ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⵙⵉⵏⴰⵙ 23 ⵉⵏⵏⴰⵢⵔ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵎⴰⵙⵙ ⴰⵍⵉⴽⵙⴰⵏⴷⵔ ⴽⵉⴷⵓ ⵍⵓⴱⵉⵣ ⴱⴰⵕⵓⵍⴰ, ⴰⵎⵙⵇⴰⴷ ⴰⴱⵔⴳⵏⵙⴰⵙ ⵏ ⵜⴳⴷⵓⴷⴰⵏⵜ ⵏ ⵍⴱⵕⴰⵥⵉⵍ ⵉⵎⵓⵏⵏ ⴳ ⵍⵎⵖⵔⵉⴱ.
ⴳ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ ⴰⴷ, ⵢⵓⵍⵖ ⵎⴰⵙⵙ ⴰⵏⵙⵙⵉⵅⴼ ⵜⵉⵙⵇⵇⴰⵏ ⵉⵀⵢⵢⴰⵏ ⵏⴳⵔ ⵕⵕⴱⴰⵟ ⴷ ⴱⵕⴰⵥⵉⵍⵢⴰ, ⵏⵏⴰ ⵉⵜⵜⴰⵖⵓⵍⵏ ⵖⵔ ⵜⴰⵙⵓⵜ ⵜⵉⵙ 19, ⵍⵍⵉⴳ ⵉⴳⴰ ⵍⵎⵖⵔⵉⴱ ⵜⴰⵎⵓⵔⵜ ⵜⴰⴼⵔⵉⵇⵉⵜ ⵜⴰⵎⵣⵡⴰⵔⵓⵜ ⵉⵙⵇⵔⵔⵏ ⵙ ⵜⵙⵉⵎⴰⵏⵜ ⵏ ⵍⴱⵕⴰⵥⵉⵍ ⴳ ⵓⵙⴳⴳⵯⴰⵙ ⵏ 1822.
ⵍⵍⵉⴳ ⵉⵙⴰⵡⵍ ⵅⴼ ⵎⵏⵏⴰⵡ ⵉⵙⵔⴰⵙ ⵏ ⵓⴷⵔⴰⵡ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵙ ⵓⵔⵣⴰⴼ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵖⵔ ⵜⴳⴷⵓⴷⴰⵏⵜ ⵏ ⵍⴱⵕⴰⵥⵉⵍ ⴳ ⵓⵙⴳⴳⵯⴰⵙ ⵏ 2004, ⴷ ⵉⵎⵏⵉⴷⵏ ⵉⵎⵓⴼⴰⵢⵏ ⵏⵏⴰ ⵉⵕⵥⵎ ⵡⴰⵔⵣⴰⴼ ⴰⴷ ⴳ ⵓⵙⴱⵓⵖⵍⵓ ⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵏⴳⵔ ⵙⵏⴰⵜ ⵏ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ.
ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⴰⵜⵉⴳ ⴰⵏⴼⵔⴰⵔ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵜⵖⴰⵔⴰⵙⵜ ⵏ ⵓⵙⵎⵓⵙⵙⵓ ⵏ ⵜⴳⵔⵓⵎⵎⴰ ⵏ ⵜⵉⴷⴷⵓⴽⴽⵍⴰ ⵏⴳⵔ ⵍⵎⵖⵔⵉⴱ ⴷ ⵍⴱⵕⴰⵥⵉⵍ, ⴷ ⵓⵙⵎⵀⵍ ⵏ ⵜⵎⵙⵙⴽⵜⴰⵢ ⵏ ⵓⵎⵙⴰⵙⴰ ⵉⵜⵜⴰⵡⵙⴳⵎⴰⴹⵏ. ⵖⵉⴽⵍⵍⵉ ⵉⵙⵙⵓⵎⵔ ⵎⴰⵙⵙ ⴰⵏⵙⵙⵉⵅⴼ ⴰⴷ ⵉⵜⵜⴰⵡⵙⴽⴰⵔ ⵢⴰⵏ ⵓⵙⴳⵔⴰⵡ ⴰⴷⵎⵙⴰⵏ ⴰⴱⵕⵍⴰⵎⴰⵏⵉ ⴰⴼⴰⴷ ⴰⴷ ⵢⵉⵍⵉ ⵓⵙⵙⴰⵔⵓ ⵏ ⵉⵣⵎⵣⵣⴰ ⵏ ⵓⵎⵢⴰⵡⴰⵙ ⵉⵍⵍⴰⵏ ⴳ ⵎⵏⵏⴰⵡ ⵉⴳⵔⴰⵏ.
ⵎⴽⴷⴰ ⵉⵏⵏⵓⵔⵣ ⵎⴰⵙⵙ ⴰⵏⵙⵙⵉⵅⴼ ⴰⴷ ⵜⵉⵍⵉ ⵜⴰⵣⵣⴰⵣⵜ ⵏ ⵉⵎⵀⴰⵡⴰⴹⵏ ⵅⴼ ⵜⵎⵢⴰⵇⵇⴰⵏⵉⵏ ⵏ ⵓⵎⵎⵙⴽⴰⵍ ⵉⵍⴻⵍⵍⵉ ⵏⴳⵔ ⵜⵎⵓⵏⵜ ⵏ ⵎⵉⵔⴽⵓⵙⵓⵔ ⴷ ⵍⵎⵖⵔⵉⴱ, ⴰⵀⴰ ⵉⵙⵙⴽⵜⵉ ⴷ ⵙ ⵡⴰⵜⵉⴳ ⵏ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵜⴰⵎⴳⴳⴰⵔⵓⵜ ⵉⵡⴰⵜⵜⵙⵏ ⴰⵙⴷⵓⵙ ⵏ ⵡⴰⴷⴰⴼ ⵏ ⵜⵎⵉⵣⴰⵔ ⵏ ⵜⴰⵖⴰⵔⵜ ⵖⵔ ⵓⴳⴰⵔⵓ ⴰⵟⵍⴰⵏⵜⵉ.
ⵙⴳ ⵜⵏⵉⵍⴰ ⵏⵏⵙ ⵢⵓⵍⵖ ⵎⴰⵙⵙ ⴰⵎⵙⵇⴰⴷ ⵜⵉⵕⵡⵉ ⴷ ⵜⵖⴱⵉ ⵏ ⵜⵙⵇⵇⴰⵏ ⵏⴳⵔ ⵍⵎⵖⵔⵉⴱ ⴷ ⵍⴱⵕⴰⵥⵉⵍ, ⵏⵏⴰ ⵉⴱⵓⵖⵍⴰⵏ ⵎⵍⵉⵃ ⴳ ⵉⵙⴳⴳⵯⴰⵙⵏ ⴰⴷ ⵉⵎⴳⴳⵓⵔⴰ ⵙ ⵜⵖⴰⵔⴰⵙⵜ ⵏ ⵜⵎⵢⴰⵇⵇⴰⵏⵉⵏ ⵉⵜⵜⴰⵡⵙⴳⵎⴰⴹⵏ ⴳ ⵎⵏⵏⴰⵡ ⵉⴳⵔⴰⵏ, ⵎⴰⵛⴰ ⵉⵙⴷⴷⵉⴷ ⵎⴰⵙ ⵜⴱⴷⴷ ⵜⵎⴰⵣⵉⵔⵜ ⵏⵏⵙ ⵅⴼ ⵓⵙⴱⵓⵖⵍⵓ ⵏ ⵉⵙⵏⵜⴰⵢ ⵏ ⵓⵎⵢⴰⵡⴰⵙ ⴰⴽⴷ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵙⵉⵍⵉ ⵏⵏⵙ ⵖⵔ ⵢⴰⵏ ⵓⵙⵡⵉⵔ ⵉⵖⵓⴷⴰⵏ ⵏ ⵓⴷⵔⴰⵡ ⴰⵖⵣⵓⵔⴰⵏ.
