ⴷⵓⴱⵍⴰⵏ -
ⴰⵔ ⵉⵎⵎⴰⵍⴰ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ, ⵏⵏⵉⵄⵎⴰ ⵎⴰⵢⵢⴰⵔⴰ, ⵓⴽⵡⴰⵙ ⴳ ⴷⵓⴱⵍⴰⵏ, ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵜⵏⵉⵍⴰ ⵏ ⵜⵏⵥⵕⵉⵏ ⴽⵔⵙⵏⵉⵏ ⵏ ⵜⵙⴳⴰ ⵜⴰⵏⴰⵎⵎⴰⵙⵜ ⵏ ⵓⵕⵓⴱⴱⴰ.
ⵖⵉⴽⵍⵍⵉ ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵍⵍⵉ ⵉⴷⵔⴰⵏ ⴳ "ⵓⴳⵔⴰⵡ ⵏ ⵓⵕⵓⴱⴱⴰ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ", ⵍⵍⵉ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵓⴱⵕⵍⴰⵎⴰⵏ ⵏ ⵉⵕⵍⴰⵏⴷⴰ, ⵅⴼ ⵜⵉⵍⴰⵍⵜ ⴷ ⵜⵎⵙⵜⴳⴳⴰⵔⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⴳⴳⴷ ⵏ ⵉⵙⵏⴼⵍⵏ ⵉⵜⵜⴰⵣⵣⴰⵍⵏ ⴷ ⵜⵏⵥⵕⵉⵏ ⵉⴽⵔⵙⵏ ⴷ ⵡⴰⴷⴷⴰⴷ ⵏ ⵜⵓⴷⵔⴰ ⵉⵜⵜⴰⵡⵙⵙⴰⵏ ⵙ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵉⵛⵃⴰⵏ, ⵙ ⵜⵖⴰⵔⴰⵙⵜ ⵏ ⵓⴹⴰⴽⴰⵍ ⵏ ⵜⵍⵍⵓⴳⵏⴰ ⴷ ⵜⵎⴰⴼⴰⵡⵜ ⵏ ⵜⵎⵔⵙⴰⵍ ⴰⴷ ⴷ ⵓⵣⵣⴳⵉⵔ ⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵜⴷⵉⵎⵓⵇⵕⴰⵟⵉⵜ ⵏ ⵓⵙⵎⴷⵢⴰ ⴷ ⵉⵙⵍⵍⵡⵉ ⴷ ⵓⵎⵙⴰⵡⴰⵍ ⴷ ⵜⵡⵓⵔⵉ ⵉⵛⵛⴰⵔⵏ ⵃⵎⴰ ⴰⴷ ⴷⵓⵙⵏⵜ ⵜⵎⵔⵙⴰⵍ, ⵜⵉⵍⵉ ⵜⵓⵛⵛⵔⴽⴰ ⵏ ⵉⵏⵎⵓⵔⴰⵏ ⴳ ⵜⴷⵉⵎⵓⵇⵕⴰⵟⵉⵜ.
ⵢⴰⵏⵏⴰⵢ ⵎⴰⵙ ⴷ ⵜⵉⵍⴰⵍⵜ ⴰⴷ ⵜⴼⴰⵡ ⴱⴰⵀⵔⴰ ⴳ ⵢⴰⵜ ⵜⵉⵣⵉ ⵍⵍⵉ ⴳ ⴰ ⵜⵜⴱⴱⵉⵏ ⵉⵎⵢⴰⵙⵙⴰⵜⵏ ⵓⵏⴱⵉⴹⵏ ⵏⴳⵔ ⵜⵎⵉⵣⴰⵔ ⵜⵜⵎⴰⵖⵏⵉⵏ, ⵖⵉⴽⵍⵍⵉ ⴷ ⵉⵙⵙⴽⵜⵉ ⵎⴰⵙ ⴷ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵢⵉⵍⵍ ⴰⵏⴰⵎⵎⴰⵙ ⵜⴽⴽⴰ ⴱⴷⴷⴰ ⵜⴰⵎⴰ ⵏ ⵓⵎⵙⴰⵡⴰⵍ "ⴰⵙⵓⵍⴰⵏ ⴰⵎⵚⴽⴰⵡ" ⵏⴳⵔ ⵉⴳⵏⵙⴰⵙⵏ ⵉⴱⵕⵍⴰⵎⴰⵏⵉⵢⵉⵏ ⵏ ⵉⵙⵕⴰⵢⵉⵍ ⴷ ⴼⵉⵍⵉⵙⵟⵉⵏ.
