ⵉⵙⴽⵔ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⵙⵙ ⵏ ⵓⵢⵏⴰⵙ 04 ⵛⵓⵜⴰⵏⴱⵉⵔ ⴳ ⵄⴰⵎⵎⴰⵏ, ⵉⵎⴹⴰⴽⴰⵕⵏ ⴰⴽⴷ ⵎⴰⵙⵙ ⴱⵉⵛⵔ ⵍⵅⴰⵚⴰⵡⵏⴰ, ⴰⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵓⵎⵣⴰⵖ ⵏ ⵍⵓⵕⴹⵓⵏ, ⵉⵣⴷⵉⵏ ⴷ ⵉⴱⵔⴷⴰⵏ ⴷ ⵉⵎⵏⵉⴷⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵏⴳⵔ ⵍⵎⵖⵔⵉⴱ ⴷ ⵍⵓⵕⴹⵓⵏ.
ⴳ ⵜⵉⵣⵡⵉⵔⴰ ⵏ ⵓⵏⵎⵓⵇⵇⴰⵔ ⴰⴷ, ⵉⵙⴷⴷⵉⴷ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⵉⵙⵖⵡⴰⵏ ⵉⵎⵣⵔⴰⵢⵏ ⴷ ⵜⵙⵇⵇⴰⵏ ⵏ ⵜⴰⵡⵎⴰⵜ ⵉⵍⵍⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⵍⴷⵉⵜ ⵏ ⵍⵓⵕⴹⵓⵏ ⵜⴰⵀⴰⵛⵉⵎⵜ ⵏⵏⴰ ⵖⵉⴼⵙⵏⵜ ⵉⴱⴷⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴷ ⵡⵓⵎⴰⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵄⴱⴷ ⵍⵍⴰⵀ ⵓ ⵍⵃⵓⵙⴰⵢⵏ ⴰⴷ ⵜⵏ ⵉⵃⴹⵓ ⵕⴱⴱⵉ, ⴷⴰⵢ ⵉⵜⵜⴰⵍⵖ ⴰⵙⵡⵉⵔ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⴳ ⵜⵓⴳⵜ ⵏ ⵉⴳⵔⴰⵏ, ⴰⵡⴷ ⴳ ⵜⵓⴳⵜ ⵏ ⵉⵙⵡⵉⵔⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴼⴳⴰⵏⵏ.
ⵎⴽⴷⴰ ⵢⵓⵍⵖ ⵜⴰⵙⵓⵍⵜ ⵜⴰⵎⵖⵍⴰⵍⵜ ⵏ ⵓⵣⴷⴷⵓⵢ ⴷ ⵓⵎⵛⴰⵡⴰⵕ ⵊⴰⵔ ⵙⵏⴰⵜ ⵏ ⵜⵎⵉⵣⴰⵔ ⴳ ⵜⵓⴳⵜ ⵏ ⵜⵎⵙⴰⵔⵉⵏ ⵖⵔ ⵉⵍⵍⴰ ⵓⴽⴰⵎⴷ ⵉⵛⵛⴰⵔⵏ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵇⴰⵃ ⵜⵉⴼⵓⴳⵍⵉⵡⵉⵏ ⵜⵉⵄⵕⴰⴱⵉⵏ ⴷ ⵜⵓⵙⵍⵉⵎⵉⵏ ⴷ ⵜⴳⵔⴰⵖⵍⴰⵏⵉⵏ, ⵙⴳ ⵡⵓⴹⵓⴼ ⵏ ⵙⵏⴰⵜ ⵏ ⵜⵎⵉⵣⴰⵔ ⵏ ⵜⴰⵏⵏⴰⵢⵉⵏ ⵉⵎⵎⵔⵡⴰⵙⵏ ⴷ ⵜⵉⴽⵍⵉ ⵖⵔ ⵓⵙⵔⵓⵙ ⵏ ⵜⴳⵎⵉ ⴷ ⵜⵏⴼⵔⵓⵜ ⴷ ⵓⵔⴳⴳⵉⴳ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.
