ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⵢⵏⴰⵙ 13 ⵏⵓⵡⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⴰⵎⴰⵡⵙⴰⵙ ⴰⴷⵔⵉⴱⵉⴷⵊⴰⵏⵉ ⵏ ⴱⵕⵕⴰ ⵎⴰⵙⵙ ⵊⵉⵀⵓⵏ ⴱⵉⵔⴰⵎⵓⴼ ⵏⵏⴰ ⵉⵙⴽⴰⵔⵏ ⵓⵙⵙⴰⵏ ⴰⴷ ⵢⴰⵏ ⵓⵔⵣⴰⴼ ⴰⵎⴰⴷⴷⵓⴷ ⵉ ⵜⴳⵍⴷⵉⵜ.
ⴳ ⵓⵙⵏⵓⴱⴳ ⴰⴷ ⵙⴽⵔⵏⵜ ⵙⵏⴰⵜ ⵏ ⵜⴼⵓⵍⵉⵏ ⴽⵔⴰ ⵏ ⵉⵎⴹⴰⴽⴰⵕⵏ ⵏⵏⴰ ⴷⵉⴳⵙⵏ ⵙⴷⴷⵉⴷⵏⵜ ⴰⵥⵓⵥⴹ ⵉⴷⵓⵙⵏ ⵏⵏⴰ ⵉⵙⵙⴰⵡⴰⴹⵏ ⵙⵉⵏ ⵉⵡⴰⵏⴽⵏ ⵖⵔ ⵓⵙⴷⵓⵙ ⵏ ⵜⵙⵇⵇⴰⵏ ⵏⵏⵙⵏ ⴷ ⵜⵉⴽⴽⵉ ⵏ ⵢⴰⵏ ⵡⵓⵏⴼⵓⵙ ⴰⵎⴰⵢⵏⵓ ⵉ ⵓⵎⵢⴰⵡⴰⵙ ⵏⵏⵙⵏ ⴰⵙⵉⵏⵔⴰⵏ ⴳ ⵜⵓⴳⵜⵜ ⵏ ⵉⴳⵔⴰⵏ, ⵙ ⵜⵉⴽⴽⵉ ⵏ ⵜⵉⵣⵉ ⵉⵎⵙⴰⵙⴰⵏ ⵉ ⵓⵎⵏⵉⴷ ⴰⴱⵕⵍⴰⵎⴰⵏⵉ ⴳ ⵜⵎⵓⵏⵜ ⴷ ⵜⴳⴳⴰⵥⵜ ⵏ ⵜⵙⵇⵇⴰⵏ ⴰⴷ.
ⴳ ⵓⵙⴰⵜⵉ ⴰⴷ ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵜⵓⵎⵔⵜ ⵏⵏⵙ ⵙ ⵓⵔⵣⴰⴼ ⴰⴷ ⵏⵏⴰ ⵉⵙⵏⵄⴰⵜⵏ ⴰⴳⴳⴰⴹ ⵏ ⵜⵙⵇⵇⴰⵏ ⵉⵀⵢⵢⴰⵏ ⵊⴰⵔ ⵙⵉⵏ ⵉⵡⴰⵏⴽⵏ ⴰⵡⵎⴰⵜⵏ, ⵉⴱⴷⴷⵏ ⵅⴼ ⵓⵎⵢⴰⵡⴰⵙ ⴷ ⵜⵡⵉⵙⵉ ⴷ ⵓⵣⵔⴰⴽ ⴰⵎⵢⴰⵖ. ⴰⵀⴰ ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⴰⵣⴰⵔⵓ ⴰⵊⵖⵔⴰⴼⵉ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⵡⴰⴷⵔⵉⴱⵉⴷⵊⴰⵏ ⵇⴰⵃ ⵓⵔ ⵉⴳⵉ ⵜⴰⴱⴱⴰⵢⴹⴰⵕⵜ ⵎⵏⵉⴷ ⵏ ⵓⴱⵓⵖⵍⵓ ⵏ ⵜⵙⵇⵇⴰⵏ ⴰⴷ ⴷ ⵜⵉⵥⵉⵍⵜ ⵏⵏⵙⵏⵜ.
ⴷⴼⴼⵉⵔ ⵏ ⵓⵙⵏⵄⵜ ⵏ ⵜⵙⴰⵡⵔⵉⵏ ⵜⵉⵎⵇⵇⵔⴰⵏⵉⵏ ⵏⵏⴰ ⴳ ⵜⵍⵜⵖ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷⴷⴰⵡ ⵏ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⵉⵙⵙⵉⵡⵍ ⵎⴰⵙⵙ ⴰⵏⵙⵙⵉⵅⴼ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴼⴰⴷ ⴰⴷ ⵉⵎⵓⵏ ⴰⴽⴷ ⵜⵣⵎⵎⴰⵔ ⵉⵡⴰⵜⵜⵙⵏ ⵜⵉⴳⵎⵉ ⴷ ⵓⵙⴷⵓⵙ ⵏ ⵓⴱⵓⵖⵍⵓ ⵓⵎⵏⵉⴳ ⵏ ⵢⵉⴳⵔ ⴰⴷⵎⵙⴰⵏ ⴷ ⵓⵏⵙⴱⴰⴱ ⴳ ⵜⵙⵇⵇⴰⵏ ⵜⵉⵙⵉⵏⵔⴰⵏⵉⵏ, ⴷ ⵓⵢⵏⵏⴰ ⵙ ⵜⵏⴼⴰⵍⵉⵜ ⵏⵏⵙ ⵏⵏⴰ ⴷⵉⴳⵙ ⵢⴰⵜ ⵜⵉⵍⵉⵜ ⵉⴷⵓⵙⵏ ⵏ ⵉⵎⵙⵙⵏⵜⵉⵢⵏ ⴷ ⵉⵔⴳⴰⵣⵏ ⵏ ⵜⵡⵓⵔⵉ.
