ⵉⵙⴽⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵙⵙ ⵏ ⵓⵢⵏⴰⵙ 18 ⵛⵓⵜⴰⵏⴱⵉⵔ 2023 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵉⵎⴹⴰⴽⴰⵕⵏ ⴷ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⴳ ⵜⴳⴷⵓⴷⴰⵏⵜ ⵏ ⵟⴰⵏⵥⴰⵏⵢⴰ ⵎⴰⵙⵙⴰ ⵜⵓⵍⵢⴰ ⴰⴽⵚⵓⵏ, ⵏⵏⴰ ⵉⵙⴽⴰⵔⵏ ⵢⴰⵏ ⵓⵔⵣⴰⴼ ⵙ ⵜⴳⵍⴷⵉⵜ, ⵅⴼ ⵢⵉⵅⴼ ⵏ ⵢⴰⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵏⴼⵔⴰⵔ.
ⴳ ⵜⵉⵣⵡⵉⵔⴰ ⵏ ⵓⵏⵎⵓⵇⵇⴰⵔ ⴰⴷ, ⵜⵙⵎⵏⵉⴷ ⵎⴰⵙⵙⴰ ⴰⴽⵚⵓⵏ ⴰⴼⵛⴰⴷ ⵏⵏⵙ ⵉⵣⴷⴷⵉⴳⵏ ⵅⴼ ⵡⵓⵏⴳⵉⵙⵏ ⵏ ⵓⵏⴷⵓⴷⵉ ⵍⵍⵉ ⵢⵓⵜⵏ ⵜⵓⴳⵜ ⵏ ⵜⵎⵏⴰⴹⵉⵏ ⵏ ⵜⴳⵍⴷⵉⵜ ⵉⵎⴰⵍⴰⵙ ⵉⵣⵔⵉⵏ, ⵉⴼⵍ ⴷ ⵜⵓⴳⵜ ⵏ ⵡⵓⵏⴳⵉⵙⵏ, ⵖⵉⴽⵍⵍⵉ ⵜⵓⵍⵖ ⵜⵓⴳⴳⴰⵙ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵉ ⵜⵡⵉⵙⵉ ⵏ ⵎⵉⴷⴷⵏ ⵍⵍⵉ ⵜⵉⵡⴹ ⵜⵡⴰⵖⵉⵜ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵟⴰⵏⵥⴰⵏⵢⴰ ⵎⴰⵙ ⵜⴱⴷⴷ ⵜⵎⴰⵣⵉⵔⵜ ⵏⵏⵙ ⴷ ⵍⵎⵖⵔⵉⴱ ⴳ ⵉⵣⵎⴰⵣ ⴰⴷ ⵀⵔⵛⵏⵉⵏ.
ⴳ ⵎⵏⵉⴷ ⵢⴰⴹⵏ, ⵜⵙⵎⵖⵔ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵙ ⵓⵙⵡⵉⵔ ⵏ ⵉⵎⵢⴰⵙⵙⴰⵜⵏ ⵉⵙⵔⵜⴰⵏⵏ ⵏⵏⴰ ⵉⵍⵍⴰⵏ ⴳⵔ ⵜⵎⵉⵣⴰⵔ ⵙ ⵙⵏⴰⵜ, ⵏⵏⴰ ⵉⴱⴷⴷⵏ ⵅⴼ ⵜⵎⵢⵉⵎⴰⵏⵜ ⴷ ⵓⵡⵇⵇⵔ ⴰⵎⵢⴰⵖ. ⵖⵉⴽⵍⵍⵉ ⴷ ⵜⵉⵡⵉ ⵎⴰⵙ ⴷ ⴰⵔⵣⴰⴼ ⵏⵏⵙ ⵏ ⴷⵖⵉ, ⵢⵓⵊⵊⴰ ⵜⵜ ⴰⴷ ⵜⴱⴷⴷ ⵅⴼ ⵓⵙⵡⵉⵔ ⵏ ⵓⴱⵓⵖⵍⵓ ⴰⴷⵎⵙⴰⵏ ⵏⵏⴰ ⵉⵍⵍⴰⵏ ⴳ ⵜⴳⵍⴷⵉⵜ, ⵜⵉⵏⵉⵏ ⵎⴰⵙ ⵜⵔⴰ ⵜⵎⴰⵣⵉⵔⵜ ⵏⵏⵙ ⴰⴷ ⵜⵙⴱⵖⵔ ⵙⴳ ⵉⵔⵉⵎ ⵏ ⵍⵎⵖⵔⵉⴱ ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ.