ⴳ ⵓⵙⴰⵜⵉ ⴰⴷ, ⵉⵙⵎⴰⵢⵏⵓ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⵙⴷⴷⵉⴷ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷⴷⴰⵡ ⵏ ⵜⵏⴰⵔⴰ ⵉⵀⵢⵢⴰⵏ ⴷ ⵉⵙⵡⴰⵍⴰⵜⵏ ⵓⵏⵥⵉⵥⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ, ⴰⴷⴷⴰⴷ ⵉⵕⵚⴰⵏ ⴷ ⵉⴼⴰⵡⵏ ⵎⵏⵉⴷ ⵏ ⵜⵎⵙⴰⵔⵜ ⵜⴰⴼⵉⵍⵉⵚⵟⵉⵏⵉⵜ ⴷ ⵍⵇⵓⴷⵙ ⴰⵎⴰⵖⵓⴷ, ⴷ ⵜⴰⴳⵯⵉⵜ ⵏ ⴽⵓ ⵉⵙⵉⵖⵉ ⴳ ⵉⵣⵔⴼⴰⵏ ⵓⵍⴳⵉⵏⵏ ⵏ ⵓⵎⴰⴷⴰⵏ ⴰⴼⵉⵍⵉⵚⵟⵉⵏⵉ, ⴰⵎⵣⵡⴰⵔⵓ ⵏⵏⵙⵏ ⴰⵣⵔⴼ ⵏⵏⵙ ⴳ ⵓⵙⵔⵓⵙ ⵏ ⵓⵡⴰⵏⴽ ⵏⵏⵙ ⴰⴼⵉⵍⵉⵚⵟⵉⵏⵉ ⴱⵓ ⵡⴰⴱⴰⴹ ⴷⵉⴳⵙ ⵜⵓⴷⵔⵜ ⵙ ⵉⵡⵜⵜⴰ ⵏ 4 ⵢⵓⵏⵢⵓ 1967, ⴷ ⵜⵎⴰⵥⵓⵏⵜ ⵏⵏⵙ ⵍⵍⵉ ⵜⵜ ⵉⴳⴰⵏ ⴷ ⵍⵇⵓⴷⵙ ⵏ ⵍⵇⴱⵍⵜ, ⴰⵔ ⵉⵜⵜⴷⴷⵔ ⵜⴰⵎⴰ ⵏ ⵓⵡⴰⵏⴽ ⵏ ⵉⵚⵕⴰⵢⵉⵍ ⴳ ⵢⴰⵏ ⵡⴰⴷⴷⴰⴷ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ ⴷ ⵜⵏⴰⴳⵔⵉⵜ, ⵙ ⵎⴰⴷ ⵉⵙⴷⵓⵙⵏ ⵜⴰⵏⴰⴳⵔⵉⵜ ⴷ ⵜⴳⵎⵉ ⵉ ⵉⵎⴰⴷⴰⵏⵏ ⵏ ⵜⵙⴳⴰ.
ⴳ ⵎⵏⵉⴷ ⴰⴷ, ⵉⵙⴷⴷⵉⴷ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⵎⴰⵙ ⴷ ⴰⵔⵣⴰⴼ ⴰⴱⵕⵍⴰⵎⴰⵏⵉ ⵖⵔ ⵓⵙⵏⵇⵔ ⴰⵏⴰⵎⵎⴰⵙ ⵏⵏⴰ ⵉⵙⴽⵔⴰⵙ ⵙ ⵓⴼⵔⵉⵙ ⵏⵏⵙ ⵎⴰⵙ ⵉⴳⴰ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⵖⵔ ⵍⵓⵕⴹⵓⵏ ⴷ ⴼⵉⵍⵉⵚⵟⵉⵏ ⴷ ⵉⵚⵕⴰⵢⵉⵍ, ⵅⴼ ⵢⴰⵏ ⵓⴽⴰⴱⴰⵕ ⵏ ⵓⵙⵉⵔⴰ ⵏⵏⵙ, ⵜⵓⵙ ⴷ ⴰⵎ ⵜⴱⵣⴰⵔⵜ ⴳ ⵓⵙⴷⵓⵙ ⵏ ⵜⵔⵙⴰⵍ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⴰⴱⵕⵍⴰⵎⴰⵏⵉ ⴰⴼⵉⵍⵉⵚⵟⵉⵏⵉ ⵉⵚⵕⴰⵢⵉⵍⵉ ⵅⴼ ⵜⵎⵙⴰⵔⵉⵏ ⵉⵣⴷⵉⵏ ⴷ ⵜⵎⵀⵍⵜ ⵏ ⵓⴼⵔⴰ ⴳ ⵓⵙⵏⵇⵔ ⴰⵏⴰⵎⵎⴰⵙ.
ⵙⴳ ⵜⵏⵉⵍⴰ ⵏⵏⵙ ⵢⵓⵍⵖ ⵎⴰⵙⵙ ⴱⵉⵛⵔ ⵍⵅⴰⵚⴰⵡⵏⴰ, ⴰⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵍⵓⵕⴹⵓⵏ ⵏ ⵓⵎⵣⴰⵖ, ⵜⵉⵕⵡⵉ ⴷ ⵜⴷⵔⵓⵜ ⵏ ⵜⵙⵇⵇⴰⵏ ⵉⵙⵎⵓⵏⴰⵏ ⵏⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⵍⴷⵉⵜ ⵏ ⵍⵓⵕⴹⵓⵏ ⵜⴰⵀⴰⵛⵉⵎⵉⵜ ⵙ ⵢⵉⵡⵉⵣ ⵏ ⵙⵉⵏ ⵉⵎⴰⵡⴰⵢⵏ ⵏ ⵙⵏⴰⵜ ⵏ ⵜⵎⵉⵣⴰⵔ ⵜⴰⵡⵎⴰⵜⵉⵏ, ⵎⴽⴷⴰ ⵉⵜⵜⴰⵍⵖ ⴰⵙⵡⵉⵔ ⵏ ⵜⵙⵇⵇⴰⵏ ⵜⵉⴱⵕⵍⴰⵎⴰⵏⵉⵢⵉⵏ ⵏ ⵍⵎⵖⵔⵉⴱ ⴷ ⵍⵓⵕⴹⵓⵏ ⴷ ⵜⴷⵉⵏⴰⵎⵉⵜ ⵏ ⵓⵎⵢⴰⵡⴰⵙ ⵏⵏⴰ ⵖⵉⴼⵙⵏⵜ ⵉⴽⴽⴰⵏ ⴳ ⵉⵙⴳⴳⵯⴰⵙⵏ ⵉⵎⴳⴳⵓⵔⴰ ⵉⵣⵔⵉⵏ.