ⴳ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵜ ⵜⴰⵏⴰⵎⵓⵔⵜ, ⵉⵙⵏⵉⵎⵎⵔ ⵎⴰⵙⵙ ⴰⵏⵙⵙⵉⵅⴼ ⴰⴷⴷⴰⴷ ⵏ ⵜⴳⴷⵓⴷⴰⵏⵜ ⵏ ⵡⴰⴷⵔⵉⴱⵉⴷⵊⴰⵏ ⵉⵕⵚⴰⵏ ⵉⵙⵙⴷⵡⴰⵙⵏ ⵜⴰⵎⵓⵏⵜ ⵜⴰⵎⵓⵔⴰⵏⵜ ⵏ ⵍⵎⵖⵔⵉⴱ ⴷ ⵓⴱⴰⴹ ⵏⵏⵙ ⵅⴼ ⵜⵏⵣⵔⵓⴼⵜ ⵏⵏⵙ, ⴰⵀⴰ ⵉⵙⴷⴷⵉⴷ ⵙⴳ ⵜⵏⵉⵍⴰ ⵢⴰⴹⵏ ⵜⴰⵙⵓⵍⵜ ⵏ ⵡⴰⵏⵏⴰⵍ ⴰⵎⵖⵔⴰⴱⵉ ⵉ ⵡⴰⴷⵔⵉⴱⵉⴷⵊⴰⵏ ⴳ ⵜⵓⴳⵜⵜ ⵏ ⵜⴼⵓⴳⵍⵉⵡⵉⵏ ⵜⵉⴳⵔⴰⵖⵍⴰⵏⵉⵏ.
ⵙⴳ ⵜⵏⵉⵍⴰ ⵏⵏⵙ, ⵉⵙⵙⵉⵡⵍ ⵓⵎⴰⵡⵙⴰⵙ ⵏ ⴱⵕⵕⴰ ⵏ ⵡⴰⴷⵔⵓⴱⵉⴷⵊⴰⵏ ⵅⴼ ⵓⴱⵓⵔⵣ ⵏⵏⵙ ⵙ ⵓⵔⵣⴰⴼ ⴰⴷ, ⴰⵀⴰ ⵢⵓⵍⵖ ⴰⵙⵡⵉⵔ ⵉⵖⵓⴷⴰⵏ ⵏ ⵜⵙⵇⵇⴰⵏ ⵜⵉⵙⵔⵜⴰⵏⵉⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ. ⵖⵉⴽⵍⵍⵉ ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴰ ⵉⵙⵙⵉⵅⵉⴼ ⵢⴰⵏ ⵓⴽⴰⴱⴰⵕ ⴰⵏⴼⵔⴰⵔ ⵅⴼ ⵓⵔⵣⴰⴼ ⵏⵏⵙ ⵉ ⵍⵎⵖⵔⵉⴱ ⵃⵎⴰ ⴰⴷ ⵉⵔⵏⵓ ⴰⴱⵓⵖⵍⵓ ⵏ ⵜⵙⵇⵇⴰⵏ ⵜⵉⴷⵎⵙⴰⵏⵉⵏ ⴷ ⵜⵏⵙⴱⴰⴱⵉⵏ ⴷ ⵜⴷⵍⵙⴰⵏⵉⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ, ⴷ ⵓⵙⵙⴰⵔⵓ ⵏ ⵇⴰⵃ ⴰⵎⵎⴰⴽⵏ ⴷ ⵉⵣⵎⵣⵣⴰ ⵉⵍⵍⴰⵏ ⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳ ⵜⵓⴳⵜⵜ ⵏ ⵉⴳⵔⴰⵏ.
ⵎⴽⴷⴰ ⵉⵙⴷⴷⵉⴷ ⵎⴰⵙ ⵊⵉⵀⵓⵏ ⴱⵉⵔⴰⵎⵓⴼ ⵎⴰⵙ ⴷ ⵉⵇⵇⴰⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵓⵣⵔⵉⴼⵉⵏ ⵏ ⵍⵎⵖⵔⵉⴱ ⴷ ⵡⴰⴷⵔⵉⴱⵉⴷⵊⴰⵏ ⵙ ⵙⵏⴰⵜ, ⵙⵍⴰⵡⴰⵏ ⴰⴽⴽⵯ ⵙ ⵜⵖⴰⵔⴰⵙⵜ ⵏ ⵜⴳⵔⵓⵎⵎⴰⵡⵉⵏ ⵏ ⵜⵉⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ, ⴰⵡⴷ ⴰⵣⴷⴷⵓⵢ ⵊⴰⵊ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴳⵜⵉⵔⴰⵏⵉⵏ.