ⵎⴽⴷⴰ ⵉⵙⴷⴷⵉⴷ ⵎⴰⵙⵙ ⴰⵎⵙⵇⴰⴷ ⵎⴰⵙ ⵜⴼⴽⴰ ⵍⴱⵕⴰⵥⵉⵍ ⴰⵜⵉⴳ ⵉⵅⴰⵜⵔⵏ ⵉ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵜⴰⵎⴳⴳⴰⵔⵓⵜ, ⵏⵏⴰ ⵉⵙⴷⴷⵉⴷⵏ ⴰⴷⵖⴰⵔ ⵏ ⵍⵎⵖⵔⵉⴱ ⴰⵎ ⵜⴳⴳⵓⵔⵜ ⵖⵔ ⵓⵎⵏⵥⴰⵡ ⴰⴼⵔⵉⵇⵉ ⴷ ⵢⴰⵜ ⵜⴷⴽⴽⵯⴰⵏⵜ ⵏ ⵡⴰⴷⴰⴼ ⵖⵔ ⵉⴳⴰⴷⴰⵣⵏ ⵏⵏⵙ. ⴷⴰⵢ ⵉⵙⵙⵉⵡⵍ ⵎⴰⵙⵙ ⴰⵎⵙⵇⴰⴷ ⵅⴼ ⵓⵎⵙⴰⵙⴰ ⵏⵏⵙ ⴰⴽⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵎⴰⴷ ⵉⵣⴷⵉⵏ ⴷ ⵜⵙⵓⵎⵔⵜ ⵏⵏⵙ ⵉⵀⵢⵢⴰⵏ ⵙ ⵓⵙⴽⴰⵔ ⵏ ⵢⴰⵏ ⵓⵙⴳⵔⴰⵡ ⴰⴷⵎⵙⴰⵏ ⴰⴱⵕⵍⴰⵎⴰⵏⵉ ⵏⴳⵔ ⵙⵏⴰⵜ ⵏ ⵜⴼⵓⵍⵉⵏ, ⴰⵀⴰ ⵉⵙⴷⴷⵉⴷ ⴳ ⵓⵙⴰⵜⵉ ⴰⴷ ⵜⵉⵣⵎⵎⴰⵔ ⵜⵉⵎⵇⵔⴰⵏⵉⵏ ⵏⵏⴰ ⵜⵏⵜ ⵉⵜⵜⴳⴳⴰ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⵙⵇⵇⴰⵏ ⵏⴳⵔ ⵍⵎⵖⵔⵉⴱ ⴷ ⵍⴱⵕⴰⵥⵉⵍ ⴷ ⴰⴷ ⴱⵓⵖⵍⵓⵏⵜ ⴳⵉⵏⵜ ⵜⵓⵙⵍⵉⴷⵉⵏ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵡⴷ ⵢⴰⵏ ⵓⵣⵎⵣⵣⵓ ⵏ ⵓⵙⵎⴰⵍ ⵏ ⵓⴷⵖⴰⵔ ⵏ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴳ ⵓⵎⵓⵖⵍⵉ ⴰⵎⵔⵙⴰⵍ ⴳ ⵙⵏⴰⵜ ⵏ ⵜⵎⵉⵣⴰⵔ ⴷ ⵜⵉⵍⴰⵍⵉⵏ ⵜⵉⵏⴼⵔⴰⵔⵉⵏ ⵏⵏⴰ ⵜⵥⴹⴰⵕ ⴰⴷ ⵜⵏⵜ ⵜⵙⴽⵔ ⴳ ⵜⴳⴳⴰⵥⵜ ⵏ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ ⴷ ⵓⵙⴱⵓⵖⵍⵓ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵙⴷⵓⵙ ⵏ ⵜⵙⵇⵇⴰⵏ ⴰⴽⴷ ⵉⴱⵕⵍⴰⵎⴰⵏⵏ ⵉⵙⴳⴰⵡⴰⵏⵏ ⴷ ⵉⵎⵏⵥⴰⵡⵏ.