ⵖⵉⴽⵍⵍⵉ ⵉⵙⴷⴷⵉⴷ ⵎⴰⵙⵙ ⴱⵉⵛⵔ ⵍⵅⴰⵚⴰⵡⵏⴰ ⴰⵡⴷ ⴰⴷⴷⵓⵔ ⵏ ⵓⵣⴷⴷⵓⵢ ⴰⵎⵖⵍⴰⵍ ⴷ ⵓⵙⵓⵍⴰⵏ ⵉⵍⵍⴰⵏ ⵊⴰⵔ ⵍⵓⵕⴹⵓⵏ ⴷ ⵍⵎⵖⵔⵉⴱ ⴳ ⵜⵓⴳⵜ ⵏ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⵖⵉⴽⵍⵍⵉ ⵉⵙⴷⴷⵉⴷ ⵎⴰⵙ ⴳⴰⵏ ⵙ ⵙⵉⵏ ⵉⵎⵓⵔⴰⵔⵏ ⵉⵎⵇⵇⵔⴰⵏⵏ ⴳ ⵜⵡⵓⵔⵉ ⵜⴰⵄⵕⴰⴱⵜ ⵉⵛⵛⴰⵔⵏ, ⴷ ⴰⵔ ⵙⵡⵓⵔⵓⵢⵏ ⵙ ⵙⵉⵏ ⵅⴼ ⵜⵓⴳⵜ ⵏ ⵜⵎⵙⴰⵔⵉⵏ, ⵙⴳ ⵜⴰⵏⵏⴰⵢⵜ ⵉⵎⵎⵔⵡⴰⵙⵏ, ⴰⵎⵣⵡⴰⵔⵓ ⵏⵏⵙ ⵉⴳⴰ ⵜ ⴰⵙⴷⵓⵙ ⴰⵔⵎⵙⴽⵉⵍ ⵏ ⵜⵎⵙⴰⵔⵜ ⵜⴰⴼⵉⵍⵉⵚⵟⵉⵏⵉⵜ.
ⴷⴰⵢ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵉⵎⴰⵡⵙⴰⵙⵏ ⴷ ⵓⵎⴰⵡⵙⴰⵙ ⵏ ⵍⵓⵕⴹⵓⵏ ⵏ ⵓⵎⵣⴰⵖ ⵜⵉⵍⴰⵍⵜ ⵜⴰⵏⴼⵔⴰⵔⵜ ⵏ ⵉⵎⴰⵡⴰⵢⵏ ⵏ ⵜⵎⵉⵣⴰⵔ ⵙ ⵙⵏⴰⵜ, ⵙⴳ ⵜⵙⵎⵜⴳⴳⴰⵔⵜ ⵏⵏⵙⵏ ⵉⵣⴷⵉⵏ ⴷ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵍⵇⵓⴷⵙ ⴷ ⵜⵖⵍⵉⴼⵜ ⵜⴰⵀⴰⵛⵉⵎⵉⵜ, ⵉⵥⵍⵉⵏ ⵙ ⵓⵎⵣⴰⵖ ⵅⴼ ⵍⵇⵓⴷⵙ ⴷ ⵜⵔⵙⴰⵍ ⵏⵏⵙ.
ⵉⴼⵓⵍⴽⵉ ⵎⴰⵙⵙ ⴱⵉⵛⵔ ⵍⵅⴰⵚⴰⵡⵏⴰ ⴰⵡⴷ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴰⵙ ⵉⴳⴰ ⵜⴰⴷⴰⴱⵓⵜ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⵉⴷⵓⵙⵏ ⴷ ⵓⵙⵓⵍⴰⵏ ⴷ ⵢⴰⵏ ⵓⵙⴰⵔⵓ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵅⴼ ⵜⵎⵙⴰⵔⵉⵏ ⵉⵣⴷⵉⵏ ⴷ ⵜⵎⵀⵍⵜ ⵏ ⵓⴼⵔⴰ ⴳ ⵓⵙⵏⵇⵔ ⴰⵏⴰⵎⵎⴰⵙ.