ⵢⵓⵎⴰ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ 120 ⵏ ⵓⴳⵎⴰⵎ, ⴰⵔ ⵜⵜⴰⵡⵙⵜⴰⵢⵏ ⵙ ⵜⵖⴰⵔⴰⵙⵜ ⵏ ⵓⵙⵜⴰⵢ ⵙ ⵜⵍⴳⴰⵎⵜ ⴰⵡⴷ ⵙ ⵓⵙⵎⴷⵢⴰ ⴰⵙⵖⵍⴰⵏ ⵉⵎⵙⴰⵙⴰⵏ ⴷ ⵓⵍⵓⴳⵏ ⴷⵉⴳⵙ ⵉⵜⵜⵖⵉⵎⴰⵏ ⵜⵓⴳⵜⵜ ⴷ ⴱⵍⴰ ⴰⵙⵎⵔⵙ ⵏ ⵜⵖⴰⵔⴰⵙⵜ ⵏ ⵓⵙⵎⵙⴰⵙⴰ ⵏ ⵉⵙⵜⴰⵢⵏ ⴷ ⵓⵙⵜⴰⵢ ⵏ ⵜⵓⴼⵉⵜ, ⵉⵖ ⵓⵔ ⵉⵣⴷⵉ ⵓⵙⴽⴽⵉⵏ ⴷ ⵓⵙⵜⴰⵢ ⵏ ⵢⴰⵏ ⵓⵎⵛⵛⵉⵡⵕ ⴳ ⵓⵙⴰⵜⵉ ⵏ ⵢⴰⵏ ⵓⴳⵔⴰⵡ ⴰⵎⵙⵜⴰⵢ ⴰⵎⵏⵜⴰⵢ, ⴰⵛⴽⵓ ⴷⴰ ⵉⵜⵜⵉⵍⵉ ⵓⵙⵜⴰⵢ ⵓⴼⵔⵉⴷ ⴰⵡⴷ ⵙ ⵜⵓⴳⵜⵜ ⵜⴰⵙⵖⵍⴰⵏⵜ ⴳ ⵢⴰⵜ ⵜⵙⵓⵜⵍⵜ.
ⴰⵔ ⴱⵟⵟⵓⵏ ⵉⴳⵎⴰⵎⵏ ⵉⴳⴰⵏ 120 ⵏⵏⴰ ⵢⵓⵎⴰ ⵓⵙⵇⵇⵉⵎ ⴰⵎⵎⵓ:
- 72 ⵏ ⵓⴳⵎⴰⵎ ⵙⴳ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ;
- 20 ⵏ ⵓⴳⵎⴰⵎ ⵙⴳ ⵜⵓⴷⵔⵉⵏ ⵜⵉⵣⵣⵓⵍⴰⵏⵉⵏ;
- 8 ⵏ ⵉⴳⵎⴰⵎⵏ ⵙⴳ ⵜⵎⴰⴷⴷⴰⵙⵉⵏ ⵜⵉⵣⵣⵓⵍⴰⵏⵉⵏ ⵏ ⵉⵎⵙⵡⵓⵔⵉⵢⵏ ⵎⵓ ⵉⴳⴳⵓⵜ ⵓⵙⵎⴷⵢⴰ;
- 20 ⵏ ⵓⴳⵎⴰⵎ ⵏⵏⴰ ⵉⵙⵜⴰⵢ ⵢⴰⵏ ⵓⴳⵔⴰⵡ ⴰⵎⵙⵜⴰⵢ ⵢⵓⵎⴰⵏ ⵉⴳⵏⵙⴰⵙⵏ ⵏ ⵉⴷ ⴱⵓ ⵜⵖⵔⴰⴷ.
ⴰⵔ ⴱⵟⵟⵓⵏ ⵉⴳⵎⴰⵎⵏ ⵉⴳⵏⵙⴰⵙⵏ ⵏ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴳ ⵍⵎⵖⵔⵉⴱ ⵖⵔ ⵉⴳⵎⴰⵎⵏ ⵏⵏⴰ ⵉⵜⵜⴰⵡⵙⵜⴰⵢⵏ ⵙⴳ ⵉⵙⵇⵇⵉⵎⵏ ⵏ ⵜⵎⵏⴰⴹⵉⵏ, ⴷ ⵉⴳⵎⴰⵎⵏ ⵉⵜⵜⴰⵡⵙⵜⴰⵢⵏ ⵙⴳ ⵉⵙⵇⵇⵉⵎⵏ ⵉⴳⵔⴰⵡⴰⵏⵏ ⴷ ⵉⵙⵇⵇⵉⵎⵏ ⵏ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ.
