⴰⴷ ⵢⵉⵍⵉ ⵓⵙⵎⵖⵔ ⵙ ⵙⵏⴰⵜ ⵏ ⵜⴱⵕⵍⴰⵎⴰⵏⵉⵢⵉⵏ ⵉⵣⵔⵉⵏ, ⴰⴷ ⵜⵜⵏⵜ ⵉⴳⴰⵏ ⴷ ⵎⴰⵙⵙⴰ ⴱⴰⴷⵉⵄⴰ ⵚⵚⵇⵍⵍⵉ ⴷ ⵍⴰⵟⵉⴼⴰ ⴱⵏⵏⴰⵏⵉ ⵙⵎⵉⵔⵙ, ⵍⵍⵉ ⵉⴳⴰⵏ ⵙⵏⴰⵜ ⵜⵎⵖⴰⵔⵉⵏ ⵜⵉⵎⵣⵡⵓⵔⴰ ⵍⵍⵉ ⵉⵜⵜⴰⵡⵙⵜⴰⵢⵏ ⴳ ⵓⴱⵕⵍⴰⵎⴰⵏ ⴰⵎⵖⵔⴰⴱⵉ ⴳ ⵉⵙⴳⴳⵯⴰⵙⵏ ⵏ 90 ⴳ ⵜⴰⵙⵓⵜ ⵉⵣⵔⵉⵏ.