ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⴰⵎ ⵎⴰⵢⵢⴰⵔⴰ ⴰⵎⵙⵇⴰⴷ ⵏ ⵎⵉⵔⵉⴽⴰⵏ ⵎⴰⵙⵙ ⴱⵓⵏⵉⵜ ⵜⴰⵍⵡⴰⵕ ⴳ ⵡⴰⵙⵙ ⵏ ⵓⵙⵉⵏⴰⵙ 13 ⵛⵓⵜⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ.
ⴳ ⵜⵉⵣⵡⵉⵔⴰ ⵏ ⵓⵏⵎⵓⵇⵇⴰⵔ ⴰⴷ ⵉⵙⴰⵡⵍ ⵓⵎⵙⵇⴰⴷ ⵏ ⵎⵉⵔⵉⴽⴰⵏ ⵅⴼ ⵓⴼⵛⴰⴷ ⵏⵏⵙ ⵉⵣⴷⴷⵉⴳⵏ ⵉ ⵡⵓⵏⴳⵉⵙⵏ ⵏ ⵓⵏⴷⵓⴷⵉ ⵓⴽⵕⵉⴹ ⵏⵏⴰ ⵢⵓⵜⵏ ⴽⵉⴳⴰⵏ ⵏ ⵜⵙⴳⵉⵡⵉⵏ ⵏ ⵜⴳⵍⴷⵉⵜ, ⴷⴰⵢ ⵉⵙⴷⴷⵉⴷ ⴰⴱⴷⴷⵉ ⵏ ⵎⵉⵔⵉⴽⴰⵏ ⴰⴽⴷ ⵍⵎⵖⵔⵉⴱ ⴷ ⵎⴰⵙ ⵜⵓⵊⴰⴷ ⴰⴷ ⵜⵙⵎⵏⵉⴷ ⴽⵔⴰⵢⴳⴰⵜ ⴰⵏⴰⵡⵏ ⵏ ⵓⵙⴷⵓⵙ ⴷ ⵡⴰⵏⵏⴰⵍ ⵉⵥⵍⵉⵏ ⵙ ⵓⵙⴱⴷⴷⵉ ⵏ ⵉⴹⵉⵚⵏ ⵏ ⵓⵏⴷⵓⴷⵉ ⴰⴷ. ⵎⴽⴷⴰ ⵉⵙⵙⵓⵙⵎ ⵉ ⵎⴰⵙⵙ ⴰⵎⵙⵇⴰⴷ ⵉⵎⴰⵏ ⵏ ⵓⵎⵢⴰⵡⴰⵙ ⵉⵀⵢⵢⴰⵏ ⵉⵍⵍⴰⵏ ⵊⴰⵔ ⵉⵙⵎⵉⵍⵏ ⵏ ⵡⴰⵎⵓⵏ ⴰⵎⵖⵔⴰⴱⵉ, ⵉⵙⴷⴷⵉⴷ ⴰⵡⴷ ⵜⴰⵎⵢⵉⵎⴰⵏⵜ ⵏⵏⵙ ⴳ ⵜⵣⵎⵔⵜ ⵏ ⵉⵎⵖⵔⴰⴱⵉⵢⵏ ⵅⴼ ⵓⴼⵙⴰⵢ ⵏ ⵜⴰⵙⵙⴰⵙⵜ ⴰⴷ.
ⵙⴳ ⵜⵏⵉⵍⴰ ⵏⵏⵙ ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵖⵉⴽⵍⵍⵉ ⵢⵓⵍⵖ ⴰⴷⴷⴰⴷ ⵏ ⵎⵉⵔⵉⴽⴰⵏ ⴳ ⵜⵉⵣⵉ ⴰⴷ ⵉⵛⵇⵇⴰⵏ ⵍⵍⵉ ⴳ ⴰ ⵜⵣⵔⴰⵢ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴰⵢⵍⵍⵉ ⵉⵎⵎⴰⵍⴰⵏ ⵜⴰⵣⴷⴳⵉ ⴷ ⵡⴰⴳⴳⴰⴹ ⵏ ⵜⵙⵇⵇⴰⵏ ⵉⵍⵍⴰⵏ ⵊⴰⵔ ⵜⵎⵉⵣⴰⵔ ⵜⵉⵎⴷⴷⵓⴽⴽⴰⵍ ⵙ ⵙⵏⴰⵜ.