ⴰⵀⴰ ⵙ ⵓⵎⵙⴰⵙⴰ ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 28.11 ⵉⵣⴷⵉⵏ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵎⴽⴷⴰ ⵉⵜⵜⴰⵡⵙⵏⴼⴰⵍ ⴷ ⵉⵜⵜⴰⵡⵙⵎⴰⴷ, ⵀⴰ ⵏⵏ ⵉⵙⵇⵇⵉⵎⵏ ⵏ ⵜⵎⵏⴰⴹⵉⵏ ⴰⵔ ⵜⵜⴰⵡⴳⵣⴰⵏ ⵙ ⵢⴰⵏ ⵡⵓⵟⵟⵓⵏ ⵎⵓ ⵎⵙⴰⵙⴰⵏ ⵉⴳⵎⴰⵎⵏ, ⴱⵍⴰ ⴽⵔⴰ ⵏ ⵉⵔⵉⵔⵉ ⵏ ⵜⵖⴹⴼⵜ ⵉ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏⵏⵙⵏ, ⴰⵛⴽⵓ ⴷⴰ ⵜⵜⴰⵡⵙⵜⴰⵢⵏ ⵙⵉⵏ ⵉⴳⵎⴰⵎⵏ (02) ⵙⴳ ⴽⵓ ⴰⵙⵇⵇⵉⵎ ⵏ ⵜⵎⵏⴰⴹⵜ ⵙⴳ ⵉⵙⵇⵇⵉⵎⵏ ⵉⵏⵎⵏⴰⴹⵏ ⵉⴳⴰⵏ ⵙⵉⵏ ⴷ ⵎⵔⴰⵡ. ⵙ ⵡⴰⵎⵎⵓ ⵜⴳⴰ ⵜⵎⵓⵜⵜⵔⵜ ⵏ ⵉⴳⵎⴰⵎⵏ ⵉⴳⵏⵙⴰⵙⵏ ⵏ ⵉⵙⵇⵇⵉⵎⵏ ⵏ ⵜⵎⵏⴰⴹⵉⵏ ⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴳⵏⴰⵔ ⴷ ⴽⴽⵓⵥ ⵏ ⵉⴳⵎⴰⵎⵏ (24), ⵙⴳ ⴽⵕⴰⴹ ⵡⴰⴳⵏⴰⵔⵏ ⴷ ⵙⵉⵏ ⴷ ⵎⵔⴰⵡ (72) ⵉⴳⴰⵏ ⵉⴳⵏⵙⴰⵙⵏ ⵏ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ.
ⵢⵉⵍⵉ ⵡⵓⵟⵟⵓⵏ ⵏ ⵉⴳⵎⴰⵎⵏ ⵏⵏⴰ ⵉⵜⵜⴰⵡⵙⵜⴰⵢⵏ ⵙⴳ ⵉⵙⵇⵇⵉⵎⵏ ⵉⴳⵔⴰⵡⴰⵏⵏ ⴷ ⵉⵙⵇⵇⵉⵎⵏ ⵏ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ, ⵉⵎⵣⴰⵔⴰⵢ ⵅⴼ ⵡⵓⵟⵟⵓⵏ ⵏ ⵉⵎⵣⴷⴰⵖⵏ ⵏ ⴽⵓ ⵜⴰⵎⵏⴰⴹⵜ, ⴰⵛⴽⵓ ⴷⴰ ⵉⵜⵜⵉⵍⵉ ⵏⴳⵔ ⵙⵉⵏ ⵉⴳⵎⴰⵎⵏ (02) ⴳ ⵎⴰⴷ ⴰⴽⴽⵯ ⵉⴷⵔⵓⵙⵏ, ⴷ ⵚⴹⵉⵚ (06) ⵏ ⵉⴳⵎⴰⵎⵏ ⴳ ⵎⴰⴷ ⴰⴽⴽⵯ ⵉⴳⴳⵓⵜⵏ, ⵙ ⵓⵎⵙⴰⵙⴰ ⴷ ⵓⴱⵟⵟⵓ ⵏⵏⴰ ⵉⵍⵍⴰⵏ ⴳ ⵜⴼⵍⵡⵉⵜ "ⴰ" ⵙⴳ ⵓⵎⵏⵏⵉ ⴰⵎⵣⵡⴰⵔⵓ ⵏ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 28.11 ⵉⵣⴷⵉⵏ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷ ⴰⵔ ⵜⵜⴰⵡⵙⵜⴰⵢⵏ ⵉⴳⵎⴰⵎⵏ ⵉⴳⵏⵙⴰⵙⵏ ⵏ ⵉⵙⵇⵇⵉⵎⵏ ⵉⴳⵔⴰⵡⴰⵏⵏ ⴷ ⵉⵙⵇⵇⵉⵎⵏ ⵏ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ ⴰⵡⴷ ⴳ ⵓⵙⵡⵉⵔ ⵏ ⵜⵎⵏⴰⴹⵉⵏ ⵓⵔ ⴷ ⴳ ⵓⵙⵡⵉⵔ ⵏ ⵜⵎⵏⴱⴰⴹⵉⵏ ⴷ ⵜⵙⴳⵉⵡⵉⵏ.
ⴰⵀⴰ ⵉⴳⵏⵙⴰⵙⵏ ⵏ ⵜⵓⴷⵔⵉⵏ ⵜⵉⵣⵣⵓⵍⴰⵏⵉⵏ ⴰⵔ ⴱⵟⵟⵓⵏ ⵅⴼ ⴽⴽⵓⵥ ⵡⴰⵏⴰⵡⵏ ⵏ ⵜⵓⴷⵔⵉⵏ ⵜⵉⵣⵣⵓⵍⴰⵏⵉⵏ ⴳ ⵍⵎⵖⵔⵉⴱ, ⵉⴳⴰⵏ ⵜⵓⴷⵔⵉⵏ ⵜⵉⵏⴼⵍⴰⵃⵉⵏ, ⴷ ⵜⵓⴷⵔⵉⵏ ⵏ ⵜⵙⴱⴱⴰⴱⵜ ⴷ ⵜⵎⴳⵓⵔⵉ ⴷ ⵜⵏⵓⴼⴰ ⴷ ⵜⵓⴷⵔⵉⵏ ⵏ ⵜⵏⵉⴹⵉ, ⴷ ⵜⵓⴷⵔⵉⵏ ⵏ ⵜⴳⵎⵔⵜ ⵜⴰⵢⵍⴰⵏⵜ.
ⴷ ⴰⵔ ⵜⵜⴰⵡⵙⵜⴰⵢⵏ ⵙⴳ ⴽⵓ ⴰⵙⵎⵉⵍ ⵙⴳ ⵜⵓⴷⵔⵉⵏ ⵜⵉⵣⵣⵓⵍⴰⵏⵉⵏ ⵜⵓⴳⵜⵜ ⵏ ⵉⴳⵎⴰⵎⵏ ⴳ ⵜⵙⵓⵏⴰⴹ ⵜⵉⵏⵙⵜⴰⵢⵉⵏ ⵏⴳⵔ-ⵜⵏⵎⵏⴰⴹⵉⵏ, ⴷ ⴰⵔ ⵉⵜⵜⴳⴳⴰ ⴽⵓ ⵓⵟⵟⵓⵏ ⵏ ⵜⵎⵏⴰⴹⵉⵏ ⵢⴰⵜ ⵜⵙⵓⵏⴹⵜ ⵜⴰⵏⵙⵜⴰⵢⵜ.
ⵙ ⵡⴰⵎⵎⵓ ⴷⴰ ⴱⵟⵟⵓⵏ ⵉⴳⵎⴰⵎⵏ ⵏ ⵜⵓⴷⵔⵉⵏ ⵜⵉⵣⵣⵓⵍⴰⵏⵉⵏ ⴰⵎⵎⵓ:
- ⵙⴰ (07) ⵏ ⵉⴳⵎⴰⵎⵏ ⵙⴳ ⵜⵓⴷⵔⵉⵏ ⵜⵉⵏⴼⵍⴰⵃⵉⵏ;
- ⵚⴹⵉⵚ (06) ⵏ ⵉⴳⵎⴰⵎⵏ ⵙⴳ ⵜⵓⴷⵔⵉⵏ ⵏ ⵜⵙⴱⴱⴰⴱⵜ ⴷ ⵜⵎⴳⵓⵔⵉ ⴷ ⵜⵏⵓⴼⴰ;
- ⵙⵎⵎⵓⵙ (05) ⵏ ⵉⴳⵎⴰⵎⵏ ⵙⴳ ⵜⵓⴷⵔⵉⵏ ⵏ ⵜⵏⵉⴹⵉ;
- ⵙⵉⵏ (02) ⵏ ⵉⴳⵎⴰⵎⵏ ⵙⴳ ⵜⵓⴷⵔⵉⵏ ⵏ ⵜⴳⵎⵔⵜ ⵜⴰⵢⵍⴰⵏⵜ.
ⴰⵀⴰ ⵉⴳⵏⵙⴰⵙⵏ ⵏ ⵜⵎⴰⴷⴷⴰⵙⵉⵏ ⵜⵉⵣⵣⵓⵍⴰⵏⵉⵏ ⵏ ⵉⵎⵙⵡⵓⵔⵉⵢⵏ, ⵏⵏⴰ ⵉⴳⴰⵏ ⵜⴰⵎ (08), ⴰⵔ ⵜⵜⴰⵡⵙⵜⴰⵢⵏ ⴳ ⵓⵙⵡⵉⵔ ⵏ ⴽⵕⴰⴹⵜ ⵏ ⵜⵙⵓⵏⴰⴹ ⵜⵉⵏⵙⵜⴰⵢⵉⵏ, ⴽⵓ ⵜⴰⵙⵓⵏⴹⵜ ⵜⴰⵏⵙⵜⴰⵢⵜ ⴷⵉⴳⵙ ⴽⴽⵓⵥ ⵉⵙⵇⵇⵉⵎⵏ ⵉⵏⵎⵏⴰⴹⵏ, ⵎⴰⵛⴰ ⵓⵔ ⵉⵎⵙⴰⵙⴰ ⵡⵓⵟⵟⵓⵏ ⵏ ⵉⵎⵙⵜⵉⵢⵏ ⵙⴳ ⴽⵓ ⵜⴰⵙⵓⵏⴹⵜ ⵜⴰⵏⵙⵜⴰⵢⵜ, ⵍⵍⵉⴳ ⴳⴳⵓⵜⵏⵜ ⵜⵎⵙⵙⵏⵜⴰⵢ ⵜⵉⵎⴳⵓⵔⴰⵏⵉⵏ ⴷ ⵉⵎⵓⵙⵙⵓⵜⵏ ⵉⴷⵎⵙⴰⵏⵏ ⴳ ⵜⵎⵏⴰⴹⵜ ⵏ ⴹⴹⴰⵕⵍⴱⵉⴹⴰ ⵙⵟⵟⴰⵜ, ⴰⵔ ⵜⵜⴰⵡⵙⵜⴰⵢⵏ ⵙⴳ ⵜⵙⵓⵏⴹⵜ ⴰⴷ ⴽⴽⵓⵥ (04) ⵏ ⵉⴳⵎⴰⵎⵏ, ⴷ ⴰⵔ ⵜⵜⴰⵡⵙⵜⴰⵢⵏ ⵙⵉⵏ (02) ⵏ ⵉⴳⵎⴰⵎⵏ ⵙⴳ ⴽⵓ ⴰⵙⵖⵉⵎ ⵙⴳ ⵉⵙⵖⵉⵎⵏ ⵏ ⵙⵏⴰⵜ ⵏ ⵜⵙⵓⵏⴰⴹ ⵜⵉⵏⵙⵜⴰⵢⵉⵏ ⵢⴰⴹⵏ (ⵟⴰⵏⵊⴰ -ⵜⵉⵟⵡⴰⵏ - ⵍⵃⵓⵙⵉⵎⴰ, ⴷ ⵙⵓⵙ - ⵎⴰⵙⵙⴰ).