ⵢⴰⵡⵉ ⴷ ⵙ ⵓⵖⵉⵍⵓⴼ, ⵎⴰⵙ ⴷ ⴳ ⵉⵙⵡⵉⵔⵏ ⵏ ⵜⵏⴼⵔⵓⵜ ⴷ ⵉⵙⵡⵉⵔⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵜⵉⴽⵏⵓⵍⵓⵊⵉⵢⵏ, ⵉⴳⴰ ⵓⵎⴰⴹⴰⵍ ⵡⴰⴷ ⴱⴰⵀⵔⴰ ⵉⵛⵃⴰⵏ ⵉⵎⵎⵔⵡⵉⵏ, ⵖⵉⴽⵍⵍⵉ ⴷ ⵢⵉⵡⵉ ⵎⴰⵙ ⴷ ⴰⵎⵏⵖⵉ ⵍⵍⵉ ⵉⵍⵍⴰⵏ ⴳ ⵓⴽⵕⴰⵏⵢⴰ, ⴷ ⵉⵎⵔⴷⵓⴽⴽⵓⵜⵏ ⵙ ⵓⵇⵔⵢⴰⵏ ⵍⵍⵉ ⵉⵍⵍⴰⵏ ⴳ ⵡⴰⴼⵔⵉⵇⵢⴰ, ⴷ ⵉⵙⴳⵯⴷⵎⵏ ⵍⵍⵉ ⵉⵍⵍⴰⵏ ⴳ ⵜⵙⴳⴰ ⵏ ⵓⴼⵜⴰⵙ, ⴷ ⵉⵎⵣⴰⵔⴰⵢⵏ ⵉⵙⵔⵜⴰⵏⵏ ⵢⴰⵜⵜⵓⵢⵏ, ⴷ ⵉⵣⵡⴰⴳⵏ ⵉⵎⴳⵔⴰ, ⴷ ⵜⵡⴰⵖⵉⵜⵉⵏ ⵜⵉⴳⴰⵎⴰⵏⵉⵏ, ⴷ ⵓⵏⵖⵓⴱⵓ ⵏ ⵜⵏⴼⵔⵓⵜ ⵜⴰⵎⵙⴰⴷⵓⵔⵜ, ⴷ ⵉⴷⵔⵉⵣⵏ ⵏ ⵓⵙⵏⴼⵍ ⵏ ⵓⵏⵣⵡⵉ, ⵎⴰⵢⴰⴷ ⴰⴽⴽⵯ ⵉⴳⴰ ⵜⵉⵏⵥⵕⵉⵏ ⵜⵉⵏⵊⵎⵓⵜⵉⵏ ⵍⵍⵉ ⵉⵜⵜⴳⴳⵔⵏ ⵉ ⵜⵏⴼⵔⵓⵜ ⴷ ⵓⴱⵕⵕⵄ ⵏ ⵡⴰⴳⴷⵓⴷⵏ, ⴷ ⵉⵎⵏⵉⴷⵏ ⵏ ⵉⵎⴰⵍ ⵏ ⵓⴼⵔⴰ ⵏ ⵜⴰⵙⵓⵜⵉⵏ ⵍⵍⵉ ⴷ ⵢⵓⵛⴽⴰⵏ.