ⵙ ⵓⵣⵎⵣⵣⵓ ⴰⴷ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵅⴼ ⵜⵓⴳⵜ ⵏ ⵜⵎⴳⴳⵉⵢⵉⵏ ⵏ ⵓⵖⴰⵡⵍ ⵏⵏⴰ ⵙⴽⵔⵏ ⵡⴰⴱⴰⴹⵏ ⵉⵡⴰⵜⵜⵙⵏ ⴰⵙⴱⴷⴷⵉ ⵏ ⵉⴹⵉⵚⵏ ⵏ ⵜⵡⴰⵖⵉⵜ ⴰⴷ ⵜⴰⴳⴰⵎⴰⵏⵜ, ⵙ ⵓⵎⵙⴰⵙⴰ ⴷ ⵉⵙⵖⵍⴰⴼ ⵉⴳⵍⴷⴰⵏⵏ ⵢⴰⵜⵜⵓⵢⵏ.
ⴳ ⵓⵏⵎⵓⵇⵇⴰⵔ ⴰⴷ, ⵙⴷⴷⵉⴷⵏ ⵉⵏⴱⴷⴰⴷⵏ ⴰⴷ ⵙ ⵙⵉⵏ ⵜⵉⵖⴱⵉ ⵏ ⵜⵙⵇⵇⴰⵏ ⵏ ⵜⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵜⴰⵎⵖⵔⴰⴱⵉⵜ ⵜⴰⵎⵉⵔⵉⴽⴰⵏⵉⵜ, ⵏⵏⴰ ⵉⴱⴷⴷⵏ ⵅⴼ ⵉⵎⵏⵣⴰⵢⵏ ⵏ ⵜⵎⵢⵉⵎⴰⵏⵜ ⴷ ⵓⵎⵢⴰⵡⴰⵙ ⵉⵛⵛⴰⵔⵏ, ⵏⵏⴰ ⵉⴷⵓⵙⵏ ⵓⴳⴳⴰⵔ ⵙ ⵜⵙⵇⵇⴰⵏ ⵉⵀⵢⵢⴰⵏ ⵉⵙⵎⵓⵏⴰⵏ ⵉⵎⴰⵡⴰⵢⵏ ⵏ ⵜⵎⵉⵣⴰⵔ ⵙ ⵙⵏⴰⵜ, ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⴷ ⵜⵎⵎⵓⵖⵔⴰ ⵏ ⵓⵏⵙⵙⵉⵅⴼ ⵊⵓ ⴱⴰⵢⴷⵏ.
ⵎⴽⴷⴰ ⴱⴷⴷⵏ ⵉⵏⴱⴷⴰⴷⵏ ⵙ ⵙⵉⵏ ⵅⴼ ⵓⵎⵙⴰⵙⴰ ⵏ ⵜⴰⵏⵏⴰⵢⵉⵏ ⵏ ⵜⵎⵉⵣⴰⵔ ⵙ ⵙⵏⴰⵜ ⴳ ⵎⴰⴷ ⵉⵥⵍⵉⵏ ⵙ ⵜⵓⴳⵜ ⵏ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵏⵏⴰ ⵉⵣⴷⵉⵏ ⴷ ⵓⵙⴷⵓⵙ ⵏ ⵓⴼⵔⴰ ⴷ ⵓⵔⴳⴳⵉⴳ ⴷ ⵜⴷⵉⵎⵓⵇⵕⴰⵟⵉⵜ ⴷ ⵜⴳⵎⵉ ⵜⴰⵙⵓⵍⴰⵏⵜ.