ⴳ ⵓⵢⴰ ⵜⵙⵙⵎⵏⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⴰⵎⵡⴰⵊⴱ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⵉⵍⵍⴰⵏ ⵖⵔ ⵜⵎⵉⵣⴰⵔ ⵙ ⵙⵏⴰⵜ ⴳ ⵜⵓⴳⵜ ⵏ ⵉⴳⵔⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵜⴼⵍⵍⴰⵃⵜ, ⵖⵉⴽⵍⵍⵉ ⴷ ⵜⵙⵙⴽⵜⵉ ⵙ ⵓⵙⴷⵓⵙ ⴰⵙⵓⵍⴰⵏ ⵏ ⵍⵎⵖⵔⵉⴱ ⵉ ⵜⵏⴱⴰⴹⵜ ⵏ ⵟⴰⵏⵥⴰⵏⵢⴰ ⵃⵎⴰ ⴰⴷ ⵢⵉⵍⵉ ⵓⵙⴱⵓⵖⵍⵓ ⵏ ⵢⵉⴳⵔ ⴰⵏⴼⵍⴰⵃ, ⴷ ⵡⴰⵙⴰⵢ ⵏ ⵓⵖⵉⵍⵓⴼ ⵏ ⵜⵏⴼⵔⵓⵜ ⵜⴰⵎⵙⴰⴷⵓⵔⵜ ⵏⵏⴰ ⵉⵜⵜⵄⴰⵟⵟⴰⵕⵏ ⵜⵓⴳⵜ ⵏ ⵜⵎⵉⵣⴰⵔ ⵏ ⵡⴰⴼⵔⵉⵇⵢⴰ.
ⵖⵉⴽⵍⵍⵉ ⴷⴰⵖ ⵜⵙⵎⴷ ⵜⵏⵙⵙⵉⵅⴼⵜ ⴳ ⵡⴰⵡⴰⵍ ⵏⵏⵙ ⵎⴰⵙ ⵉⵅⵚⵚⴰ ⵜⵉⵎⵉⵣⴰⵔ ⵙ ⵙⵏⴰⵜ ⴰⴷ ⵓⵛⵏ ⵢⵓⵜ ⵏ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵉ ⵓⵎⵢⴰⵡⴰⵙ ⵏⵏⵙⵏ ⴳ ⵢⵉⴳⵔ ⴰⴱⵕⵍⴰⵎⴰⵏⵉ ⵙ ⵜⵖⴰⵔⴰⵙⵜ ⵏ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵓⵎⵙⴰⵡⴰⵍ ⴷ ⵓⵎⵛⴰⵡⴰⵕ, ⵏⵏⴰ ⵉⵜⵜⵏⵢⵓⴷⴷⵓⵏ ⴳ ⵜⴱⵔⵉⴷⵜ ⵏ ⵜⵏⴰⴼⵓⵜ ⵏ ⵜⵙⵓⵎⴰⵔ ⵎⵎ ⵓⵙⵎⴽⵍ ⵉⵛⵛⴰⵔⵏ.
ⴳ ⵎⵏⵉⴷ ⵏⵏⵙ, ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵙ ⵡⴰⴷⴷⵓⵔ ⵏ ⵉⵎⵢⴰⵙⵙⴰⵜⵏ ⵏⵏⴰ ⵉⵍⵍⴰⵏ ⵏⴳⵔ ⵍⵎⵖⵔⵉⴱ ⴷ ⵟⴰⵏⵥⴰⵏⵢⴰ, ⵏⵏⴰ ⵉⴷⴷⴰⵏ ⴳ ⵢⵓⵜ ⵏ ⵜⵉⵣⵉ ⵜⴰⵅⴰⵜⴰⵔⵜ ⵙⴳ ⵜⵉⵣⵉ ⵏ ⵓⵔⵣⴰⴼ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵢⴰⵔⵉ ⵕⴱⴱⵉ ⵉ ⵟⴰⵏⵥⴰⵏⵢⴰ ⴳ ⵓⵙⴳⴳⵯⴰⵙ ⵏ 2016, ⵉⵜⵜⵔ ⵙ ⵜⵎⵍⴷⴰ ⴰⴷ, ⴰⴷ ⵜⵉⵍⵉ ⵜⵡⵓⵔⵉ ⵃⵎⴰ ⴰⴷ ⵉⵜⵜⴰⵡⵙⴽⴰⵔ ⵓⵙⵎⵀⵍ ⴷ ⵓⵣⵣⴳⵉⵔ ⵏ ⵜⵎⵙⵙⴽⵜⴰⵢ ⵏ ⵓⵎⵙⴼⵔⵓ ⴷ ⵜⵎⵢⴰⵇⵇⴰⵏⵉⵏ ⵜⵉⵙⵉⵏⵔⴰⵏⵉⵏ ⵏⵏⴰ ⵉⵜⵜⴰⵡⵙⴳⵎⴰⴹⵏ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ.