ⴹⴰⵕⴰⵜ ⵏ ⵎⴰ ⵉⵙⴷⴷⵉⴷ ⵅⴼ ⵓⵙⵓⵖⵏ ⵏ ⵓⴹⴰⴽⴰⵍ ⵏ ⵜⵍⵍⵓⴳⵏⴰ ⴷ ⵜⵖⵥⵏⴰ ⵏ ⵜⵎⵔⵙⴰⵍ ⵜⵉⵎⴰⵜⴰⵢⵉⵏ, ⵃⵎⴰ ⴰⴷ ⴳⵉⵏ ⵉⵏⵎⵓⵔⴰⵏ ⵜⴰⵎⵢⵉⵎⴰⵏⵜ ⵏⵏⵙⵏ ⴳ ⵓⵏⴳⵔⴰⵡ ⴰⵙⵔⵜⴰⵏ, ⵉⵙⵙⵉⵙⴼⵉⵡ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙ ⴷ ⵢⴰⵜ ⴳ ⵜⵙⵎⵉⴳⴰⵍ ⵜⵉⵏⴼⵔⴰⵔⵉⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⵏⴰⵎⵎⴰⵙⵜ ⵉⴳⴰ ⵜⵜ ⵓⵙⴷⵓⵙ ⵏ ⵜⵎⵉⵣⴰⵔ ⵜⵉⴳⵎⴰⵎⵉⵏ ⴳ ⵓⵙⵖⵓⴷⵓ ⵏ ⵓⵣⵣⵉⴳⵣ ⵏ ⵉⵙⵜⴰⵢⵏ, ⵉⵙⵙⴽⵜⵉ ⴷ ⴳ ⵎⵏⵉⴷ ⴰⴷ, ⵜⵉⵍⴰⵍⵜ ⵏ ⵓⵏⴳⵔⴰⵡ ⴳ ⵜⴹⴼⵕⵉ ⵏ ⵉⵙⵜⴰⵢⵏ ⴳ ⵍⴱⵓⵙⵏⴰ ⴷ ⵍⵀⵉⵔⵙⵉⴽ ⴷ ⵜⵓⵏⵙ ⴷ ⵓⴷⵔⴰⵔ ⴰⵙⴳⴳⴰⵏ ⴷ ⵜⵓⵔⴽⵢⴰ.
ⵉⵏⵏⴰ ⵏⵏⵉⵄⵎⴰ ⵎⴰⵢⵢⴰⵔⴰ ⵎⴰⵙ ⴷ ⴳ ⵉⵣⵎⴰⵣ ⴰⴷ ⵍⵍⵉ ⵉⵜⵜⴰⵡⵙⵙⴰⵏⵏ ⵙ ⵓⵙⵏⴼⵍ ⵉⵜⵜⴰⵣⵣⴰⵍⵏ ⴷ ⵜⵏⵥⵕⵉⵏ ⵉⴽⵔⵙⵏ, ⵉⵍⵍⴰ ⵅⴼ ⵉⵏⵙⵙⵉⵅⴼⵏ ⵏ ⵉⴱⵔⵍⴰⵎⴰⵏⵏ ⴰⴷ ⵙⴽⵔⵏ ⵉⵙⵙⵍⵡⵉ ⴷ ⵓⵎⵙⴰⵡⴰⵍ ⴷ ⵜⵡⵓⵔⵉ ⵜⴰⵏⵊⵎⵓⵜ ⵅⴼ ⵓⵙⴷⵓⵙ ⵏ ⵜⵎⵔⵙⴰⵍ ⵏⵏⵙⵏ, ⴷ ⵓⵙⴼⵍⴷ ⵉ ⵉⵏⵎⵓⵔⴰⵏ ⵏⵏⵙⵏ ⴷ ⵓⵙⴷⵔⵓ ⵏⵏⵙⵏ ⵙ ⵜⵖⴰⵔⴰⵙⵜ ⵉⵜⵜⵎⵓⵙⵙⵓⵏ ⴳ ⵜⴷⵉⵎⵓⵇⵕⴰⵟⵉⵜ.
ⵉⴳⴰ ⵓⴳⵔⴰⵡ ⴰⴷ ⵢⴰⵜ ⵜⵎⵍⴷⴰ ⵏ ⵓⵙⴷⵔⵓ ⵏ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ ⴰⴽⴷ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⴷ ⵜⵎⵓⵏⵉⵏ ⵉⴷⵔⴰⵏ, ⵙⵡⴰ ⴳ ⵓⵙⵡⵉⵔ ⴰⵙⵉⵏⵔⴰⵏ ⴷ ⴽⵔⴰⵢⴳⴰⵜ ⵜⵎⵉⵣⴰⵔ ⵏ ⵓⵕⵓⴱⴱⴰ, ⵏⵉⵖ ⴳ ⵓⵙⴰⵜⵉ ⵏ ⵉⵎⵓⵙⵙⵓⵜⵏ ⵉⴱⵕⵍⴰⵎⴰⵏⵏ ⵉⴳⵔⴰⵖⵍⴰⵏⵏ, ⵙ ⴰⵢⵍⵍⵉ ⵉⴼⵔⵔⵓⵏ ⵉⵊⵎⵉⵍⵏ ⵉ ⵜⵏⵓⴼⴰⵢⴰⵜⵜⵓⵢⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵜⵉⵣⵡⵉⵔ ⴰⵙⵏⵜ ⴰⴽⴽⵯ ⵜⵎⵙⴰⵔⵜ ⵏ ⵜⵎⵓⵏⵜ ⵜⴰⵏⴰⴽⴰⵍⵜ ⵏ ⵜⴳⵍⴷⵉⵜ, ⴷ ⵉⵙⵙⵉⵙⴼⵉⵡ ⵏ ⵡⴰⴷⴷⴰⴷⵏ ⵏⵏⵙ ⵎⵏⵉⴷ ⵏ ⵜⵎⵙⴰⵔⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ.
ⵖⵉⴽⵍⵍⵉ ⵉⴳⴰ ⵓⴳⵔⴰⵡ ⴰⴷ ⵢⴰⵜ ⵜⵎⵍⴷⴰ ⵍⵍⵉ ⴳ ⵉⵙⵙⵉⵙⴼⵉⵡ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉⵎⵉⵥⵏ ⵍⵍⵉ ⵉⵍⵍⴰⵏ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷⴷⵓ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵏⵏⴰ ⵢⵓⵎⴰⵏ ⵇⴰⵃ ⵉⴳⵔⴰⵏ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵣⵔⴼⴰⵏⵏ, ⵙⵍⴰⵡⴰⵏ ⴰⴽⴽⵯ ⴰⵢⵍⵍⵉ ⴷ ⵢⵉⵡⵉ ⵓⴷⵓⵙⵜⵓⵔ ⵏ 2011, ⵙ ⵜⵖⴰⵔⴰⵙⵜ ⵏ ⵓⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⴷⵉⵎⵓⵇⵕⴰⵟⵉⵜ ⵜⴰⵏⵊⵎⵓⵜ ⴷ ⵓⵙⴷⵓⵙ ⵏ ⵜⴷⵉⵎⵓⵇⵕⴰⵟⵉⵜ ⵏ ⵜⴳⵏⵙⴰⵙⵜ ⴷ ⵜⵉⵍⴰⵍⵜ ⵏ ⵜⵎⵖⴰⵔⵜ ⴷ ⵉⵄⵔⵔⵉⵎⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ, ⵓⵍⴰ ⴰⵎⵏⵣⴰⵢ ⵏ ⵉⵙⴽⵉⵍ ⵊⴰⵔ ⵉⵡⵜⵎⴰⵏ ⴷ ⵜⵓⵜⵎⵉⵏ.
ⴳ ⵎⵏⵉⴷ ⴰⴷ, ⵉⵙⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵙ ⵜⵙⵏⵓⵔⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⵉⴳⴳⵓⵔⴰⵏ ⵉⵥⵍⵉⵏ ⵙ ⵡⴰⵍⴰⵙ ⵏ ⵜⴰⵏⵏⴰⵢⵜ ⴳ ⵓⵙⵍⴳⵏ ⵏ ⵜⵡⵊⴰ ⵙⵜⵖⴰⵔⴰⵙⵜ ⵏ ⵉⵎⴹⴰⴽⴰⵕⵏ ⵉⵏⵊⵎⵓⵜⵏ ⵉⵅⴰⵜⵔⵏ, ⵙ ⵓⵎⵙⴰⵙⴰ ⴷ ⵡⴰⵔⴰⵢ ⴰⵎⴰⵖⵓⴷ ⵍⵍⵉ ⵓⴽⴰⵏ ⵙⵓⵍ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⵉ ⵜⵎⵙⴰⵔⵉⵏ ⵏ ⵜⵡⵊⴰ ⵙ ⵓⵎⴰⵜⴰ.