ⵖⵉⴽⵍⵉ ⵙⵏⴼⵍⵏ ⵉⵎⴷⵔⴰⵡⵏ ⵜⴰⵏⵏⴰⵢⵉⵏ ⵅⴼ ⵜⵓⴳⵜ ⵏ ⵜⵙⵓⵎⴰⵔ ⵉⵛⵛⴰⵔⵏ, ⵙⵍⴰⵡⴰⵏ ⴰⴽⴽⵯ ⴳ ⵓⵎⵏⵥⴰⵡ ⵏ ⵡⴰⴼⵔⵉⵇⵢⴰ, ⵉⵏⵉⵏ ⴰⴽⴽⵯ ⵎⴰⵙ ⵜⵜ ⴱⴰⵀⵔⴰ ⵉⵡⵉⵏ ⴳ ⵜⵏⵥⵕⵉⵏ ⵏⵏⴰ ⵉⵜⵜⵄⴰⵟⵟⵕⵏ ⵉⵡⴰⵏⴽⵏ ⵏ ⵡⴰⴼⵔⵉⵇⵢⴰ ⴳ ⵓⵎⴰⵍⵓ ⵏ ⵜⴰⵙⵙⴰⵙⵉⵏ ⵜⵉⵎⴰⴹⵍⴰⵏⵉⵏ ⵏⵏⴰ ⵉⵖⵉⵢⵏ ⴰⴷ ⵙⵎⴷⵓⴷⵉⵏ ⴰⵖⵊⴷⵉⵎ ⴷ ⵜⵏⴼⵔⵓⵜ ⵏ ⵓⵎⴰⴹⴰⵍ ⴷ ⵉⵎⵏⵥⴰⵡⵏ.
ⴳ ⵎⵏⵉⴷ ⵢⴰⴹⵏ, ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵏ ⵓⵎⵡⴰⵊⴱ ⵃⵎⴰ ⴰⴷ ⵉⵙⵙⵎⵏⵉⴷ ⴰⴷⴷⵓⵔ ⵏ ⵜⵎⵔⵙⵍⵜ ⵜⴰⴱⵕⵍⴰⵎⴰⵏⵉⵜ ⴳ ⵜⵎⵓⵖⵍⵉⵜ ⵜⴰⵎⵔⵙⴰⵍⵜ ⴳ ⵜⵎⵉⵣⴰⵔ ⵙ ⵙⵏⴰⵜ ⴷ ⵜⵉⵍⴰⵍⵉⵏ ⵜⵉⵏⴼⵔⴰⵔⵉⵏ ⵏⵏⴰ ⵎⵉ ⵜⵖⵉⵢ ⴰⴷ ⵜⵏ ⵜⵙⴽⵔ ⴳ ⵡⴰⵔⴰⵢ ⵏ ⵉⵎⵢⴰⵙⵙⴰⵜⵏ ⵉⵙⵉⵏⵔⴰⵏⵏ ⴷ ⵓⵙⴱⵓⵖⵍⵓ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵙⴷⵓⵙ ⵏ ⵉⵎⵢⴰⵙⵙⴰⵜⵏ ⴰⴽⴷ ⵉⴱⵎⵕⵍⴰⵎⴰⵏⵏ ⵉⵙⴳⴰⵡⴰⵏⵏ ⴷ ⵡⵉⵏ ⵉⵎⵏⵥⴰⵡⵏ.