ⴰⵔ ⴷ ⵏⵙⵙⴽⵜⴰⵢ ⵎⴰⵙ ⵉⴳⴰ ⵎⴰⵙⵙ ⵏⵏⵉⵄⵎⴰ ⵎⴰⵢⵢⴰⵔⴰ ⴰⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⵢⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ ⵏⵏⴰ ⵢⵓⵎⴰⵏ 34 ⵏ ⵓⵡⴰⵏⴽ, ⵙⴳ ⵜⵙⴳⴰ ⵜⴰⵏⴰⵎⵎⴰⵙⵜ ⴷ ⵓⴼⵜⴰⵙ ⴰⵄⵕⴰⴱ, ⴳ ⵜⵉⵣⵉ ⵏ 2023-2024, ⴳ ⵓⵙⴰⵜⵉ ⵏ ⵜⵉⵔⴰⵜ ⵏ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵜⵡⵓⵔⵉⵡⵉⵏ ⵏ ⵜⵎⴰⴷⴷⴰⵙⵜ ⴰⴷ ⵜⴰⴱⵕⵍⴰⵎⴰⵏⵉⵜ ⴷ ⵜⴷⵔⴰⵡⵜ ⴳ ⵜⵙⵏⵜⴰⵢⵉⵏ ⵏⵏⵙ, ⵃⵎⴰ ⴰⴷ ⵜⵉⵍⵉ ⵜⴳⵎⵉ ⴷ ⵓⵔⴳⴳⵉⴳ ⴰⵙⴳⴰⵡⴰⵏ, ⴷ ⵓⵙⵙⵉⵙⴼⵉⵡ ⵏ ⵜⵉⵍⴰⵍⵜ ⵏⵏⴰ ⵉⵍⵍⴰⵏ ⴷⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷⴷⵓ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⴹ, ⴳ ⵓⵙⴷⵓⵙ ⵏ ⵡⴰⵜⵉⴳⵏ ⵉⵛⵛⴰⵔⵏ ⴷ ⵓⵎⵙⴰⵡⴰⵍ ⴷ ⵓⵎⵙⴼⵔⵓ ⵏⴳⵔ ⵜⵎⵉⵣⴰⵔ ⵏ ⵜⵙⴳⴳⵉⵡⵉⵏ ⴰⴷ ⵙ ⵙⵏⴰⵜ ⵓⵍⴰ ⴷ ⵜⵎⵉⵣⴰⵔ ⵜⴰⴷⵊⴰⵔⵉⵏ, ⵙ ⴰⵍⵢⵢⵉ ⴷ ⵉⵜⵜⴰⵡⵉⵏ ⴰⴼⵔⴰ ⴷ ⵓⵔⴳⴳⵉⴳ ⴷ ⵜⵎⵢⵉⴷⵉⵔⵜ ⴷ ⵜⴳⵎⵉ ⵉⵛⵛⴰⵔⵏ.
ⵉⵃⴰⴹⵕ ⴷ ⵓⵎⵙⵇⴰⴷ ⵏ ⵍⵎⵖⵔⵉⴱ ⴳ ⵉⵕⵍⴰⵏⴷⴰ ⴳ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⴷ, ⵎⴰⵙⵙ ⵍⵃⵙⵏ ⵎⵀⵔⴰⵡⵉ ⴷ ⵍⴰⵙⴰⴷ ⵣⵣⵔⵡⴰⵍⵉ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴷ ⵙⴰⵄⴷ ⵖⴰⵣⵉ, ⴰⵏⵎⵀⴰⵍ ⵏ ⵉⵎⵢⴰⵙⵙⴰⵜⵏ ⵏ ⴱⵕⵕⴰ ⴷ ⵓⵎⵢⴰⵡⴰⴹ.
ⵉⴷⵔⴰ ⴳ ⵓⴳⵔⴰⵡ ⴰⴷ ⵎⴰ ⵉⴳⴰⵏ 42 ⵏ ⵓⵏⵙⵙⵉⵅⴼ ⴷ ⵜⵏⵙⵙⵉⵅⴼⵜ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵏ ⵓⵕⵓⴱⴱⴰ ⴷ ⵉⵎⵛⵛⵔⴽⵏ ⵙⴳ ⵜⵎⵉⵣⴰⵔ ⵜⴰⴷⵊⴰⵔⵉⵏ ⴷ ⵜⵎⵓⵏⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ, ⴰⵔ ⵜⵜⵎⴹⴰⴽⴰⵕⵏ ⵅⴼ ⵉⵙⴳⵓⵎⵏ ⵉⵣⴷⵉⵏ ⴷ ⵜⴷⵉⵎⵓⵇⵕⴰⵟⵉⵜ ⵏ ⵜⴳⵏⵙⴰⵙⵜ ⴷ ⵜⵓⵛⵛⵔⴽⴰ ⴳ ⵡⴰⴷⴷⴰⴷ ⵏ ⵡⴰⵔⴰⵔⴳⴳⵉⴳ, ⴷ ⵓⵙⴳⵓⵎ ⵏ ⵉⵙⴽⵉⵍ ⴷ ⵜⴷⵔⴰⵡⵜ ⵏ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ.